Omawiro wa Jeriko
1 Omivero vya Jeriko vya paterwe nu aavi tjeverwa kutja Ovaisrael ave ha yenene okuhita motjihuro. Kape nomundu ngwaa sora okuhita nokupita mu tjo. 2 Muhona wa tja ku Josua: “Tara, ami me yandja Jeriko nombara yatjo novarwe vatjo omapenda mouvara woye. 3 Ove novarwe voye wovita kondorokeye otjihuro hi otjikando tjimwe eyuva arihe oure womayuva hamboumwe. 4 Ovapristeri hambombari, auhe wawo nga toore ohiva ndja ungurwa ponya yondwezu yonḓu, nu ngave kayende komurungu wOtjipwikiro tjOmerikutiropamwe. Nungwari meyuva oritjahambombari kondorokeye otjihuro potuhambombari, novapristeri ngave tone ozohiva. 5 Eṋe tji mwa zuu ovapristeri tji mave posisa ombosiro imwe onde yozohiva, otjiwaṋa ngatji tjite ondavaerero onene, norumbo rwotjihuro otji maru wire pehi, nomurumendu auhe otji ma kayenda osemba okuhita motjihuro.”
6 Josua, omuzandu wa Nun, wa isana ovapristeri na tja ku wo: “Tooreye Otjipwikiro tjOmerikutiropamwe, nu hambombari veṋu ngave kayende momurungu watjo ave nozohiva nḓa ungurwa pozonya zozondwezu zozonḓu.” 7 Neye wa rakiza nai kotjiwaṋa: “Kaendeye! Kondorokeye otjihuro. Ovarwe wovita ngave kawondje momurungu wOtjipwikiro tjOmerikutiropamwe wa Muhona.”
8 Nu Josua punga e ve rakiza, ovapristeri hambombari va ka wondja komurungu wOtjipwikiro tjOmerikutiropamwe wa Muhona amave tono ozohiva zawo. 9 Ovarwe wovita va kayenda komurungu wovapristeri mbaa ve tono ozohiva, novatjevere vokombunda ave kongorere Otjipwikiro tjOmerikutiropamwe. Oruveze aruhe tjandje ozohiva maze posisiwa. 10 Nungwari Josua wa tjaera otjiwaṋa kutja atji ha ravaere poo atji ha tjiti ombosiro nga eye tji meve rakiza okutjita nao. 11 Eye wa hinda ovapristeri nOtjipwikiro tjOmerikutiropamwe wa Muhona ve kakondoroke otjihuro otjikando tjimwe. Okuza ngo owo va kotoka kozondanda nave rara mbo.
12 Mependukirwa Josua wa penduka omuhuka omunene; novapristeri va toora Otjipwikiro tjOmerikutiropamwe wa Muhona. 13 Ovapristeri hambombari, mba ri nozohiva, va kayenda komurungu amave tono ozohiva aruhe. Nu imba ovarwe wovita va ka wondja komurungu wawo, ovatjevere vokombunda ngunda amave kongorere Otjipwikiro tjOmerikutiropamwe wa Muhona. Oruveze aruhe tjandje ozohiva maze posisiwa. 14 Norukwao meyuva oritjavari va kondoroka otjihuro otjikando tjimwe nave kotoka kozondanda. Notji va tjita nao oure womayuva hamboumwe.
15 Nu meyuva oritjahambombari va penduka menyunguhuka nave kondoroka otjihuro potuhambombari momuano otjingewo. Indi onda ri eyuva ariyerike, ndi va kondoroka otjihuro potuhambombari. 16 Nu mokukondoroka otjikando hi otjitjahambombari ovapristeri otji va tona ozohiva, nu Josua otja rakiza kotjiwaṋa ama tja: “Toneye ombimbi! Orondu Muhona me mu pe otjihuro hi! 17 Otjihuro na atjihe tji tji ri mu tjo ngavi yandekwe oparukaze vi rire ombunguhiro ku Muhona. Posi yaingwi omukorondu Rahab erike nonganda ye ombu mave yamwa, orondu eye wa ṱarisire ozohoze zetu. 18 Nungwari eṋe rikarekeye kokure naimbi mbi mavi nyonwa. Tji mwa toora tjimwe tjaimbi mbi mavi nyonwa, mamu eta oumba nonyonokero kozondanda zOvaisrael. 19 Notjiṋa atjihe tji tja ungurwa posilveri nongoldo nongoporo notjitenda matji pwikirwa Muhona. Novyo ngavi tuwe motjipwikiro tjovihuze vya Muhona.”
20 Komuhingo mbwi ovapristeri va tona ozohiva. Nu kamanga otjiwaṋa tji tje ze zuva otji tja tona ombimbi, norumbo rwotjihuro arire tji rwa wire pehi. Notjiwaṋa atjihe tja ka wondja osemba okuhita motjihuro natji tji huura. 21 Nowo va zepa omundu ngamwa auhe motjihuro ho nomangaruvyo wawo, omurumendu nomukazendu nomutanda nomukurundu. Wina va zepa ozongombe nozonḓu nousino.
22 Nu Josua wa raera kovarumendu vevari mba, mba ri ozohoze, a tja: “Hiteye mondjuwo yomukorondu, nu mu pitise omukazendu ngo nomuhoko we pendje otja tji mwa kwizikire ku ye.” 23 Nowo arire tji va kapitisa Rahab puna ihe na ina novaṱena nomuhoko we auhe. Owo va toora avehe, eṱunḓu novakarere, nave ve twara pendje yozondanda zOvaisrael. 24 Tjazumba va hwika otjihuro noviṋa avihe mbya ri mu tjo posi yoviṋa mbya ungurwa pongoldo nosilveri nongoporo notjitenda ombi va toora nave vi twa motjipwikiro tjovihuze vyondjuwo ya Muhona. 25 Nungwari Josua wa yama omuinyo womukorondu Rahab novyovazamumwe ve avehe, orondu Rahab tja ṱarisire ovahindwa, mba tuminwe i Josua kutja ve kahore Jeriko. Ozondekurona ze za tura mOisrael nga ku ndinondi.
26 Moruveze ndo Josua wa yanisa otjiwaṋa nomambo nga: “Auhe ngu ma kondjo okutungurura Jeriko ma sengwa i Muhona.
Ngu ma ziki ewe romazikameno watjo ma zepaisa omuzandu everi re;
nu ngu ma tungu omivero vyatjo ma zepaisa ongero ye.”
27 Muhona otja kara puna Josua, nondangu ya Josua ya tandavara mehi arihe.
© Herero Revision Bible © Bible Society in Namibia, 2021.
