Levitikus 11 - Herero Revision Bible (HRR)

Ovinamuinyo mbi mavi sokuriwa

1 Muhona wa yandja omazikamisiro nga ku Moses na Aron na tja ku wo: 2 “Otjiwaṋa tjOvaisrael tji raera nai: ‘Ovinamuinyo mbi ri kombanda yehi, nu mbi mamu sokurya ovyo mbi 3 mbi noviryo vine, nu mbi yoora. 4 Nungwari kamu nakusokurya Ongamero, orondu i yoora, nungwari kai nomiapi; i vareye ohakohoke; 5 nOhere, orondu i yoora, nungwari kai nomiapi; i vareye ohakohoke; 6 nOmbi, orondu i yoora, nungwari kai nomiapi; i vareye ohakohoke; 7 nandarire Ombinda wina, i vareye ohakohoke. 8 Onyama yovinamuinyo mbi amu ri ko, nu amu ṱunu komitundu vyavyo; vi vareye ovihakohoke.

9 “ ‘Mamu yenene okurya omuhoko ngamwa auhe wozohi nḓe novivava novikotji, 10 nungwari otjinamuinyo atjihe tjo momeva nu tji tji hi novivava novikotji, amu ri ko. 11 Ovinamuinyo otja imbyo vi vareye ovihakohoke nu onyama yavyo amu ri ko, nomitundu vyavyo amu ṱunu ko. 12 Avihe, mbi kara momeva nu mbi hi novivava novikotji, amu ri ko.

13 “ ‘Amu ri ko ozonḓera otja inḓa: Orukoze, nondjimbi, notjikuvikoze, nonguvi, 14 notjimbirinyama, 15 nekwara otja komihoko vyaro; 16 nombo, notjisiwi, nokakwaya kokuvare, 17 notjisiwi tjomawe, nonḓera yozohi, nondjimbi; 18 notjisiwi otjikeṋakeṋe, nonḓera yomuronga, nokanguvi; 19 nendongo, nonḓera yatjihongo otja komihoko vyayo, nondondamiti, nondiripuku.

20 “ ‘Oupuka auhe mbu novivava u vareye ouhakohoke, 21 pendje na imbwi mbu noviryo ovitukise okutukatuka na vyo pehi. 22 Mamu yenene okurya ozombahu otja komihoko vyazo, okutja ombahu ndji kayenda, nombahu yomokuti, nombahu ndji tuka, nombahu ndji honahona. 23 Nungwari oupuka auhe ouṱiṱi nounavivava, nu mbu honahona koviryo, vi vareye ovihakohoke.

24 “ ‘Novipuka mbi mavi tjiti kutja mu rire ovahakohoke; auhe ngwa ṱunu komitundu vyavyo ma rire omuhakohoke nga kongurova. 25 Nu auhe ngu ma tjindi okaṋa komitundu vyavyo, nga kohe ozombanda ze; nungwari eye ma rire omuhakohoke nga kongurova. 26 Ovinamuinyo avihe mbi nomiapi, nungwari mbi ha pamburukire tjinene, nu mbi yoora, ovyo ovihakohoke; auhe ngu ma ṱunu ku vyo ma rire omuhakohoke. 27 Ovinamuinyo avihe ovinaviryo vine, nu mbi kawondjera komangaha, ovyo ovihakohoke; auhe ngu ma ṱunu komitundu vyavyo ma rire omuhakohoke nga kongurova. 28 Nu wina auhe ngu ma tjindi omitundu vyavyo, nga kohe ozombanda ze; nungwari eye ma rire omuhakohoke nga kongurova. Ovyo vi vareye ovihakohoke.

29 “ ‘Noupuka mbwi u vareye ouhakohoke: Ohukuha, nEpuku, nOtjikoko otja komihoko vyatjo, 30 nOkaṱahoṋi, nOkanyengerere, nOtjiṱurukuhu, nOtjikamanyuru, nEsembi. 31 Auhe ngu ma ṱunu ku vyo tji vya koka ma rire omuhakohoke nga kongurova. 32 Nu avihe ku kwa wire omutundu wa tjimwe tjavyo mavi rire ovihakohoke, okutja otjiṋa atjihe otjiungurwa tjopomuti poo ombanda poo omukova poo ekutu poo otjiṋa ngamwa atjihe omundu tje ungura na tjo; otjo ngatji tuwe momeva, nungwari matji rire otjihakohoke nga kongurova; tjazumba otji matji rire otjikohoke. 33 Nu onyungu aihe yomunoko mu mwa wire tjimwe tjavyo, avihe mbi ri mu yo, mavi rire ovihakohoke, neṋe i nyainyee. 34 Nu ovikurya ngamwa avihe mbi mavi pu okuriwa, nu tji kwa tirirwa omeva ngu maye zu monyungu ndjo, mavi rire ovihakohoke. 35 Noviṋa avihe ku kwa wire omitundu vyavyo mavi rire ovihakohoke, kutja ezuko rozomboroto poo kutja ezuko uriri ngari nyanyaurwe; ovyo ovihakohoke, nu ngavi kare ovihakohoke. 36 Nungwari oruharwi nondjombo notjitoma tjomeva mavi rire ovikohoke. Ngamwa auhe ngu ma ṱunu komutundu wotjinamuinyo tji tja wire mo ma rire omuhakohoke. 37 Nomutundu umwe wavyo tji wa wire kombanda yondwi ngamwa aihe ndji mai kunwa, oyo mai kara ongohoke. 38 Nungwari tji kwa tirirwa omeva kombanda yondwi, nu tjazumba omutundu umwe wavyo au wire kombanda yayo, oyo mai rire ohakohoke.

39 “ ‘Tji pa koka otjinamuinyo tjimwe otjiriwa, ingwi ngwa ṱunu komutundu watjo ma rire omuhakohoke nga kongurova. 40 Nu ingwi ngu ma ri onyama yatjo, nga kohe ozombanda ze; nungwari ma rire omuhakohoke nga kongurova.

41 “ ‘Oupuka auhe ouṱiṱi mbu honahona pehi, amu ri ko, 42 kutja u kunguzuka kezumo, poo u kayenda koviryo vine, poo koviryo ovingi. 43 Amu rizunḓa oveni mokurya oupuka ngamwa auhe mbu nyangatara. 44 Orondu owami Muhona, Ndjambi weṋu. Eṋe mwa yapurwa nu mwa rira ovayapuke, ami tjinga ambi ri omuyapuke; notji mu hi nakusokurizunḓa oveni noupuka ngamwa auhe mbu honahona pehi. 45 Owami Muhona ngu mbe mu tjindisa mehi ra Engipte okurira Ndjambi weṋu. Rireye ovayapuke, ami tjinga ambi ri omuyapuke.

46 “ ‘Inga onge ri omatwako otja kovipuka na kozonḓera, na kovinamuinyo avihe mbi kara momeva, na kovinamuinyo avihe mbi nyangatara kombanda yehi. 47 Omazikamisiro nga maye mu tjiti kutja mu sore okuhaṋa pokati kouhakohoke noukohoke, na pokati kovipuka mbya pwa okuriwa novipuka mbi ha pwire okuriwa.’”