Jona 2 - Herero Revision Bible (HRR)

Ongumbiro ya Jona nokuyamwa kwe

1 Jona wa kumba ku Muhona Ndjambi we mezumo rohi na tja:

2 “Mombamisiro yandje, Muhona,

ami mba kumba kove,

nove we ndji zuvira.

Okuza mourekoto wotjovakoke

ami mba ningira ombatero kove,

nove wa zira ongumbiro yandje.

3 Ove we ndji yumba mourekoto

kehi yomeva kokuvare;

omeva ku ye ndji kovera,

nozongazona zoye ozonamasa

ku zeri varangere ongondoroka na ami.

4 Ami mba tjangovasi mba imbirahiwa komurungu woye,

nu himee kamuna ondjuwo yoye ondjapuke rukwao.

5 Omeva ye ya kombanda yandje

naye ndji pamisa omuinyo.

Okuvare kwe ndji kovera okumana;

nomahozu wokuvare ye rimanga motjiuru tjandje.

6 Ami mba punda nga kehi komuze wozondundu,

nomivero vyehi vye ndji patera

moukoto nga aruhe.

Nungwari ove, Muhona, Ndjambi wandje,

we ndji pitisa omunamuinyo mourekoto.

7 Omuinyo wandje tji wa yaraara,

e rizemburuka na ove Muhona;

nove oo ziri ongumbiro yandje

mondjuwo yoye ondjapuke.

8 Imba mbe rikotamena koomukuru wovisenginina

va isa ingwi ngwatja rira ombwiro yawo.

9 Nungwari ami me ku imburire ondangero,

nu me ku punguhire ombunguhiro;

me yenenisa ihi tji mba kwizika.

Ondjamo i za ku Muhona!”

10 Tjazumba Muhona otja rakiza indji ohi kutja i kungire Jona komukuro, noyo ya tjita nao.