Ouyapuke wombinḓu
1 Muhona wa rakiza Moses kutja, 2 a raera Aron novazandu ve nOvaisrael avehe kutja omarakiziro wa Muhona nga. 3 Ngamwa auhe wOvaisrael ngwa zepere ongombo poo onḓu mozondanda poo pendje, 4 ne he i eta pomahitiro wOndanda yOmahakaeneno okuipunguhira Muhona, komurungu wOndanda yOmahakaeneno, omundu ngwi ma varwa omunandjo wokutirahi ombinḓu; omundu ngwi nga kondwe kotjiwaṋa tjawo. 5 Omaheero womarakiza nga owokutja Ovaisrael ve etere Muhona ovinamuinyo vyawo vyombunguhiro, mbi va iririra okuzepera mouhaiya wokuti. Nambano ngave vi ete komupristeri pomahitiro wOndanda yOmahakaeneno, ve vi zepe otja ozombunguhiro zohange. 6 Tjazumba omupristeri nga pemenene ombinḓu keṋe yotjipunguhiro tja Muhona pomahitiro wOndanda yOmahakaeneno, nozonḓura nge ze ningiririse ze tjite omuṋuko omuwa ku Muhona. 7 Ovaisrael kave tji nokupunguhira ozombepo ozohakohoke nḓu ve karera ovinamuinyo vyawo vyozombunguhiro. Omarakiza nga ngaye rire omakarerere kozondekurona zawo.
8 Ngamwa Omuisrael auhe poo owozonganda ngu ri mokati kawo, ngu ma eta ombunguhiro oningiririsiwa poo otjiyambo tjotjinamuinyo tjombunguhiro, 9 ne he tji eta pomahitiro wOndanda yOmahakaeneno okutjipunguhira Muhona, omundu ngwi nga kondwe kotjiwaṋa tjawo.
10 Omuisrael ngamwa auhe poo owozonganda ngu ri mokati kawo, ngu ma ri ombinḓu yangamwa otjiṋa, ami me mu pe etambo ne mu kondo kotjiwaṋa tjawo. 11 Orondu omuinyo wotjinamuinyo atjihe u ri mombinḓu. Punao Muhona indji ombinḓu ope i yandjera ku eṋe mu tjitire na yo ominyo vyeṋu ombunguhiro yokuisapo ourunde wovandu, ombinḓu tjinga ai isapo ourunde mena romuinyo mbu ri mu yo. 12 Ami opu mba zu okutja kOvaisrael: “Ape ningi omundu mokati keṋu ngu ma ri ombinḓu yangamwa otjiṋa, nandarire owozonganda ngu ri puna eṋe.”
13 Omuisrael ngamwa auhe poo owozonganda ngu ri mokati kawo ngu ma kambura otjipuka tjokuti poo onḓera mbya pu pokuriwa, nga zizisire ombinḓu yatjo pehi, ne i sire nehi. 14 Orondu omuinyo wotjinamuinyo ngamwa atjihe u ri mombinḓu. Ami opu mba za okutja nai kOvaisrael: “Amu ri ko ombinḓu yangamwa onyama, omuinyo wotjinamuinyo ngamwa atjihe tjinga au ri mombinḓu; auhe ngu me i ri nga kondwe kotjiwaṋa tjawo.”
15 Omuisrael ngamwa auhe poo owozonganda ngu ma ri onyama yotjinamuinyo tji tje rikokere poo tji tja ṱu i ovipuka ovinyondorore nga kohe ozombanda ze nu nge rikohe morutu; neye ma kara omuhakohoke nga kongurova, tjazumba otji ma rire omukohoke. 16 Nu tje hi nokutjita nao ma tura ondjo.
© Herero Revision Bible © Bible Society in Namibia, 2021.
