Josua ma hungire notjiwaṋa mOsikem
1 Josua wa woronganisira omihoko avihe vya Israel mOsikem. Eye wa isana ovanene novanane novapangure novahongore vOvaisrael; nowo ve ya komurungu wa Ndjambi. 2 Josua wa tja nai kotjiwaṋa atjihe: “Muhona, Ndjambi wa Israel, ma tja nai: ‘Rukuru tjinene ooiho mukururume va turire munda mbwina yonḓonḓu Eufrat nu ave rikotamene koomukuru vovisenginina. Umwe wooiho mukururume mbo wa ri Terak, ihe ya Abraham na Nahor. 3 Nu ami mba toora iho mukururume Abraham mehi, ndi ri munda mbwina na Eufrat, ne mu tuurungisa ehi arihe ra Kanaan. Mbe mu pa Isak nozondekurona ozengi. 4 Isak wina mbe mu pa Jakob na Esau, nu Esau mbe mu pa ehi rozondundu ra Seir ri rire ouini we; nungwari iho mukururume Jakob novanatje ve va ya kOengipte. 5 Kombunda yanao mba hinda Moses na Aron ne eta oumba ounene kOengipte mokutjita ovihimise mokati kawo. Nu ami mbe mu pitisa mehi ndi. 6 Mba pitisa ooiho mukururume mOengipte, nowo va ya kOmuronga wOtuu. NOvaengipte ve ve tezera nomatemba wovita novakavire voukambe nga komuronga mbwi. 7 Nooiho mukururume va kwa ombatero ku ami mozongumbiro zawo, nami mba twa po onḓorera pokati kawo nOvaengipte. Mba pupisa omeva womuronga kombanda yOvaengipte, nowo ye ve vandeka. Eṋe mwa muna imbi mbi mba tjita kOvaengipte.
“ ‘Tjazumba mwa tura orure tjinene mokuti onguza. 8 Ami otji mbe mu eta mehi rOvaamori, mba turire komukuma wokomuhuka wa Jordan. Owo ve mu rwisa, nami mbe mu pa outoṋi kombanda yawo. Eṋe mwa huura ehi rawo; nu tji mwe ya, ami mbe ve nyona. 9 Nu Balak, ombara yOvamoab, omuzandu wa Sipor, we mu rwisa. Eye wa hinda ombuze ku Balaam, omuzandu wa Beor, kutja a senge eṋe. 10 Nungwari ami hi puratenene ku Balaam, neye otja ṱokumusera ondaya, nami otji mba yama eṋe momake wa Balak. 11 Eṋe mwa konda onḓonḓu Jordan namu kavaza kOjeriko. Novature va Jeriko ve mu rwisa, nandarire Ovaamori nOvaperesi nOvakanaan nOvahetite nOvagirgasi nOvahevi nOvajebusi. Nungwari ami mbe mu pa outoṋi kombanda yawo avehe. 12 Eṋe tji mwa ryama, ami mbe ve urumisa, kokutja mbi rambe ozombara nḓa mbari zOvaamori. Omangaruvyo nomauta weṋu kaye notjiṋa tji ya tjita. 13 Ami mbe mu pa ehi, ndi mu hi na mwa ungurire, novihuro mbi mu hi na mwa tungire. Nambano mwa tura mu vyo, nu mu rya omandjembere komivite nozoṋinga komiṋinga, mbi mu ha kunine.
14 “ ‘Nambano rikotameneye ku Muhona, nu mu karereye nouṱakame. Iseye oomukuru vovisenginina ooiho mukurume kaave rikotamene mOmesopotamie na mOengipte, nu karereye Muhona erike. 15 Eṋe tji mu hi nombango okukarera Muhona rimaneye ndinondi kutja mamu vanga okukarera uṋe, kutja oomukuru vovisenginina ooiho mukururume kaave rikotamene mOmesopatamie, poo kutja owo mba vOvaamori vehi eṋe nambano mu mwa tura. Nungwari ami nonganda yandje matu karere Muhona.’ ”
16 Notjiwaṋa tja zira atji tja: “Eṱe kamaatu isa Muhona, nu kamaatu karere oomukuru varwe vovisenginina. 17 Muhona, Ndjambi wetu, ongwa pitisire ootate na eṱe mouhuura mehi ra Engipte, nu eṱe twa muna ovihimise ovinene mbya tjita. Eye we tu yama ngamwa akuhe ku twa ire, mokati koviwaṋa mu twa tuurungire. 18 Eṱe tji twe ya mehi ndi, Muhona wa ramba oviwaṋa avihe mbi, nOvaamori wina mba turire mwi. Eṱe wina opu matu vangere okukarera Muhona; eye onguri Ndjambi wetu.”
19 Josua wa tja nai kotjiwaṋa: “Kamu nokuyenena okukarera Muhona. Eye oNdjambi omuyapuke nomunaukoze, nu ke nokumuisira ozongatukiro nourunde weṋu. 20 Tji mwa isa Muhona namu karere oomukuru vovisenginina, eye ma tanaukire mu eṋe ne mu vere. Eye me mu nyono, nandarire kutja rutenga wa ri nawa na eṋe.”
21 Otjiwaṋa arire tji tje mu ziri atji tja: “Kako! Eṱe matu karere Muhona.”
22 Josua wa tja nai ku wo: “Eṋe oweṋe ovahongonone veṋu oveni, kokutja mwe ritoororera okukarera Muhona.”
Nowo va zira nai: “Ii, oweṱe ovahongonone.”
23 Nu Josua wa rakiza a tja: “Iseye mo oomukuru vovisenginina mbe ri mokati keṋu nu mu yandje ondengero ku Muhona, Ndjambi wa Israel.”
24 Nungwari otjiwaṋa tja tja nai ku Josua: “Eṱe matu karere Muhona, Ndjambi wetu, nu matu kara nonḓuviro komaraerero we.”
25 Josua otja tjitira otjiwaṋa omerikutiropamwe meyuva ndo. Eye we ve pa omazikamisiro nomaraerero mOsikem. 26 Eye wa tjanga omaraerero nga mEmbo rOmatwako wa Ndjambi. Eye wa toora ewe enene ne ri ziki mbo, kehi yomumbonde mbwa ri poruveze romerikotameneno rwa Muhona. 27 Josua wa tja nai kotjiwaṋa atjihe: “Tareye, ewe ndi oro mari rire ehongonone retu. Oro ra zuu omambo aehe Muhona nga hungirire ku eṱe. Otji mari mu hongonona, ari mu tjaere kutja amu ha pataṋa Ndjambi weṋu.” 28 Josua arire tja raere kotjiwaṋa kutja tji yaruke, nu auhe wa yaruka korukondwa rwehi re omuini.
Josua na Eleasar mave koka
29 Kombunda yanao, Josua, omukarere wa Muhona, nu ngwa ri omuzandu wa Nun, wa koka e notjiwondo tjozombura esere nomurongo. 30 Owo ve mu paka mehi re omuini mOtimnat-Serak mehi rozondundu ra Efraim komukuma wokeyuva kokunene kwondundu Gaas.
31 Otjiwaṋa tja Israel tja karera Muhona, Josua ngunda a ri nomuinyo; nu kombunda yonḓiro ye owo va kara pokukarera Muhona, imba ovanane mbaa ve tjiwa oviṋa avihe mbya tjita ku Israel ngunda ava ri nomuinyo.
32 Inga omaṱupa wa Josef, nga etererwa i Ovaisrael okuza kOengipte ya pakwa mOsikem morukondwa rwehi ndwa randerwe i Jakob kovazandu va Hamor, ihe ya Sikem, kovimariva ovisilveri esere rimwe. Nu ehi ndi ra rumatwa i ozondekurona za Josef.
33 Wina Eleasar, omuzandu wa Aron, wa koka na pakwa mOgibea, otjirongo tjomuzandu we Pinhas, tji tja yandjerwe ku ye mehi rozondundu ra Efraim.
© Herero Revision Bible © Bible Society in Namibia, 2021.
