Levitikus 5 - Herero Revision Bible (HRR)

Ozondjito ozongwao nḓe heperwa Ozombunguhiro zOurunde

1 “Ozombunguhiro zourunde ze heperwa mozondjito nḓa:

“Tjinangara omundu worive wa isanewa okuyandja omahongonona omananḓengu mombanguriro na ha yandja omahongonona waimbi mbya muna poo mbya raerwa, eye omunandjo.

2 “Tjinangara omundu ngamwa wa ṱunu kotjiṋa ngamwa atjihe otjihakohoke mokuhinokutjiwa tjimuna; omutundu wotjipuka tjokuti otjihakohoke poo omutundu wotjinamuinyo tjonganda otjihakohoke poo omutundu wotjinamuinyo otjihakohoke tji tji honahona pehi, nungwari kombunda a tjiwa kutja wa tjiti nao, ma rire omuhakohoke nomunandjo.

3 “Tjinangara omundu ngamwa wa ṱuna kotjiṋa ngamwa otjihakohoke komundu mokuhinokutjiwa, nungwari kombunda a tjiwa kutja wa tjiti nao, ma rire omunandjo.

4 “Tjinangara omundu ngamwa wa yana mokuhinakonatja, kainatja kutja eye wa hungire ohunga notjiṋa kaaṋi ho, nu kombunda a katjiwa, ma rire omunandjo.

5 “Nomundu tja tura ondjo, nge rihepure ourunde we, 6 nu otja omberero ye yourunde nga etere Muhona onḓu poo ongombo ondema otja ombunguhiro. Omupristeri nga tjite ombunguhiro yokuisapo ourunde womundu ngo.

7 “Nungwari omundu tje hi nokuyenena okueta onḓu poo ongombo, nga etere Muhona ozohanda mbari poo ovingutyona vivari vi rire otjisuta tjourunde we; imwe i rire ombunguhiro yokuisapo ourunde nongwao i rire ombunguhiro oningiririsiwa. 8 Eye nge vi ete komupristeri, rutenga a punguhe ihi otjimwe tji rire ombunguhiro yokuisapo ourunde. Notjiuru tjatjo nge tji sotororere mengoti nokuhinokutjipora. 9 Tjazumba nga pemenene ombinḓu tjiva yatjo keṋe yotjipunguhiro; ombinḓu aihe ndja hupu, nge i tirire pehi meṋe yotjipunguhiro. Indji ondji ri ombunguhiro yokuisapo ourunde. 10 Nu ihi otjikwao nge tji punguhe tji rire ombunguhiro oningiririsiwa otja komuhingo mbu kara po. Komuhingo mbwi ingwi omupristeri otji me mu tjitire ombunguhiro yokuisapo ourunde we; neye ma isirwa wo.

11 “Nungwari omundu tje hi nokuyenena okueta ozohanda mbari poo ovingutyona vivari, nga ete okirograma imwe yoruhere orunḓunḓura ru rire ombunguhiro yokuisapo ourunde mbwa tjita. Nu ngaa tirire ko omaze womiṋinga poo okuweza ko ovyomoro omuwa, orondu oyo kambunguhiro yovikurya, nungwari ombunguhiro yokuisapo ourunde. 12 Neye nge ru ete komupristeri a wote mo eke okuura ru rire ombunguhiro yomazemburukiro, e ru ningiririsire kombanda yozombunguhiro zomuriro za Muhona. Indji ondji ri ombunguhiro yokuisapo ourunde. 13 Komuhingo mbwi omupristeri otji ma tjitire omundu ngwi ombunguhiro yokuisapo ourunde, neye otji ma isirwa wo. Noruhere ndwa hupu maru rire orwomupristeri tjimuna tji pe tjitwa pombunguhiro yovikurya.”

Ombunguhiro yOmasutiro

14 Muhona wa hungira ku Moses a tja: 15 “Tji pena umwe ngwa tjiti ourunde mokuhinokuyandja ovisuta mbya yapurirwa Muhona, nga sute onḓu poo ongombo ondume ndji hi notjipo i rire ombunguhiro yomasutiro wondjo ku Muhona. Onḓengu yayo ngai tarewe pondondo yomarekeneno nga zikamisiwa. 16 Neye nga sute otjisuta tjaimbi mbye ha yandjere, nu nga weze ko ozoperesende omirongo vivari. Nu nge vi yandje komupristeri, nu omupristeri nge mu tjitire ombunguhiro yokuisapo ourunde we, neye otji ma isirwa.

17 “Tji pena umwe ngwa tjiti ourunde nu ngwa katuka rimwe romatwako wa Muhona mokuhinokutjiwa, eye omunandjo nu ma vererwa ourunde we. 18 Eye nga ete komupristeri onḓu poo ongombo ondume ndji hi notjipo otja otjisuta tjombunguhiro yomasutiro wondjo. Onḓengu yayo ngai tarewe pondondo yomarekeneno nga zikamisiwa. Nomupristeri nge mu tjitire ombunguhiro yokuisapo ourunde we mbwa tjita mokuhinokutjiwa; neye otji ma isirwa. 19 Indji ondji ri ombunguhiro yomasutiro wondjo ndja tjita ku Muhona.”