Mateus 28 - Herero Revision Bible (HRR)

Jesus ma penduka movakoke

1 Kombunda yesabata, oSondaha, tji pa tji, Maria Magdalena na Maria ingwi omukwao va ya okukatara eyendo. 2 Tjimanga pa kara omanyinganyingiro wehi omazeu tjinene; omuengeri wa Muhona wa raukire keyuru, na isapo ewe, na haama ko. 3 Ombunikiro ye ya ri otja orutjeno rwombura, nozombanda ze za ri ozombapa twee. 4 Ovatjevere va tira tjinene nga tji va uta okuzezera nave sana kovandu mba koka.

5 Nomuengeri wa hungirire kovakazendu a tja: “Amu tira! Ami me tjiwa kutja mamu paha Jesus ngwa papererwe kotjikoroise. 6 Eye ke mo mwi; wa pendurwa movakoke otja punga a hungirire. Indjeye mu yekutara moṋa ma rarere. 7 Nambano twendeye tjimanga mu kaserekarerere ovahongewa ve kutja eye wa pendurwa movakoke, nokutja nambano eye me mu tengere po okuyenda kOgalilea, nu oku mamu kemumuna! Zemburukeye nawa imbi ami mbi mbe mu raere.”

8 Ovakazendu opu va zira po tjimanga peyendo ave nemuma, nungwari wina ave nenyando tjinene, nowo va tupuka okukaraera ovahongewa ve.

9 Tjimanga Jesus wa hakaenene novakazendu mba ne ve minike. Owo ve ya ku ye, ave mu kambura kozombaze nave rikotamene ku ye. 10 Jesus arire tja tja ku wo: “Amu tira! Twendeye mu karaere ovangu vandje kutja ve yende kOgalilea, nowo oku mave kendjimuna.”

Omaserekarerero wovatjevere

11 Novakazendu ngunda ava i, ovarwe wovita tjiva mbaa ve tjevere eyendo arire tji va yaruka kotjihuro nave karaera ovapristeri oviuru oviṋa avihe mbya tjitirwe. 12 Ovapristeri oviuru va worongana puna ovanene nave tye ouripura wawo mbwi: Owo va yandja ovimariva ovingi tjinene kovarwe wovita, 13 nave tja: “Eṋe mamu sokutja nai: ‘Ovahongewa ve ve ya mokati kouṱuku nave vaka orutu rwe ngunda a twa rara.’ 14 Omunane omunene wOrukondwa tja zuu otjiṋa hi, eṱe matu mu popo kutja eṋe kamu nondjo, neṱe matu kondjo kutja amu he rikende notjiṋa hi.”

15 Ovatjevere otji va kambura imbi ovimariva nave tjiti otja punga ava raerwa. Nomaserekarerero nga ye hungirwa mokati kOvajuda nga ku ndinondi.

Jesus me riraisa kovahongewa ve

(Mk 16:14-18Lk 24:36-49Jhn 20:19-23Oviu 1:6-8)

16 Ovahongewa mba omurongo na umwe va ire kOgalilea kondundu ndji Jesus ke ve raerere kutja a rire ku va i. 17 Nu tji ve mu muna arire tji ve rikotamene ku ye nangarire kutja tjiva vawo aave ivaiva. 18 Jesus weya popezu na tja ku wo: “Ami mba pewa ouvara auhe meyuru na kombanda yehi. 19 Otji mwa sokuyenda komihoko avihe ngamwa akuhe mu kaisepo ovandu ovahongewa vandje amamu ve papitisa mena ra Tate nOmuna nOmbepo Ondjapuke. 20 Nu ve hongeye okuṱakamisa oviṋa avihe mbi mbe mu raera. Nu, tjiri, ami mbi ri puna eṋe omayuva aehe nga komaandero wouye.”