Jona ma i kOninive
1 Norukwao Muhona wa hungira ku Jona a tja: 2 “Twende kOninive, ihi otjihuro otjinene, u kazuvarisire ovature vatjo indji ombuze ndji mbe ku raera.” 3 Nu Jona wa kara nonḓuviro ku Muhona na i kOninive, Ninive tja ri otjihuro otjinene nai nga tjaa tji kawondjwa oure womayuva yetatu okutuurunga tjo. 4 Jona wa uta okutuurunga otjihuro, neye tja za nokuryanga oure weyuva rimwe, arire tja zuvarisa a tja: “Inga pa sewa omayuva omirongo vine, nu Ninive otji matji yandekwa!”
5 Novature va Ninive va kambura mu Ndjambi nowo va tya kutja auhe e ritjaere kovikurya, novandu avehe, ovanene nouṱiṱi, va zara ozombanda zomakutu okuraisa kutja ve ritanaura.
6 Nombara ya Ninive tji ya zuva ombuze ndji, ya sekama kotjihavero tjayo tjouhona, ai hukura ongwava yayo, ai zara ombanda yekutu nai kahaama momutwe. 7 Noyo ya tjivisa nai kovature va Ninive: “Inga owo omarakiza nga zu kombara na kovahongore vayo: ‘Kape na omundu ngu ma ri otjikurya; ovandu avehe mave tjaerwa okurya nokunwa, nozongombe nozonyanda wina. 8 Ovandu avehe mave zara ozombanda zomakutu, novinamuinyo avihe wina. Auhe nga kumbe nomasa ku Ndjambi nu a ise ozongaro ze ozombi novitjitwa vye ovivi. 9 Ngahino Ndjambi ma rundurura omeripura we na zu ko komazenge we ne he tu yandeke!’ ”
10 Nu Ndjambi wa muna imbi mbi va tjita. Eye wa muna kutja va isa ozongaro zawo ozombi, neye opa rundururira omeripura we ne he ve vere otja pa tjere meve vere.
© Herero Revision Bible © Bible Society in Namibia, 2021.
