Ovayenda mba zire komuhuka
1 Jesus wa kwaterwa motjirongo Betlehem mehi ra Judea, moruveze ndwi Herodes tja ri ombara. Tjimanga kombunda yanao ovarumendu tjiva ovatjiwe vozonyose ve ere kOjerusalem okuza komuhuka 2 nu ave pura ave tja: “Okanatje ku ka kwatwa okurira ombara yOvajuda ke ri pi? Eṱe twa munu onyose yako amai piti komuhuka, nu twe ya okuyekurikotamena ku ko.”
3 Ombara Herodes tja zuvire omambo nga wa kurungisirwe tjinene pamwe novature avehe va Jerusalem. 4 Eye wa woronganisa ovapristeri oviuru avehe nozonongo zomambo ne ve pura a tja: “Omutwirisiwa ma sokukwaterwa pi?”
5 Owo ave ziri ave tja: “Omotjirongo Betlehem mehi ra Judea, orondu omuprofete worive wa tjere nai:
6 ‘Ove Betlehem mehi ra Judea,
kaove ngu u ri okaṱiṱi tjinene mokati kovihuro ozohongora vya Juda,
move tjinga amamu zu omunane
ngu ma hongorere otjiwaṋa tjandje Israel.’”
7 Herodes opa isanena ovayenda mba zire komuhuka kombongarero yomongumumu okuzuva nawa mu wo indwi oruveze onyose ndu ya munikire. 8 Okuzambo arire tjeve hindi kObetlehem nomambo nga: “Twendeye mu kapahe nawa inga okanatje, nu tji mwe ke kemuna mu yekundjitjivisa, kokutja ami wina mbi kerikotamene ku ko.”
9 Nu tji va za nokupuratena komambo wombara va ya; nu onyose ndji va munine amai zu komuhuka ye ve hongorera nga tji ya kakurama kombanda yopoṋa mba pu pa ri okanatje. 10 Tji va muna indji onyose va nyanda omitima tjinene. 11 Owo va kahita mondjuwo, nu tji va muna okanatje na ina Maria, arire tji va woro ozongoro nave rikotamene ku ko. Owo va paturura ozondjaṱu zawo nave ke pe oviyandjewa mbi: Ongoldo novyomoro omuwa nemira.
12 Nu Ndjambi tjinga e ve raerere moruroto kutja ave ha yaruka ku Herodes, otjinga ava twara ondjira yarwe ave yaruka kehi rawo.
Omatauriro kOengipte
13 Novayenda vokomuhuka tji va zire nokuyenda, omuengeri wa Muhona arire tje rimunikisa ku Josef moruroto na tja: “penduka u toore okanatje na ina mu taurire kOengipte nu mu kakare ngo nga ami tji mbe ku tjivisa okukotoka, Herodes tjinga ama paha okanatje okukezepa.”
14 Josef wa penduka, a toora okanatje na ina na taurire kOengipte ouṱuku. 15 Eye wa kakara ngo nga Herodes tja koka. Ihi tja tjitirwa kutja inga omambo Muhona nga hungirire notjinyo tjomuprofete ye yenenisiwe, indu tja tjere: “Ami mba isana Omuna wandje okumupitisa mOengipte.”
Omazepero wovanatje
16 Nu Herodes tja zuvire kutja ovayenda wokomuhuka ve mu wovisa, arire tja pindike tjinene. Eye wa hinda ovarwe wovita kutja ve kazepe ounatje auhe ouzandu mObetlehem na mozondendera zatjo mbwa ri nozombura mbari nokehi yanao ama sasanekere koruveze ndwi ndwa purire kovayenda vokomuhuka indu onyose tji ya munikire.
17 Komuhingo mbwi imbi omuprofete Jeremia mbya hungirire otji vya yenenisiwa, indu tja tjere:
18 “Eraka mari zuvaka mOrama,
ombosiro yomauriro omatetarise.
Rahel ma ririre ovanatje ve;
eye ma panḓa okuhuhumiṋiwa,
owo tjinga ava ṱu.”
Omakotokero okuza kOengipte
19 Kombunda yonḓiro ya Herodes, omuengeri wa Muhona we rimunikisire ku Josef moruroto mOengipte 20 na tja: “Sekama u toore okanatje na ina nu u yaruke kehi ra Israel, imba mbaa ve paha okuzepa okanatje tjinga ava ṱu.” 21 Josef arire tja sekama, a toora okanatje na ina na yaruka kehi ra Israel.
22 Nungwari Josef tja zuvire kutja Arkelaus wa pingena ihe Herodes okurira ombara ya Juda, wa tira okuyenda koṋa ngo. Nu Ndjambi tja za nokumupa omarongo moruroto, Josef arire tja i korukondwa rwa Galilea, 23 na ka tura motjirongo tjena Nasaret, kokutja omambo nga nga hungirirwe i omuprofete ye yenenisiwe: “Eye ma isanewa kutja Omunasaret.”
© Herero Revision Bible © Bible Society in Namibia, 2021.
