Levitikus 6 - Herero Revision Bible (HRR)

1 Nu Muhona wa hungira ku Moses a tja: 2 “Tji pena umwe ngwa tjiti ourunde komurungu wa Muhona mokupanḓa okuyarura otjiṋa omukwao tje mu pa okumuṱakamisira poo mokuvaka otjiṋa tjomukwao poo mokumutjita ovineya 3 poo mokuhoreka otjiṋa tji tja pandjara ama tjiti oruyano rwoposyo kutja ke tji mwine. 4 Neye tja tjiti ourunde momuano auhe mbwi, nga yarure atjihe ngamwa tja muna mokuhina ouatjiri. 5 Meyuva nda munikwa ondjo, nga sute oviṋa avihe vyomuni, nu nga weze ko ozoperesende omirongo vivari. 6 Nga ete onḓu poo ongombo ondume ndji hi notjipo komupristeri i rire ombunguhiro yomasutiro wondjo ku Muhona. Onḓengu yayo ngai tarewe pondondo yomarekeneno nga zikamisiwa. 7 Omupristeri nge mu tjitire ombunguhiro yokuisapo ourunde we; neye otji ma isirwa.”

Ombunguhiro Oningiririsiwa

8 Muhona wa rakiza Moses a tja: 9 “Rakiza kooAron novazandu ve omaraerero wEtwako rombunguhiro oningiririsiwa ndi: Ombunguhiro oningiririsiwa ngai kare mezuko rotjipunguhiro ouṱuku auhe nga komuhuka, nomuriro wotjipunguhiro au zemi ko. 10 Omupristeri nga zare orupera rwe nomburukweva ondimbu yerapi; nu nga uke omutwe wombunguhiro oningiririsiwa kotjipunguhiro e u tirahire meṋe yotjipunguhiro. 11 Tjazumba nga hukure ozombanda ze a zare zarwe, nu nga tware omutwe mbwi pendje yozondanda poṋa popakohoke. 12 Imbwi omuriro kotjipunguhiro ngau yake ongarerere, au zemi ko. Omuhuka auhe omupristeri nga twe ko ozonguṋe komuriro, nu nga ṱune nawa indji ombunguhiro oningiririsiwa ku wo, a ningiririsire ko imbi ovikonyo vyozonḓura zombunguhiro yohange. 13 Omuriro ngau yake ongarerere aruhe kotjipunguhiro; au zemi ko.

Ombunguhiro yOvikurya

14 “Nu etwako rombunguhiro yovikurya oro ndi: Ovazandu va Aron ngave i ete ku Muhona komurungu wotjipunguhiro. 15 Nu umwe wawo nga wote ko eke okuura roruhere orunḓunḓura ndwa rungwa nomaze womiṋinga, novyomoro omuwa avihe vyombunguhiro yovikurya, nu nge vi ningiririsire kotjipunguhiro i rire ombunguhiro yomazemburukiro ku Muhona. Omuṋuko wombunguhiro oningiririsiwa ndji ma u yandja onyuṋe ku Muhona. 16 Nu indwi oruhere ndwa hupu, ngaru riwe i Aron novazandu ve; oro ngaru ungurwe momavanda nge hi nosurise, nowo ngaye rirwe poṋa popayapuke morupanda rwOndanda yOmahakaeneno. 17 Ngaaru terekwa nosurise; ami mbe ve pa otja orukondwa rwozombunguhiro zandje zomuriro. Orwo oruyapuke tjinene tjimuna ombunguhiro yokuisapo ourunde noyomasutiro wondjo. 18 Ovavena avehe vozondekurona za Aron ve nousemba okurya omavanda nga punguhirwa Muhona. Owo omazikamisiro omakarere kozondekurona zeṋu. Ngamwa atjihe tji matji ṱunu komavanda nga matji rire otjiyapuke.”

19 Nu Muhona wa hungira ku Moses a tja: 20 “Meyuva ovazandu va Aron tji mave twirisiwa, nga tjitire Muhona ombunguhiro yoruhere orunḓunḓura okirograma imwe, ohinga imwe yarwo omuhuka, nongwao ongurova. 21 Orwo ngaru rungwe nomaze womiṋinga, nu ngaru terekwe motjiterekero otjipapi; ombunguhiro ndji yovikurya i punguha moutekero i rire ombunguhiro Muhona me nonyuṋe. 22 Ingwi Omupristeri Otjiuru ngu ma toororwa mozondekurona za Aron na twirisiwa moruveze rwe, nga rire ngwe i ṱunu. Noyo aihe ngai ningiririsirwe Muhona. Inga onge ri omazikamisiro omakarerere. 23 Ape ningi okaṋa kombunguhiro yovikurya, ndji mai punguhwa i omupristeri, ku make riwa; aihe ngai ningiririsiwe.”

Ombunguhiro yOurunde

24 Muhona wa hungira ku Moses a tja: 25 “Raera kooAron novazandu ve nu itja: ‘Etwako rombunguhiro yourunde oro ndi: Poṋa pu pe ṱira ovinamuinyo vyombunguhiro oningiririsiwa wina nga rire pu pa ṱire otjinamuinyo tjombunguhiro yokuisapo ourunde komurungu wa Muhona. Oyo ondjapukeyapuke. 26 Omupristeri ngu ma punguha otjinamuinyo tjombunguhiro yourunde, nga rire ngu me tji ri; ngatji rirwe poṋa popayapuke morupanda rwOndanda yOmahakaeneno. 27 Atjihe tji matji ṱunu konyama ndjo matji rire otjiyapuke; nombinḓu tji ya tukire kerapi, ngai koherwe poṋa popayapuke. 28 Nonyungu yomunoko onyama mu ya pire, ngai nyanyaurwe; nungwari tji ya pire monyungu yotjitenda oyo ngai kurwe nu ngai kohwe nomeva. 29 Ovavena avehe momaṱunḓu wovapristeri nga rire mba ri onyama yombunguhiro ndji; oyo ondjapukeyapuke. 30 Nungwari ombinḓu ngamwa aihe ndja etwa mOndanda yOmahakaeneno nu ndja ungurisiwa otjombunguhiro yokuisapo ourunde, ai riwa, ngai ningiririsiwe.’ ”