Maleaki 4 - Herero Revision Bible (HRR)

Eyuva romeero wa Muhona

1 Muhona Omunamasaaehe ma tja nai: “Tara, eyuva mari ya, noro mari nyosa otja ezuko. Nu imba mbe ritongamisa na imba ovarunde avehe otji mave pi otja ovihozu. Meyuva ndo owo mave ningiririsiwa, nu kape notjiṋa tjimwe tjawo tji matji hupu. 2 Nungwari ku eṋe mbu mu nondira kena randje maku yere eyuva rousemba, noro mari eta omberukiro mozohanya zaro. Neṋe mamu womboroka nokutuka ovindondooro otja ozondana nḓu maze pitisiwa motjunda. 3 Meyuva ami ndi me tjiti oviṋa mbi, eṋe mamu tombo ovanauvi, nowo mave sana koruuma kehi yozombaze zeṋu.” Muhona Omunamasaaehe ongwa hungire.

4 “Rizemburukeye nomahongero womukarere wandje Moses, okutja omatwako nomazikamisiro ngu mbe mu pere kondundu Sinai kotjiwaṋa atjihe tja Israel okuyeṱakamisa.

5 “Tara, ami me mu hindire omuprofete Elia, indi eyuva enene netirise ra Muhona ngunda ari hiye ya. 6 Neye ma wanisa ooihe novanatje kumwe rukwao kutja ami e ha hepa okuya nokunyona ehi reṋu.”