Levitikus 20 - Herero Revision Bible (HRR)

Ozomberero zozongatukiro kOmuhinonḓuviro

1 Muhona wa hungira ku Moses a tja: 2 “Raera kOvaisrael nu itja: ‘Omuisrael ngamwa auhe poo owozonganda ngu ri mokati kOvaisrael, ngu ma yandja omuatje we okuungurisiwa momerikotameneno wa Molek, tjiri, ma sokuṱa, Otjiwaṋa tjehi ndo matji sokumuzepa nomawe. 3 Auhe ngamwa ngu ma yandja omuatje we ku Molek na zunḓa oruveze romerikotameneno rwandje na yamburura ena randje, ami me mu pe etambo nu hi nokumuvara rukwao otja umwe wovandu vandje. 4 Otjiwaṋa tji tji ha ningire ko na tja nomundu ngu ri nao, ngwa yandja omuatje we ku Molek, natji he mu zepa, 5 ami omuini me yandja etambo komundu ngwi neṱunḓu re arihe, puna imba avehe mbe he ri ovaṱakame ku ami nu mbe rikotamena ku Molek. Ami hi nokuvevara otja ovandu vandje rukwao.

6 “ ‘Tji pena umwe ngu me riyandja kozondjai nozombetere nḓe hakaena nozombepo zovaṱi, ami me yandja etambo komundu ngwi nu hi nokumuvara otja umwe wovandu vandje. 7 Riṱizeye ouyapuke, orondu owami ngu mbi ri Muhona, Ndjambi weṋu. 8 Ṱakamiseye omazikamisiro wandje, nu kareye nonḓuviro kuwo. Owami ngu mbi ri Muhona, ngu me mu yapura.

9 “ ‘Auhe ngu ma sengi ihe na ina, tjiri, nga ṱe. Eye ongu ma kara nourizirira wonḓiro ye.

10 “ ‘Tji pe nomundu ngwa tjiti poo ngu ma tjiti oruvakiro kuna omukazendu womukwao, aveyevari, tjiri, ngave ṱe. 11 Omuatje tje rara pu umwe wovakazendu vaihe, okutja wa yamburura ihe. Ovanandjo aveyevari mba, tjiri, ngave ṱe. Owo mave kara nourizirira wonḓiro yawo. 12 Nomurumendu tja rara pomukazendu womuzandu we, aveyevari, tjiri, ngave ṱe. Owo va tjiti otjiṋa otjiyaukise, nowo mave kara nourizirira wonḓiro yawo. 13 Omurumendu tja rara pomurumendu omukwao, aveyevari va tjiti otjiṋa otjiyaukise. Owo, tjiri, ngave ṱe. Owo mave kara nourizirira wonḓiro yawo. 14 Nomurumendu tja kupu omukazendu puna ina yomukazendu ngo, indji ondjito yohoṋi; motjimbe tja nao, eye novakazendu mba aveyevari ngave ningiririsiwe momuriro. Ondjito otja indji ai ha kara mokati keṋu. 15 Omurumendu tja tunduka kotjinamuinyo, tjiri, nga ṱe, notjinamuinyo wina ngatji ṱe. 16 Nomukazendu tja ryama popezu notjinamuinyo kutja tji tunduke ku ye, eye, tjiri, nga ṱe pamwe notjinamuinyo ho. Owo mave kara nourizirira wonḓiro yawo.

17 “ ‘Omurumendu tja kupu omuṱena, omuatje wa ihe poo waina, indji ohoṋi. Aveyevari ngave yambururirwe momeho wotjiwaṋa, nu ngave kondwe kotjiwaṋa tjawo. Eye wa rara pomuṱena, okutja wa rira omunandjo. 18 Nomurumendu tja rara pomukazendu ngu ri komayuva we woukazendu, aveyevari ngave kondwe kotjiwaṋa tjawo, owo tjinga ava katuka omatwako wouhakohoke.

19 “ ‘Omurumendu tja rara perumbi poo pomuangu waina poo pomuṱena wa ihe, aveyevari mave rire ovanandjo; orondu owo ovotjikutu tjimwe. 20 Nomurumendu tja rara pomukazendu werumbi poo womuangu wa ihe, nu wa yamburura ihe; eye nomukazendu ngwi mave tura ondjo, nu kape na umwe wawo ngu ma munu ovanatje. 21 Omurumendu tja kupu omukazendu werumbi poo womuangu we, mave ṱu nokuhinovanatje, okutja nao ondjambu mombinḓu; eye wa yamburura erumbi poo omuangu we.

22 “ ‘Ṱakamiseye omazikamisiro nomaraerero wandje aehe, kokutja indi ehi ami ku me mu twara okukatura mu ro, ari he mu imbirahi. 23 Amu ryanga momazikamisiro wotjiwaṋa ami tji me ramba komurungu weṋu, orondu otjo tje ndji yaukisa noviṋa mbi avihe ovivi; ami opu mba za okutjinyengwa. 24 Nungwari ami mba tja nai ku eṋe: “Mamu kambura ehi rawo, nami me ri yandja ku eṋe ri rire ouini weṋu, ehi nde ura nomaihi nouitji wokuti.” Owami ngu mbi ri Muhona, Ndjambi, weṋu, ngu mbe mu yapura peke koviwaṋa. 25 Opu mwa pu okutjita ombangu pokati kovinamuinyo ovikohoke novihakohoke, na pokati kozonḓera ozohakohoke nozongohoke; nu amu rizunḓa oveni novinamuinyo nozonḓera, noupuka ngamwa auhe mbu honahona kombanda yehi, mbu mba twa peke kutja mu u vare otja ouhakohoke. 26 Rireye ovayapuke ku ami, orondu ami, ngu mbi ri Muhona, owami omuyapuke; nu ami mbe mu yapura peke koviwaṋa mu kare ovandje.

27 “ ‘Tji pena omurumendu poo omukazendu ondjai ngu hakaena nozombepo zovaṱi, tjiri, eye nga ṱe. Eye nga ṱe nomawe. Nomundu ngwi ma kara nourizirira wonḓiro yawo.’ ”