Josua 22 - Herero Revision Bible (HRR)

Josua ma yarura omihoko vyokomuhuka kozoyawo

1 Josua wa woronganisa ovandu vomuhoko wa Ruben nowa Gad nowa Manasse wokomuhuka. 2 Eye we ve raera a tja: “Eṋe mwa tjita oviṋa avihe Moses, omukarere wa Muhona, mbye mu raera, nu mwa kara nonḓuviro komarakiza wandje aehe. 3 Oruveze aruhe ndwi kamu na pu mwa isa Ovaisrael ovakweṋu. Mwa kara nonḓuviro komarakiza wa Muhona, Ndjambi weṋu, nouṱakame. 4 Nambano Muhona, Ndjambi weṋu, wa yandja ohange kOvaisrael ovakweṋu otja tja kwizikire. Opu mamu sokuyaruka kehi, ndi mwe rikamburira ri rire ouini weṋu, ehi, ndi ri munda mbwina na Jordan, ndi mwa pewa i Moses, omukarere wa Muhona. 5 Tjiri, kareye nonḓuviro komaraerero ngu mwa pewa i Moses, ngu maye tja nai: Suvereye Muhona, Ndjambi weṋu, nu mu tjite ombango ye; kareye nonḓuviro komatwako we, nu muṱakame mu ye, nu mu karereye nomitima nominyo vyeṋu avihe.” 6 Josua we ve sera ondaya ne ve esa kutja ve yende. Nowo va yaruka kozoyawo.

7 Moses wa yandjere ehi mObasan korumbembera rumwe romuhoko wa Manasse, nungwari indwi orukwao wokongurova kwa Jordan puna omihoko vyarwe. Nu Josua wa yarura ovandu kozonganda zawo nondaya ye, 8 ame ve raere nai: “Yarukeye kozoyeṋu noutumbe ouingi, okutja ovinamuinyo ovingi, nosilveri nongoldo nongoporo novitenda, nozombanda ozengi. Imbi mbi mwa huura kovanavita na eṋe kahaṋasaneye nOvaisrael ovakweṋu.”

9 Nu imba ovandu vomuhoko wa Ruben nowa Gad nowa Manasse wokomuhuka va yaruka kozoyawo. Va isa otjihupe tjOvaisrael mOsilo mehi ra Kanaan nave i kehi rawo oveni, indi ehi ra Gilead, ndi va kamburire otja Muhona pa rakizire ku Moses.

Otjipunguhiro tji tja tungwa pOjordan

10 Imbwi omuhoko wa Ruben nowa Gad nowa Manasse wokomuhuka tji vya vaza kOgelilot, tji tji ri meṋe ya Jordan, komunda wa Kanaan, va tunga otjipunguhiro otjinene notjihimise, imbo ponḓonḓu. 11 Ihi tja zuvaka kOvaisrael. Nowo va ravaera ave tja: “Purateneye! Ovandu vomuhoko wa Ruben nowa Gad nowa Manasse wokomuhuka va tunga otjipunguhiro mOgelilto komunda wetu wa Jordan.” 12 Ovaisrael tji va zuva nai, otjimbumba atjihe otji tja woronganena mOsilo kutja tji hinge ovita kuna omihoko vyokomuhuka.

13 Ovaisrael va hinda Pinhas, omuzandu womupristeri Eleasar, kovandu vomuhoko wa Ruben nowa Gad nowa Manasse wokomuhuka mehi ra Gilead. 14 Ovanane omurongo va ya puna Pinhas, okutja omunane umwe momuhoko auhe wa Israel; nu auhe wa ri otjiuru tjeṱunḓu ronganda aihe mOisrael. 15 Owo tji va vaza kOgilead va tja nai kovandu va Ruben nOvagad nOvamanasse: 16 “Ombongo aihe ya Muhona mai tja nai ku eṋe: ‘Okutjavi tji mu ha ri nouṱakame ku Ndjambi wa Israel? Eṋe mwa pirukira Muhona tji mwe ritungira otjipunguhiro; nambano mwa poka ku ye. 17 Kamu nokuzemburuka ourunde wetu mbu twa tjita mOpeor, indu Muhona tja verere ovandu ve nomutjise omuzeu are? Nga ndinondi inga tu hihamisiwa i ouvi mbwi. Ouvi mbwi hapo kapuwo are? 18 Eṋe nambano mamu panḓa okukongorera Muhona are? Tji mamu pirukire Muhona ndinondi, eye muhuka ma ṱomazenge nombongo aihe ya Israel. 19 Ehi reṋu tji ri ri ehakohoke okurikotamena mo ku Muhona, kondeye kehi ra Muhona ku ku nOndanda yOmahakaeneno we. Ritoororereye ehi mokati keṋu; nungwari amu pirukire Muhona, nu amu tu nanene mokupirukira ye, amamu ritungire otjipunguhiro tjarwe posi yotjipunguhiro tja Muhona, Ndjambi wetu. 20 Zemburukeye Akan, omuzandu wa Serak, tje ha ri nonḓuviro komarakiza, nga tjaera oviṋa mbya imbirahiwa konyoneno! Ombongo aihe ya Israel ya vererwa oviṋa mbi momazenge wa Muhona. Ka Akan erike ngwa tira ouvi we.’ ”

21 Ovandu vomuhoko wa Ruben nowa Gad nowa Manasse wokomuhuka va zira nai koviuru vyomaṱunḓu womihoko vya Israel: 22 “Ndjambi eye omunamasa! Eye onguri Muhona! Ndjambi eye omunamasa! Eye onguri Muhona! Eye ma tjiwa kutja twa tjitira tjike nai, neṱe matu vanga kutja eṋe wina mu tjiwe. Ndoovazu twa pirukira Muhona natu ha ṱakama mu ye, eye e tu yama ko okuza ku ndinondi; 23 nu ndoovazu twa kara nokuhinonḓuviro ku Muhona mokuritungira otjipunguhiro tjetu oveni okupunguhira ko ozombunguhiro ozoningiririsiwa poo zovikurya poo zohange, Muhona omuini nga rire ngwe tu vere. 24 Kako! Eṱe twa tjita nao, tjinga atwa tira kutja kombunda ozondekurona zeṋu maze katja nai ku inḓa ozetu: ‘Eṋe mu na ko na tjike na Muhona, Ndjambi wa Israel? 25 Muhona wa twa po onḓonḓu Jordan i rire omuruko pokati ketu na eṋe, imba ovandu vomuhoko wa Ruben nowa Gad. Eṋe kamu na ko na tja na Muhona. Komuhingo mbwi ozondekurona zeṋu maze katjaera inḓa ozetu okurikotamena ku Muhona. 26 Eṱe opu twa tungira otjipunguhiro hi, notjo katjozombunguhiro ozoningiririsiwa poo zovinamuinyo, 27 nungwari otjo otjiraisiro kovandu vetu na kovandu veṋu, wina na kozondekurona nḓu maze ya kombunda yetu, kutja tjiri, eṱe tu rikotamena komurungu wa Muhona amatu punguha ozombunguhiro zetu ozoningiririsiwa nozovinamuinyo nozohange, kokutja eyuva rimwe ozondekurona zeṋu aze ha katja nai ku inḓa ozetu: “Eṋe kamu na ko na tja na Muhona.” ’ 28 Eṱe twe ripura kutja tji maape katjitwa nai, ozondekurona zetu maze katja nai: ‘Tareye komatungiro wotjipunguhiro hi, ootate mukururume ve tji tungire tjimuna ihi otja Muhona. Otjo katja ri otjipunguhiro tjozombunguhiro ozoningiririsiwa poo zovinamuinyo, nungwari tja ri otjiraisiro ku eṋe na ku eṱe.’ 29 Eṱe tjiri, katu vangere okupirukira Muhona poo okupoka ku ye mokutunga otjipunguhiro hi tjozombunguhiro ozoningiririsiwa poo zovikurya poo zovinamuinyo. Nu katu vangere okutunga otjipunguhiro tjarwe posi yaihi tja Muhona, Ndjambi wetu, tji tji ri momurungu wOndanda yOmahakaeneno we.”

30 Pinhas, omupristeri, novanane omurongo wombongo, mba ri puna ye, noviuru vya Israel va zuva oviṋa mbya hungirwa i ovandu vomuhoko wa Ruben nowa Manasse wokomuhuka, nu va kara nohange. 31 Omupristeri Pinhas, omuzandu wa Eleasar, wa tja nai kovandu vomuhoko wa Ruben nowa Gad nowa Manasse wokomuhuka: “Nambano twa tjiwa kutja Ndjambi u ri puna eṱe, eṋe tjinga amu ha pirukirire Muhona. Komuhingo mbwi mwa yama otjiwaṋa tja Israel komberero ya Muhona.”

32 Pinhas na imba ovanane va isa ovandu vomuhoko wa Ruben nowa Gad mehi ra Gilead, ave yaruka kOkanaan kOvaisrael nave kaserekarera oviṋa mbi avihe ku wo. 33 Nomaserekarerero wawo ya nyandisa Ovaisrael omitima, nowo va tanga, Ndjambi nave ha uhara amave hungire okuyenda rukwao, ve kanyone indi ehi mu mwa tura ovandu vomuhoko wa Ruben nowa Gad.

34 Novandu vomuhoko wa Ruben nowa Gad va ruka otjipunguhiro hi kutja “Otjihongonone”, orondu owo va tja nai: “Ihi otjo otjihongonone ku eṱe atuhe kutja Muhona eye onguri Ndjambi.”