Mateus 6 - Herero Revision Bible (HRR)

Jesus ma hongo ovyotjari

1 “Ṱakamiseye nawa kutja amu ha tjiti ko ovyotjari vyeṋu komurungu wovandu, kokutja owo ve mune imbi mbi mamu tjiti. Tji mwa tjiti nao komurungu wovandu, Iho ngu ri meyuru kameemu pe ondjambi.

2 “Nu tji mo yandja otjiṋa komusyona, o yandja ovandu amave ku munu tjimuna ovanatjavivi tji ve tjita mozosinagoge na momivanda. Owo ve tjitira kutja ovandu ve ve tange. Tjiri, me mu raere, ondjambi yawo ve i pewa rukuru. 3 Nungwari tji mo vatere omusyona, tjita kutja nangarire epanga roye katjotjiri ari ha tjiwa otjiṋa ho, 4 kokutja ovyotjari vyoye vi kare mohamunika. Nu Iho ngu muna imbi mbi u tjita mohamunika ongu me ku sutu ondjambi yoye.

Jesus ma hongo omuhingo wokukumba

(Lk 11:2-4)

5 “Nu aruhe tji mamu kumbu, amu kara otja ovanatjavivi! Owo va suvera okukurama mozosinagoge na pomahakaeneno womivanda amave kumbu, kokutja avehe ve ve mune. Tjiri, me mu raere, ondjambi yawo ve i pewa rukuru. 6 Nungwari ove tji mo kumbu, kahite metuwo roye u pate omuvero nu u kumbe ku Iho ngu ha munika. Nu Iho ngu muna imbi mbi u tjita mohamunika, ongu me ku sutu ondjambi yoye.

7 “Tji mamu kumbu, amu hungire omambo omengi womungandjo tjimuna imba mbe he ri Ovajuda tji ve tjita. Owo ve tjangovasi Ndjambi meve zuvire, ozongumbiro zawo tjinga aze ri ozonde. 8 Amu sana na wo. Iho ma tjiwa rukuru imbi mbi mwa hepa ngunda amu hiye mu ningira. 9 Nopu mwa sokukumba nai:

‘Tate yetu ngu u ri meyuru:

Ena roye nga ri yapurwe;

10 ouhona woye ngau ye;

ombango yoye ngai tjitwe

kombanda yehi otja tji i tjitwa meyuru.

11 Omboroto yetu yeyuva arihe tu pao ndino.

12 Nu tu isira ozondjo zetu,

otja eṱe tji tu isira ovanazondjo na eṱe.

13 Nu o tu hitisa momarorero,

nungwari tukutura kouvi.’

14 “Tji mamu isire ovakweṋu ouvi mbu va tjiti ku eṋe, Iho ngu ri meyuru wina me mu isire. 15 Nungwari tji mu hi nokuisira ovakweṋu, Iho kemee mu isire ko ouvi mbu mwa tjita.

Jesus ma hongo omeritjaerero kovikurya

16 “Nu tji mamu ritjaere kovikurya amu kara nomirungu vyondjenda otja ovanatjavivi tji ve tjita. Owo ve tivaurisa omirungu vyawo, ovandu avehe ve ve mune kutja mave ritjaere kovikurya. Tjiri, me mu raere, ondjambi yawo ve i pewa rukuru. 17 Tji mo ritjaere kovikurya, rikamura ozondjise zoye nawa, nu u kohe omurungu woye, 18 kokutja ovakweṋu ave ha tjiwa kutja mo ritjaere kovikurya, nungwari Iho porwe ngu ha munika ongumatjiwa. Nu Iho ngu muna imbi mbi u tjita mohamunika ongu me ku sutu ondjambi yoye.

Outumbe meyuru

(Lk 12:33-34)

19 “Amu ri wongere outumbe kombanda yehi; owo mau riwa i omatoto, au nyonwa i omureru namu taurire omarunga okuvaka. 20 Nungwari ri pahereye outumbe meyuru omatoto ku ye ha ri, omureru ku u ha nyono, nomarunga ku ye ha taurire mo okuvaka. 21 Orondu imba pu pe noutumbe weṋu aruhe opu mape kara omitima vyeṋu wina.

Ondjerera yorutu

(Lk 11:34-36)

22 “Eho oro emunine rorutu. Eho roye tji ri ri ewa, orutu rwoye aruhe maru kara mondjerera. 23 Nungwari eho roye tji ri ri evi, orutu rwoye aruhe wina maru kara monḓorera. Nondjerera ndji ri move tji ya rire onḓorera, tjiri, ma i rire onḓorera ṱukuṱuku.

Ndjambi nouini

(Lk 16:13Lk 12:22-31)

24 “Kape nomukarere ngu ma sora okuungurira ovahona vevari tjimwe; eye ma tondo umwe na suvere ingwi omukwao; nu me riyameke ku umwe na tengurura omukwao. Eṋe kamu nokusora okukarera Ndjambi novimariva tjimwe.

25 “Ami opu me zu okumuraera kutja amu rikendere ominyo vyeṋu kutja mamu ri tjike nu mamu nu tjike, notutu tweṋu kutja mamu zara tjike. Omuinyo kamunanḓengu povikurya are? Nu orutu karu nanḓengu pozombanda are? 26 Tareye kozonḓera zokuti: Ozo kaze kunu nu kaze kondo, nu kaze wongere momatuwo womapwikiro, nungwari Iho meyuru eye ngo u ze hupisa. Neṋe kaweṋe ovananḓengu pozonḓera are? 27 Owaṋi mokati keṋu mokurikendera omuinyo we ngu ma sora okuhupa orure kaṱiṱi?

28 “Mamu rikendere tjike nozombanda? Tareye ozongara zozonyanga mokuti tji ze hapa: Ozo kaze ungura nu kaze yatata ozombanda. 29 Nungwari me mu raere, kutja nangarire ombara Salomo noutumbe we auhe ke na indu wa zarere otja imwe yazo. 30 Nu Ndjambi ngu zareka momuhingo mbwa sana ngo inga omahozu nge ri mokuti ndino nu muhuka aye yumbwa momuriro, ma urwa i tjike okuzarisa eṋe tjinene komeho, vanangamburiro okaṱiṱi?

31 “Opu mu hi nokusokurikendera kutja mamu ri tjike, mamu nu tjike nu mamu zara tjike. 32 Oviṋa mbi avihe imba mbe he ri Ovajuda, ombi ve rikenda na vyo. Nungwari Iho meyuru u tjiwa kutja eṋe mu hepa oviṋa mbi avihe. 33 Rutengatenga paheye ouhona wa Ndjambi na indji ombango ye, neye me mu wezire ko oviṋa mbi avihe. 34 Amu rikende neyuva ramuhuka, oro tjinga ari nomerikendero waro orini. Eyuva ngamwa arihe ri kara nouzeu waro orini.