Lukas 17 - Herero Revision Bible (HRR)

Omahongero otja kouvi nondjesiro

1 Jesus wa tjere kovahongewa ve: “Oviṋa, mbi putarisa omundu, kamaavi kara avi he ri po, nungwari owee ku ingwi ngu me vi eta! 2 Itja rira kokuwa tjinene ku ye, ewe rotjikweyero tji ra kutwa mosengo ye nu a yumbwa mokuvare, tjinga ama putarisa umwe wa imba ouṱiṱi mba. 3 Ṱakamiseye nawa imbi mbi mamu tjiti.

“Omukweṋu tja tjiti ouvi komurungu woye, mu vera nomambo; nungwari tje ritanaura, mu isira. 4 Nu tja tjiti ouvi komurungu woye potuhambombari meyuva rimwe, nu otjikando atjihe peke a kotoka kove ama tja: ‘Himee yaruka po rukwao,’ mo sokumuisira.”

Omahongero otja kongamburiro

5 Ovaapostele va tjere ku Muhona: “Tu wezira ko ongamburiro.”

6 Muhona wa zirire a tja: “Andakuzu ongamburiro yeṋu i ṱeki pondwi yomuti omumosteri, atja mu hungira komukuyumbwa mbwi amu tja: ‘Zukuka nomize, nu u kahape mokuvare’? Nowo itjau zuva ku eṋe.

Otjiungura tjomukarere

7 “Ngatu tje umwe weṋu u nomukarere ngu taura ehi rotjikunino poo ngu risa ozonyanda. Eye tja zu kotjikunino hapo mo mu raere kutja nge ye tjimanga kotjiriro e yokurya? 8 Kako ka tji pe ri nao! Moruveze rwanao mo mu raere nai: ‘Ṱuna omariro wandje wongurova, tjazumba u kute oruhira nu u ndji karere ngunda ame ri nokunwa, nu tji mba mana, ove arire tji wa ri nokunwa.’ 9 Hapo eye mapeya a tja okunene okuhepa komukarere mena romarakiza nga yenenisa? Me tjangovasi ka tji pe ri. 10 Otjinga pe ri nao na eṋe! Tji mwa yenenisa avihe mbi mwa raerwa, itjeye: ‘Oweṱe ovakarere mbu twa yenenisa imbi mbi tu sokuyenenisa uriri.’ ”

Jesus ma verukisa ovarumendu omurongo mbe nomutjise wongana

11 Jesus tja ri mouyenda kOjerusalem wa varamene omuruko wopokati ka Samaria na Galilea. 12 Nu ngunda ama hiti motjirongo tjorive arire tja tjakanenwa i ovarumendu omurongo, mba ri nomutjise wongana. Owo va kuramene kokure, 13 nave ravaere ave tja: “Jesus, Muhona, tu tjariparera!”

14 Jesus tje ve muna wa tja ku wo: “Twendeye mu keriraise kovapristeri!”

Nowo ngunda amave ka wondja mondjira, arire tji va veruka. 15 Nu umwe wawo tja muna kutja wa veruka, arire tja kotoka ama hivirike Ndjambi neraka enene. 16 Eye we riwisa pehi pozombaze za Jesus na tja okunene okuhepa ku ye. Nomurumendu ngwi wa ri Omusamaria. 17 Nu Jesus wa tja nai: “Mba verukisiwa kava ri ovarumendu omurongo are, nu imba muvyu ve ri pi? 18 Kape na umwe ngwe ya okuhivirika Ndjambi posi yaingwi owozonganda are?” 19 Jesus arire tja tja ku ye: “Sekama u yaruke; ongamburiro yoye ye ku vatere.”

Okuya kwouhona wa Ndjambi

(Mt 24:23-28, Mt 37-41)

20 Ovafarisei tjiva va purire Jesus kutja ouhona wa Ndjambi mau ya ruṋe. Eye wa zirire nai: “Ouhona wa Ndjambi mau ya nokuhina ovisanekero kumautjiukirwa kutja weya. 21 Nu kape na ngu ma tja: ‘Tara, owo mbwi!’ poo ‘tara, owo mbwina!’ Orondu hapo mouatjiri ouhona wa Ndjambi u ri mokati weṋu.”

22 Tjazumba arire tja tja kovahongewa: “Omayuva maye ya eṋe mu mamu zeri okumuna eyuva rimwe uriri romayuva wOmuna wOmundu, nungwari kamaamu ri munu ko. 23 Nu mape kara imba mbu mave tja ku eṋe: ‘Tara, eye ngwi,’ poo ‘Tara, eye ngwina.’ Nungwari amu i ko, nu amu ve kongorere! 24 Otja orutjeno rwombura tjinga aru tjena mevaverwa naru yerisa ro okuza kotjikoro tjimwe nga kotjikwao, Omuna wOmundu otjinga ama kara nao meyuva re. 25 Nungwari rutenga eye ma sokuhihamisiwa tjinene nokuimbirahiwa i omuhoko wa nambano. 26 Nu otja tjinga apa ri momayuva wa Noa, otjinga amape kara nao wina momayuva wOmuna wOmundu. 27 Ovandu avehe aave ri nokunwa, novarumendu novakazendu aave kupasana nga keyuva ndi Noa nda hitire motjitendeze; nomupupo otji we ere nau ve zepa avehe. 28 Notjinga apa ri nao momayuva wa Lot wina. Ovandu avehe aave ri nokunwa, aave randa nokurandisa, aave kunu nokutunga. 29 Meyuva ndi Lot tja zire mo mOsodom, kwa rokere omuriro nozosurungu keyuru, nu avehe arire tji va ṱu. 30 Otjinga amape kara nao meyuva ndi Omuna wOmundu ndi me rimunikisa.

31 “Meyuva ndo omundu ngu ri komututu wondjuwo ngaa heruka okukahita mondjuwo okukatoora oviṋa vye; nu momuhingo tjingewo wina, omundu ngu ri motjikunino ngaa kotoka kondjuwo ye. 32 Zemburukeye kutja pa tjitirwe tjike komukazendu wa Lot! 33 Ngu ma kondjo okuhupisa omuinyo we me u pandjarisa, nu ngu ma pandjarisa omuinyo we ongu me u hupisa. 34 Me mu raere, mouṱuku mbo mamu rara ovandu vevari mombete imwe, nu umwe ma toorwa, nomukwao a isiwa. 35 Ovakazendu vevari mave kweye pamwe ovikokotwa kombako imwe, umwe ma toorwa, nomukwao a isiwa.” 37 Novahongewa va purire Jesus ave tja: “Ku pi, Muhona?”

Eye arire tja ziri a tja: “Ngamwa akuhe ku ku nomutundu ozonguvi oku ze kawongarera.”