Josua 2 - Herero Revision Bible (HRR)

Josua ma hindi ozohoze ze kahite mOjeriko

1 Josua wa hinda ozohoze mbari mongumumu okuza mozondanda za Sitim, nomarakiza nga: “Twendeye mu kahore ehi nu tjinene ihi otjihuro Jeriko”. Owo arire tji va i nave ya kondjuwo yomukorondu wena Rahab nave rara mo. 2 Nombara ya Jeriko ya zuva ombuze, ndji mai tja: “Ovaisrael tjiva ve ya mba ouṱuku okuhora ehi.” 3 Ombara ya hinda ombuze ku Rahab ai tja: “Pitisa ovarumendu mbe ya kove nu mba rara moyoye; orondu owo ve ya okuhora ehi arihe!”

4 Nungwari omukazendu wa horeka ovarumendu mba vevari, neye otja zira a tja: “Pe ere ovarumendu tjiva pondjuwo yandje, nungwari hi tjivirwe kutja va za pi. 5 Owo va i komuihi, omuvero wotjihuro tji wa ri pokupatwa. Ami hi mwine kutja va i pi; ve tezeye tjimanga, nu mamu ve vaza.” 6 Nu Rahab wa rondisa ozohoze mbari nḓa komututu ne ze horeke momiti vyotusepa mbya tendekwa komututu. 7 Novandu vombara tji va za motjihuro, omuvero otji wa patwa. Owo va kapaha ozohoze zOvaisrael nga pomakondero wonḓonḓu Jordan.

8 Ozohoze nḓa mbari ngunda aze hiya rara, Rahab wa ronda komututu 9 na tja ku zo: “Ami me tjiwa kutja Muhona we mu pe ehi ndi, neṱe atuhe matu mu tira, nu avehe, mba tura mehi ndi, va urumisiwa i omeero weṋu. 10 Eṱe twa zuva kutja Muhona wa kahisa Omuronga wOtuu momurungu weṋu, tji mwa pita mOengipte. Wina twa zuva kutja mwa zepa ozombara mbari zOvaamori, ooSihon na Og komukuma wokomuhuka wa Jordan. 11 Eṱe tji twa za nokuzuva otjiṋa hi twa tira. Auhe otje rihahiza okumusekamena, orondu Muhona, Ndjambi weṋu, eye onguri Ndjambi meyuru na kombanda yehi. 12 Nambano yaneye ku Muhona kutja mamu yenenisa omakwizikiro weṋu namu rikendere ovazamumwe vandje otja ami tji mbe rikendere eṋe, nu ndji raisireye ouatjiri weṋu. 13 Ndji kwizikireye kutja mamu yama tate na mama, nomarumbi novangu novaṱena kwandje, novazamumwe vawo avehe; amu tu tarere amatu ṱu!”

14 Ovarumendu mba va tja ku ye: “Eṱe twe rirongerere okuṱira ove! Ove tji u hi nokuhorora imbi mbi matu tjiti, tjiri, matu yenenisa omakwizikiro wetu kove, Muhona tje tu pe ehi ndi.”

15 Rahab wa turire mondjuwo ndja tungirwe morumbo rwotjihuro; neye otja raurira ovarumendu mba moruiho nongoze. 16 Eye we ve raera a tja: “Twendeye kozondundu, ovandu vombara tjapo ngaave mu munu. Kaṱareye ngo oure womayuva yetatu, ngaa tji va kotoka. Kombunda yanao mu yende ku mamu i.”

17 Novarumendu va zira nai ku ye: “Eṱe matu yenenisa omakwizikiro nga ngu we tu yanisa. 18 Nungwari puratena nawa! Eṱe tji matu hiti mehi ndi, kuta ongoze oserandu koruiho mu we tu pitisire. Woronganisira iho na nyoko nomarumbi novangu voye neṱunḓu raiho arihe mondjuwo yoye. 19 Nu auhe ngu ma piti mondjuwo na ṱu, indino ma rire ondjo ye omuini, neṱe katu nokukara nomerizirira na ye; nu auhe ngu ri mondjuwo puna ove tja hihamisiwa i eṱe, ma rire ondjo yetu. 20 Nungwari tji wa horora imbi mbi matu tjiti, kamaatu yenenisa omakwizikiro wetu.” 21 Omukazendu wa zira a tja: “Otja pu mwa hee, osemba!” Neye arire tje ve esa ve yende. Nowo tji va ya, eye wa kuta ongoze oserandu koruiho.

22 Nozohoze mbari nḓa za ya kozondundu naze kaṱara, imba ovandu vombara ngunda amave ze paha mehi arihe oure womayuva yetatu. Nowo kave ze mwine, notji va yaruka kOjeriko. 23 Nungwari ozo za heruka kozondundu aze kondo onḓonḓu naze yaruka ku Josua, naze ke mu raera oviṋa mbya tjitwa. 24 Nozo za tja ku ye: “Tjiri, Muhona wa yandja ehi arihe mouvara wetu. Ovandu avehe mbo va mumaparisiwa i eṱe.”