Ngu ri omunenenene owaṋi?
(Mk 9:33-37Lk 9:46-48)1 Momayuva ngo ovahongewa ve ere ku Jesus nave mu pura ave tja: “Ngu ri omunenenene mouhona womayuru owaṋi?” 2 Jesus opa isanena okanatje, e ke kuramisa mokati kawo, 3 na tja: “Tjiri, me mu raere, tji mu hi nokurunduruka amu sana kounatje, kamaamu hiti mouhona womayuru. 4 Omunenenene mouhona womayuru eye ngwi ngu me risusuparisa omuini na sana kokanatje nga. 5 Nu ngu ma sekirisa okanatje otja inga mena randje, eye ma sekirisa ami.
Okurorerwa kouvi
(Mk 9:42-48Lk 17:1-2)6 “Nu auhe ngu ma putarisa umwe wa imba ouṱiṱi mba mba kambura mu ami, atja rira kokuwa tjinene ku ye, ewe enene rotjikweyero tji ra kutwa mosengo ye, nu a ṱomwinisiwa mourekoto womeva kokuvare. 7 Owee kouye mu mu noviṋa mbi putarisa omundu. Oviṋa otja imbi vari aruhe vi ya, nungwari owee komundu ngu eta oviputarise mbi!
8 “Nu eke nombaze yoye tji mavi tjiti kutja u poke kongamburiro yoye, konda u vi imbirahi. Okokuwa kove okuhita meyuru au ri otjiṱeṱu notjipu posi yokukara nomake ayeyevari nozombaze azeyembari nokuyumbwa motjovasengwa. 9 Neho roye tji ma ri tjiti kutja u poke kongamburiro yoye, homona u imbirahi. Okokuwa kove okuhita meyuru au norumongo posi yokukara nomeho ayeyevari nokuyumbwa motjovasengwa.
Omasanekero wonḓu ndja pandjara
(Lk 15:3-7)10 “Ṱakamiseye kutja amu ha nyeṋuna umwe wovaṱiṱi mba. Orondu tjiri, memu raere kutja ovaengeri vawo meyuru aruhe ve ri momurungu wa Tate meyuru.
12 “Nu mamu ripura vi komundu ngu nozonḓu esere rimwe na pandjarisa imwe yazo kutja ma tjiti vi? Eye ma isa inḓa omirongo muvyu na muvyu momaryo wozondundu na kateza indji ndja pandjara. 13 Nu tje i munu, tjiri, me mu raere, eye ma yorokere onḓu imwe ndji tjinene okukapita inḓa omirongo muvyu na muvyu nḓe hi naa za pandjarere. 14 Nu momuhingo tjingewo Iho meyuru otjinga e ha vanga kutja umwe wovaṱiṱi mba ve pandjare.
Omukweṋu ngwa tura ondjo
15 “Omukweṋu tja tjiti ouvi kove twende ku ye u kemuraere ondjo ye amu ri amuyevari peke. Neye tja puratene kove, okutja we mu kotora. 16 Nungwari tje hi nokuvanga okupuratena kove twaerera omundu umwe poo vevari kokutja pomambo aehe ngu maye kahungirwa pe kare ovahongonone vevari poo vetatu. 17 Nu tje hi nokuzuva ku wo, kahepure otjiṋa hi kombongo. Nu korusenina eye tje hi nokuzuva kombongo, mu vareye kutja kamukambure notja omusutise wotjisuta tjouini.
Okutjaerwa nokuyandjera
18 “Tjiri, memu raere ouatjiri: Atjihe tji mamu tjaere kombanda yehi otjinga ama tji tjaerwa meyuru, natjihe tji mamu yandjere kombanda yehi otjinga ama tji yandjerwa meyuru.
19 “Memu raere rukwao: Aruhe vevari veṋu kombandehi tji va zuvasana otjiṋa ngamwa tji mave kumbire, Tate meyuru meve tjitire, 20 orondu vevari poo vetatu tji va worongana mena randje, ami omunga ambi ri mokati kawo.”
Omasanekero womukarere ngu ha isire
21 Okuzambo Petrus arire tje ya ku Jesus na pura a tja: “Muhona, omukwetu tji makaenda komurungu okutjita ouvi ku ami, hi mu isire tungapi? Hi mu isire potuhambombari?”
22 Jesus wa zirire a tja: “Kako! O mu isire potuhambombari, nungwari mu isira povikando omirongo hambombari potuhambombari. 23 Ouhona womayuru opunga amau zu okusasanekwa nombara ndja tye okuvara puna ovakarere vayo inga omatarero wovimariva momambo wawo. 24 Nu tji ya utu okuvara, omukarere umwe ngu nozondjo zayo zozoranda omangete arire tja etwa ku yo. 25 Omukarere ngwi ka ri novimariva mbya yenena okusuta na vyo ondjo ye, nombara opu ya rakizira kutja eye nomukazendu we novanatje ve navihe mbye na vyo vi randisiwe kokutja ondjo ndji i sutwe. 26 Omukarere wa wa kozongoro momurungu wombara ne riyarikaṋa a tja: ‘Kara nomuretima na ami, nami me ku sutu avihe.’ 27 Ombara arire tji ya ṱire omukarere ngwi ondjenda, ai mu isire indji ondjo nai mu esa a yende.
28 “Nomukarere ngwi tja pitire wa kahakaenene nomukarere omukwao ngwa ri nozondjo ze zousilveri ouṱiṱi uriri. Eye arire tje mu kambura na utu okumusina a tja: ‘Ndji suta ondjo, ndji wa kambura ku ami.’ 29 Omukarere omukwao ngwi arire tja u kozongoro komurungu we ne riyarikaṋa a tja: ‘Kara nomuretima na ami, nami me ku sutu avihe!’ 30 Nungwari eye wa panḓa, notje kemuyumba motjovakamburwa nga tja sutu ondjo ye. 31 Ovakarere ovakwao tji va mwine imbi mbya tjitirwe, arire tji va hihamwa omitima nave i kombara ave keiserakarera avihe mbya tjitwa. 32 Ombara otji ya isana ingwi omukarere nai tja ‘Mukarere ove otjiporoporo, ondjo yandje ndjina aihe ami mbe ku isire, tjinga awe riyarikaṋa ku ami. 33 Ove kotjo sokutjariparera omukarere omukweṋu tjimuna ami tji mbe ku tjariparere are?’ 34 Ombara ya pindikire tjinene, na rire tji ye mu hindi kotjovakamburwa okukatatumisiwa nga tja sutu ondjo aihe.”
35 Nu Jesus wa yandisa ehungi re a tja: “Tate meyuru otjinga ama tjiti nao ku eṋe amuhe, indu auhe weṋu tje hi nokuisira omukwao nomutima we auhe.”
© Herero Revision Bible © Bible Society in Namibia, 2021.
