Josua 18 - Herero Revision Bible (HRR)

Omahaṋeno wehi nda sewa po

1 Ovaisrael tji va za nokuhuura ehi arihe, ombongarero aihe yawo ya woronganena mOsilo, nave tono Ondanda yOmahakaeneno. 2 Nungwari pa ri omihoko hambombari vyOvaisrael ingee mbya ri avi hiya pewa orukondwa rwavyo rwehi. 3 Josua opa tjera nai kOvaisrael: “Mamu undju nga ruṋe okuhita nokukambura ehi ndi, Muhona, Ndjambi wooiho mukururume, nde mu pa? 4 Ndji peweye ovarumendu vetatu momuhoko auhe. Ami meve hindi kutja ve ryange mehi arihe, ve kasaneke otukondwa twehi tu mave vanga kutja tu rire ouini wawo. Tjazumba ve kotoke ku ami. 5 Ehi mari haṋewa motukondwa hambombari. Omuhoko wa Juda mau tura mehi rawo komukuma wokeyuva kokumuho, nu imbwi owa Josef mau tura mehi rawo komukuma wokeyuva kokunene. 6 Tjangeye inga omasanekero wotukondwa hambombari twehi, nu mu ye ete ku ami. Ami me umbu ozohanga kokutja tu tjiwe orukondwa Muhona Ndjambi ndu mavanga okuyandja komuhoko auhe peke. 7 Ovalevi kave nokupewa orukondwa rwehi mokati keṋu, orondu orukondwa rwawo okuungurira Muhona otja ovapristeri. Nu imbwi omuhoko wa Gad nowa Ruben nowa Manasse wokomuhuka vya muna rukuru ehi ravyo, komukuma wokomuhuka wa Jordan, ndi vya pewa i Moses, omukarere wa Muhona.”

8 Ovarumendu mba va kasaneka ehi, Josua tja za nokuverakiza nai: “Karyangeye akuhe mehi mu kasaneke ro nu mu kotoke ku ami mOsilo. Nu ami me umbu ozohanga okumupurira ku Muhona Ndjambi kutja ehi mavanga kutja ri haṋewe vi momihoko.” 9 Ovarumendu otji va karyanga akuhe mehi nave katjanga omasanekero wehi membo. Va haṋa ehi ndi motukondwa hambombari nave tjanga otjivaro tjovihuro wina. Tjazumba va kotoka ku Josua kozondanda mOsilo. 10 Josua wa umba ozohanga ame ve pura ku Muhona; nu wa haṋena omihoko vya Israel, auhe peke, orukondwa rumwe rwehi.

Ehi nda yandjewa komuhoko wa Benjamin

11 Omaṱunḓu womuhoko wa Benjamin onga tenga po okupewa ehi nda ri pokati komuhoko wa Juda nowa Josef. 12 Omuruko wawo wokomukuma wokeyuva kokunene wa utira popezu na Jordan, nau rondo komuṱurukira wokomukuma wokeyuva kokunene kwa Jeriko, nau tuurunga ehi rozondundu kuṱa kongurova nga kokuti onguza kwa Bet-Awen. 13 Tjazumba omuruko wa hungama kuṱa komuṱurukira wokomukuma wokeyuva kokumuho kwa Lus, tji tji isanewa kutja Betel, nau raukire Atrot-Adar, kondundu yokomukuma wokeyuva kokumuho kwa Bet-Horon-tjOkehi. 14 Omuruko mbwi wa ya komukuma warwe amau tanaukire komukuma wokeyuva kokumuho okuza komukuma wokongurova kwondundu ndja hungama Bet-Horon, nau i kotjihuro tja Kirjat-Baal, tji tji ri Kirjat-Jearim, tjomuhoko wa Juda. Imbwi ombwa ri omuruko wokongurova. 15 Imbwi omuruko wokomukuma wokeyuva kokumuho wa utira kotjikoro tja Kirjat-Jearim, nokuzambo au i kuṱa komukuma wokongurova kotuharwi twa Neftoak. 16 Tjazumba owo wa punda kehi yondundu ndja tarera komukutu wa Ben-Hinom, kotjikoro tjokeyuva kokunene kworutjandja rwOvarefai. Nungwari owo wa ya komukuma wokeyuva kokumuho, nau tuurunga omukutu wa Hinom komukuma wokeyuva kokumuho kwondundu yOvajebusi, nau hungama oruharwi rwa Rogel. 17 Tjazumba omuruko wa tanaukira komukuma wokeyuva kokunene amau i kOen-Semes, nau ryama kOgelilot, omuhunga womakapitiro wa Adumim, nau pundu kOruuwa rwa Bohan, omuzandu wa Ruben, 18 nau kapita komukuma wokeyuva kokunene kwondundu ya Bet-Araba, ndja tarera komukutu wa Jordan, nau pundu momukutu mbwi. 19 Owo wa ya komukuma wokeyuva kokunene nga kondundu ya Bet-Hogla, nau kayandera pomahitiro wonḓonḓu Jordan mOmuronga wOmongwa. Imbwi ombwa ri omuruko wokeyuva kokumuho. 20 Onḓonḓu Jordan ondja ri omuruko wokomuhuka. Imbi ombya ri omiruko vyehi romaṱunḓu womuhoko wa Benjamin ndi va pewa ri rire ouini wawo.

21 Ovihuro vyomaṱunḓu womuhoko wa Benjamin, ovyo mbi: OoJeriko na Bet-Hogla na Emek-Kesis, 22 na Bet-Araba na Semarajim na Betel, 23 na Awim na Para na Ofra, 24 na Kefar-Amoni na Ofni na Geba. Avihe kumwe vya ri ovihuro omurongo na vivari puna ovirongo vyavyo. 25 Wina pa ri ooGibeon na Rama na Beerot, 26 na Mispe na Kefira na Mosa, 27 na Rekem na Jirpeel na Tarala, 28 na Sela na Elef na Jebus, tji tji ri Jerusalem, na Gibea na Kirjat. Avihe kumwe vya ri ovihuro omurongo na vine puna ovirongo vyavyo. Indi ondi ri ehi romaṱunḓu womuhoko wa Benjamin ndi va pewa ri rire ouini wawo.