Lukas 5 - Herero Revision Bible (HRR)

Jesus ma isana ovahongewa ovatenga

1 Eyuva rimwe Jesus ngunda a kurama pomukuro wOmuronga wa Genesaret, ovandu tjandje mave ṋeyasana okuvaza ku ye kutja ve puratene kembo ra Ndjambi. 2 Eye wa muna ouyaha uvari mbwa ri pomukuro womuronga, ovapate wozohi tjandje va heruka mu wo, nu mave koho ozombate zawo. 3 Jesus wa ronda mokayaha kemwe ku ka ri oka Simon, nu e mu ningire kutja e ke humburure kaṱiṱi nomukuro. Tjazumba otja kara pehi mu ko na hongo ihi otjimbumba tjovandu.

4 Jesus tja mana okuhungira, wa tja ku Simon: “Twara okayaha kokure momeva nu mu yumbe ozombate zeṋu okupata ozohi.”

5 Simon wa zira a tja: “Eṱe twa kondjo ouṱuku auhe amatu ungura oukukutu, Muhona, nu katu kamburire otjiṋa. Nungwari mena rembo roye ami me yumbu inḓa ozombate.” 6 Owo va yumba ozombate nave kambura ozohi ozengi tjinene nai nga ozombate zawo tji za ri pokutauka. 7 Notji va ṋanga ovakwao mba mba ri mokayaha karwe kutja ve ye okuvevatera. Owo ve ya, nu avehe pamwe ve urisa ouyaha auyevari nozohi nga owo tji wa hara okuṱomwina. 8 Simon Petrus tja muna imbi mbya tjitwa, arire tja u pehi kozongoro komurungu wa Jesus na tja: “Zapo pu ami, Muhona, orondu owami omundu omunauvi!”

9 Eye novakwao mba ri puna ye va himisiwa i otjivarero otjingi nai tjozohi nḓu va pata. 10 Jakobus na Johanes, ovazandu va Sebedeus, mba ri ovapamwe na Simon, wina va himinwe omuhingo tjingewo mbo. Jesus wa tja ku Simon: “O tira, okuzamba mo rire omupate wovandu.”

11 Owo va nanena ouyaha wawo komukuro, ave isa oviṋa avihe nave kongorere Jesus.

Jesus ma verukisa omurumendu

(Mt 8:1-4Mk 1:40-45)

12 Eyuva rimwe Jesus ngunda e ri motjirongo tjimwe, wa hakaena nomurumendu ngwa ri nomutjise wongana. Omurumendu ngwi tja muna Jesus, wa wa kozongoro komurungu we na tja: “Muhona! Ove tji wa vanga, mo sora okundjiverukisa!”

13 Jesus wa roporora okuoko kwe na ṱunu ku ye a tja: “Ami me vanga, veruka!” Tjimanga omutjise wongana arire tji wa zu mo momurumendu ngwi. 14 Nu Jesus we mu rakiza na tja: “Ngoo raere omundu otjiṋa hi, nungwari twende osemba komupristeri u keriraise ku ye, kokutja a raise ku avehe kutja ove wa veruka, tjazumba u kapunguhire omakohororero woye ombunguhiro Moses ndja rakizire.”

15 Nungwari ombuze ohunga na Jesus ya zuvakera ko akuhe, novimbumba ovingi vyovandu vye ya okupuratena ku ye nokuverukisiwa omitjise vyawo. 16 Nungwari eye aruhe aa i koṋa ku ya kakara erike okukumba.

Jesus ma verukisa omuremane

(Mt 9:1-8Mk 2:1-12)

17 Eyuva rimwe Jesus ngunda ama hongo ovandu, Ovafarisei nozonongo zomambo tjiva, mba zire kovirongo avihe mehi ra Galilea nora Judea na kOjerusalem, tjandje va haama mbo. Nu omasa wa Muhona yari mbo puna Jesus, kutja eye a enene okuverukisa ovandu. 18 Tjimanga pe ya ovarumendu mba toorere omuremane poruara, nowo va kondja okumuhitisa mondjuwo ve kemutwe komurungu wa Jesus. 19 Mena rotjimbumba otjinene tjovandu, owo kave mwine poṋa pu mave muhitisire. Otjinga ave mu rondisa komututu, nave mu pundisire moruveze ndu va topora momututu e ri poruara nave mu twa mokati kovandu momurungu wa Jesus. 20 Jesus tja muna ongamburiro yawo wa tja komuremane: “Muatje wandje, ourunde woye ove wa isirwa.”

21 Ozonongo zomambo nOvafarisei ve ripura nai momitima vyawo: “Owaṋi ngwi ngu ma hungire ondjambu otja indji ku Ndjambi? Ngu ma sora okuisira ourunde owaṋi pendje na Ndjambi erike?”

22 Nungwari Jesus tjinga aa tjiwa omeripura wawo, opa tjera ku wo: “Mamu ripurire tjike oviṋa mbya sana ngo momitima vyeṋu? 23 Oupupu tjinene okongwi okutja: ‘Ourunde woye ove wa isirwa,’ poo okongwi okutja: ‘Sekama, toora oruara roye nu u kawondje?’ 24 Nungwari ami me mu raisire kutja Omuna wOmundu u nouvara kombanda yehi okuisira ourunde.” Eye opa tjera komuremane: “Ami me tja nai kove: ‘Sekama, toora oruara roye, twende koyoye!’ ”

25 Navehe ngunda amave tarere, ingwi omuremane wa sekama tjimanga, a toora oruara pa rarere na yaruka koye ama tanga Ndjambi. 26 Owo avehe va himinwe tjinene. Nu ngunda ave nomburuma va tanga Ndjambi ave tja: “Tjiri, ndinondi twa munu oviṋa ovihimise!”

Jesus ma isana Levi

(Mt 9:9-13Mk 2:13-17)

27 Kombunda yanao Jesus wa pita motjihuro na kamuna omusutise wotjisuta tjouhona wena Levi a haama pondjuwo ye yomasutiro. Nu Jesus wa tja ku ye: “Ndji kongorera.” 28 Levi wa sekamene, a isa oviṋa avihe na kongorere Jesus.

29 Nu Levi wa nyandera Jesus omukandi omunene mondjuwo ye. Nu mu imba ovaṋangwa wina mwa ri ovasutise ovengi votjisuta tjouhona novandu varwe. 30 Nu Ovafarisei nozonongo zomambo tjiva mba ri pamwe va unaunina ovahongewa va Jesus ave tja: “Okutjavi tji mamu ri nokunwa puna ovasutise votjisuta tjouhona novanauvi?”

31 Jesus we ve zirire a tja: “Mbe hepa onganga kawo mba ovaveruke, nungwari owo mba mba vera. 32 Ami hi ere okuisana ovasemba kondanaukiro, nungwari mbe era okuisana imba ovanauvi.”

Omeritjaerero kovikurya

(Mt 9:14-17Mk 2:18-22)

33 Ovandu tjiva va tja nai ku Jesus: “Ovahongewa va Johanes na imba vOvafarisei potuingi ve ritjaera kovikurya nu ve kumba, nungwari imba ovoye ve rya nokunwa uriri.”

34 Jesus wa zira: “Mamu tjangovasi ovaṋangwa pomukandi worukupo mave ritjaere kovikurya omuvareke ngunda e ri puna wo are? Kako ka tji pe ri nao! 35 Nungwari eyuva mari ya omuvareke ndi ma isiwa po pu wo, otji mave ritjaere kovikurya momayuva ngo.”

36 Jesus wina we ve raera omasanekero a tja: “Kape nomundu ngu taura erapi kombanda ombe, nu a twako kombanda onguru. Eye tja tjiti nao, ombanda indji ombe mai tauka, nu erapi rombanda ombe ka rina kuhitasana nombanda ndji onguru. 37 Wina kape nomundu ngu pakera omavinu omape mozondjaṱu ozonguru zomikova, orondu omavinu omape nga maye pamuna inḓa ozondjaṱu, nomavinu aye nyonoka, nozondjaṱu aze tauka. 38 Nungwari omavinu omape maye sokupakerwa mozondjaṱu ozombe zomikova! 39 Norukwao kape nomundu ngu nwa omavinu omakuru, tjazumba a vanga omavinu omape, orondu aruhe ma tja: ‘Omakuru onge ri omawa tjinene pomape.’ ”