Lukas 24 - Herero Revision Bible (HRR)

Okupenduka kwa Jesus

1 OSondaha rukuru muhuka, ovakazendu va ya keyendo, ava toora ovyomoro omuwa mbi va ṱunine. 2 Nowo va vaza ewe ara isiwa po potjinyo tjeyendo, 3 narire tji va hiti; nungwari kave vazere mo orutu rwa Muhona Jesus. 4 Owo va kuramene mbo ava himisiwa i otjiṋa hi, nu tara, meṋe yawo pa kuramene ovarumendu vevari, mba ri nozombanda ozongeṋangeṋe. 5 Novakazendu va uruma nave petere omirungu vyawo pehi, nu ovarumendu va tjere nai ku wo: “Okutjavi tji mamu pahere omunamuinyo movaṱi? 6 Eye ke mo mwi, wa penduka. Zemburukeye imbi mbya hungirire indu tja ri mOgalilea, tja tjere: 7 ‘Omuna wOmundu ma sokuyandjewa momake wovanauvi na paperwa kotjikoroise, nu a penduka movakoke meyuva oritjatatu.’ ”

8 Ovakazendu otji va zemburuka omambo wa Jesus, 9 ave kotoka okuza keyendo nave karaera oviṋa avihe mbi kovahongewa omurongo na umwe na kovakwao avehe. 10 Ovakazendu mbo va ri Maria Magdalena na Johana, na Maria, ina ya Jakobus; owo novakazendu ovakwao, mba ri puna wo va serekarera oviṋa mbi kovaapostele. 11 Nungwari imba ovaapostele aave ripura kutja ovakazendu mave hungire oviporoporo uriri; notji ve ha kamburire ko. 12 Nu Petrus wa sekamene na tupuka keyendo; nu tja kanatera moukoto, wa munine omarapi porwazo nokuhinotjiṋa tjarwe. Tjazumba arire tja yaruka konganda a himisiwa i oviṋa mbya tjitwa.Petrus peyendo

Ouyenda kOemaus

(Mk 16:12-13)

13 Meyuva tjingero ndo ovakongorere vevari va Jesus aave i kotjirongo tjena Emaus, tji tji ri oure wozokirometa omurongo na mbari okuza kOjerusalem, 14 tjandje mave yende amave serekarerasana avihe mbya tjitirwe. 15 Nu ngunda amave rihungirire nokuserekarera, Jesus omuini arire tje ya ku wo na ka wondja puna wo. 16 Owo ve mu muna, nungwari kaave mu zemburuka. 17 Jesus wa tja ku wo: “Mamu yende amamu serekarerasana tjike?”

Owo va kurama nduu nyee ava ṱoruhoze. 18 Nu umwe wawo wena Kleofas we mu pura a tja: “Okutja oove erike uriri omuyenda mOjerusalem ngu hi nokutjiwa oviṋa mbya tjitwa mo momayuva ouṱiṱi nga kapita nga are?”

19 Eye wa pura nai: “Ovikeṋa?”

Owo va zirire ave tja: “Imbi oviṋa mbya tjitwa ku Jesus wa Nasaret. Omundu ngo wa ri omuprofete ngwa ri nouvara momambo na movitjitwa komurungu wa Ndjambi nowotjiwaṋa atjihe. 20 Ovapristeri vetu oviuru novahonapare ve mu yandja kutja a pangurwe kokuṱa, neye wa papererwe kotjikoroise. 21 Neṱe twa undjire kutja eye onguri ye ngwi ngwatja kutura Ovaisrael! Nu kombanda yoviṋa avihe mbi, ndinondi nai oro eyuva oritjatatu okuza koviṋa mbyo tji vya tjitirwe. 22 Ovakazendu tjiva votjimbumba tjetu mba ire keyendo omuhuka omunene ve tu kumisa. 23 Owo kave vazere mo orutu rwe. Va kotoka amave tja va munu otjirimunikise tjovaengeri mbe ve raere kutja eye u nomuinyo. 24 Ovandu tjiva votjimbumba tjetu wina va ire ngo keyendo nave kerivaza ari ri otja ovakazendu punga ava heere, nungwari eye omuini ongu ve ha mwine.”

25 Jesus wa tjere ku wo: “Oweṋe omayova uri, nu mu toora orure okukambura momambo aehe, nga hungirirwe i ovaprofete! 26 Omutwirisiwa ka sere okuhihamisiwa nai are, nu a rire pa hitire mondjozikiro ye?” 27 Nu Jesus we ve handjaurira omambo nga hungirirwa ye omuini momatjangwa aehe, ama utire pomambo wa Moses nomatjangwa wovaprofete avehe.

28 Nowo tji va ri pokuvaza otjirongo kuyave i, Jesus arire tja tjiti aayo ma kapita komurungu. 29 Nungwari owo ve mu tjaera ave tja: “Kara puna eṱe, eyuva ratoko, nu kwa zorere.” Nu eye arire tja hiti okukara puna wo. 30 Eye ngunda a haama potjiriro puna wo, wa toora omboroto ne i sere ondaya; nu wa koyora indji omboroto ne i yandja ku wo. 31 Tjazumba omeho wawo ya paturuka, nowo arire tji ve mu zemburuka, nungwari eye wa zenga momirungu vyawo. 32 Owo ve rihungirira ave tja: “Hapo omitima vyetu kaavi ri zuu tjimuna muna omuriro mbu mau yaka indu eye tjaa hungire kuna eṱe mondjira nokutuhandjaurira omatjangwa?”

33 Nu va sekamene tjimanga nave yaruka kOjerusalem. Koṋa ngo va kavaza ko ovahongewa mba omurongo na umwe puna ovakwao 34 mbaa ve tja: “Tjiri, Muhona wa penduka! Eye we riraisa ku Simon!”

35 Nu imba ovevari ve ve serekarerera imbi mbya tjitwa mondjira, na indu tji va zemburuka Muhona eye tja koyora omboroto.

Jesus me riraisa kovahongewa ve

(Mt 28:16-20Mk 16:14-18Jhn 20:19-23Oviu 1:6-8)

36 Nu imba ovevari ngunda amave serekarere oviṋa mbi, tjimanga Jesus omuini wa kuramene mokati kawo na tja ku wo: “Ohange ngai kare na eṋe!”

37 Owo va urumine nave tira tjinene, notji va tjangovasi mave munu ombepo. 38 Nungwari eye wa tjere ku wo: “Mamu urumine tjike? Nokutjavi tji mu nomeripuriro pevari momitima vyeṋu? 39 Tareye omake wandje nozombaze zandje: Owami ngu mbi ri ami. Ndji ṋuṋungeye mu mune, orondu ombepo kai nonyama nomaṱupa otja tji mamu munu kutja ami mbi na vyo.”

40 Nu ngunda ama hungire omambo nga, arire tje ve raisire omake we nozombaze ze. 41 Nowo tjinga ava ri nenyando tjinene nava kuminwe, kave yenene okukambura; neye ope ve purira a tja: “Mu novikurya mba?” 42 Owo ve mu pa okandimbu kohi ndja yarekwa, 43 neye wa kambura na ri ngunda amave tarere.

44 Tjazumba arire tja ku wo: “Omambo ngu mbe mu raera, indu tji mba ri puna eṋe, owo nga wokutja avihe mbya tjangerwa ami mOmatwako wa Moses na momatjangwa wovaprofete na mOmapsalme, mavi sokuyenenisiwa.”

45 Nu eye wa paturura ozondunge zawo kutja ve tjiwe omatjangwa, 46 narire tja tja ku wo: “Omatjangwa maye tja: Omutwirisiwa ma sokuhihamisiwa nokupenduka movakoke meyuva oritjatatu, 47 nu mena re ombuze yondanaukiro noyondjesiro yourunde mai sokuzuvarisiwa komihoko avihe, okuutira mOjerusalem.

48 “Nu eṋe oweṋe mbu mu ri ovahongonone voviṋa mbi. 49 Nu purateneye, ami me mu hindire omakwizikiro Tate nga kwizika. Nungwari eṋe kareye motjihuro nga omasa ngu maye zu kombanda tji ye mu zeuparisa.”

Jesus ma rondo keyuru

(Mk 16:19-20Oviu 1:9-11)

50 Jesus we ve pitisire motjihuro ne ve twara nga kObetanie. Nu ingo oka kayerera omake we ne ve sere ondaya. 51 Nu ngunda ame ve sere ondaya nao, arire tja zu po pu wo na toorwa okutwarewa keyuru. 52 Nowo ve rikotamena ku ye nave yaruka kOjerusalem ave nenyando enene. 53 Nu aruhe aave uhara mondjuwo ya Muhona amave hivirike Ndjambi.