Levitikus 4 - Herero Revision Bible (HRR)

Ombunguhiro yourunde mbu hiya tjitirwa wina

1 Muhona wa rakiza Moses a tja: 2 “Raere kOvaisrael kutja ngamwa ngu ha tjitire ourunde wina nu ngwa katukiririre etwako rimwe romatwako aehe wa Muhona na tjiti otjiṋa tjimwe tjaimbyo mbya tjaerwa, mape zikamisiwa nai:

3 “Tjinangara Omupristeri Otjiuru ongwa tjiti ourunde na turisa otjiwaṋa ondjo, nga punguhire Muhona ondwiyona ohinatjipo mena rourunde. 4 Eye nga ete ondwiyona ndji pomahitiro wOndanda yOmahakaeneno, nu nga twe eke re kotjiuru tjayo ne i zepere mbo komurungu wa Muhona. 5 Tjazumba Omupristeri Otjiuru nga wote ko ombinḓu yondwiyona ne i hitise mOndanda yOmahakaeneno. 6 Neye nga tjaveke omunwe we mombinḓu ne i pemenene potuhambombari komukuma wokomurungu werapi etjizikize rOtjouyapuke. 7 Tjazumba nga hwe ombinḓu onḓiṱi kozonya zotjipunguhiro tjokutwimisira ko ovyomoro omuwa tji tji ri komurungu wa Muhona mOndanda yOmahakaeneno; nungwari ombinḓu aihe ndja hupu, nge i tirire pehi meṋe yotjipunguhiro tjozombunguhiro ozoningiririsiwa tji tji ri pomahitiro wOndanda yOmahakaeneno. 8 Eye nga ise ko ozonḓura azehe zondwiyona, ndji mai punguhirwa omauvi, okutja oruehe, nozonḓura azehe zoviṋa avihe vyopehuri. 9 Wina nga ise ko ozosyoti azeyembari puna ozonḓura nḓe ri ku zo na inḓa zokomavango, noruamba ndu ri kehuri. 10 Omupristeri nga toore ozonḓura nḓa e ze ningiririsire kotjipunguhiro tjozombunguhiro ozoningiririsiwa, otja tjimuna tja tjiti kozonḓura nḓa zu kovinamuinyo mbya ṱire ombunguhiro yohange. 11 Nungwari nga toore omukova nonyama aihe, notjiuru nozonyu, noviṋa avihe vyopehuri notjandja, 12 okutja nao nga pitise ondwezu aihe pendje yondanda, poṋa popakohoke pu pe tirahirwa omutwe a rire pe keiningiririsira.

13 “Tjinangara ombongo aihe yOvaisrael ya tjiti ourunde na i tura ondjo yokukatuka rimwe romatwako wa Muhona mokuhinokutjiwa, 14 nourunde mbu ya tjita au tjiukwa, ombongo otji mai eta ondwiyona ndji hi notjipo i rire ombunguhiro yokuisapo ourunde. Noyo ngai i ete komurungu wOndanda yOmahakaeneno. 15 Novanane wombongo ngave twe ko omake wawo kotjiuru tjondwiyona, nu ngai ṱire mbo komurungu wa Muhona. 16 Omupristeri Otjiuru nga hitise ombinḓu onḓiṱi yondwiyona mOndanda yOmahakaeneno, 17 nu nga tjaveke omunwe we mombinḓu me i pemenene potuhambombari komukuma wokomurungu werapi etjizikize. 18 Tjazumba omupristeri nga hwe ombinḓu onḓiṱi kozonya zotjipunguhiro tji tji ri komurungu wa Muhona mOndanda yOmahakaeneno. Ombinḓu aihe ndja hupu, nge i tirire pehi meṋe yotjipunguhiro tjozombunguhiro ozoningiririsiwa tji tji ri pomahitiro wOndanda yOmahakaeneno. 19 Eye nga ise ko ozonḓura azehe ku yo e ze ningiririsire kotjipunguhiro. 20 Nondwiyona ndji nge i tjite otja tji pe tjitwa na indji yombunguhiro yourunde, nu momuhingo mbwi Omupristeri otji ma tjitire ombongo aihe yOvaisrael ombunguhiro yokuisapo ourunde, noyo otji mai isirwa. 21 Tjazumba nga pitise ondwiyona ndji pendje yozondanda e i ningiririse tjimuna indji ondenga. Indji ondji ri ombunguhiro yokuisapo ourunde wombongo.

22 “Nomunane tja tjiti ourunde na tura ondjo yokukatuka rimwe romatwako wa Muhona Ndjambi mokuhinokutjiwa, 23 nourunde mbwa tjita au tjivisiwa ku ye, nga ete ongombo ondwezu, ndji hi notjipo i rire ombunguhiro ye. 24 Neye nga twe eke re kotjiuru tjayo ne i zepere komukuma wokomanene wotjipunguhiro, poṋa ovinamuinyo vyo ozombunguhiro ozoningiririsiwa pu vi ṱira. Indji ondji ri ombunguhiro yokuisapo ourunde. 25 Omupristeri nga tjaveke omunwe we mombinḓu yotjinamuinyo hi ne i hwe kozonya zotjipunguhiro tjozombunguhiro hi, nu ombinḓu aihe ndja hupu, nge i tirire pehi meṋe yotjipunguhiro. 26 Neye wina nga ningiririsire ozonḓura azehe kotjipunguhiro tjimuna inḓa zombunguhiro yohange. Komuhingo mbwi omupristeri otji ma tjitire omunane ngwi ombunguhiro yokuisapo ourunde we, neye otji ma isirwa.

27 “Tjinangara pena umwe wotjiwaṋa ngwa tjita ourunde na tura ondjo yokukatuka rimwe womatwako wa Muhona mokuhinokutjiwa, 28 nourunde mbwa tjita, a tjivisiwa, nga ete ongombo ondema, ndji hi notjipo i rire ombunguhiro ye. 29 Neye nga twe eke re kotjiuru tjayo ne i zepere poṋa pu pe ṱira ovinamuinyo vyozombunguhiro ozoningiririsiwa. 30 Omupristeri nga tjaveke omunwe we mombinḓu yotjinamuinyo hi, e i hwe kozonya zotjipunguhiro tjozombunguhiro ozoningiririsiwa. Nombinḓu ndja hupu, nge i tirire pehi meṋe yotjipunguhiro. 31 Neye nga ise ko ozonḓura azehe tjimuna inḓa zombunguhiro yohange, nomupristeri nge ze ningiririsire kotjipunguhiro kokutja omuṋuko u yandje onyuṋe ku Muhona. Komuhingo mbwi omupristeri otji me mu tjitire ombunguhiro yokuisapo ourunde we, neye otji ma isiriwa.

32 “Nungwari omundu tja eta ondjona otja ombunguhiro yokuisapo ourunde, ngai rire ondema, ndji hi notjipo. 33 Neye nga twe eke re kotjiuru tjayo ne i zepere poṋa pu ṱira ovinamuinyo vyozombunguhiro ozoningiririsiwa. 34 Omupristeri nga tjaveke omunwe we mombinḓu yotjinamuinyo hi, e i hwe kozonya zotjipunguhiro tjozombunguhiro ozoningiririsiwa. Nombinḓu ndja hupu, nge i tirire pehi meṋe yotjipunguhiro. 35 Neye nga ise ko ozonḓura azehe tjimuna inḓa zonḓu yombunguhiro yohange; nomupristeri nge ze ningiririsire kotjipunguhiro tjozombunguhiro puna ozombunguhiro ozoningiririsiwa nḓe yandjwa ku Muhona. Komuhingo mbwi omupristeri otji me mu tjitire ombunguhiro kourunde mbwa tjita, neye otji ma isirwa.