Okuhinonḓuviro kwa Jona ku Muhona
1 Eyuva rimwe Muhona wa hungira ku Jona, omuzandu wa Amitai, a tja: 2 “Twende kotjihuro otjinene Ninive nu u katjivise ombanguriro yandje kutjo, orondu ami mba muna ourunde wovature vatjo.” 3 Nungwari moruveze rwokuyenda kOninive Jona wa hena komurungu wa Muhona. Eye wa ya kOjopa a kavaza ko ondjuwoyomomeva ndja ri pokuyenda kOtarsis. Eye wa suta ovimariva vyouyenda na rondo puna ovaungure vomondjuwoyomomeva okuyenda kOtarsis kutja a zenge komurungu wa Muhona.
4 Nungwari Muhona wa hinda otjivepo otjinamasa kombanda yokuvare; notjipukupuku tja handja tjinene nga indji ondjuwoyomomeva tji ya hara okuteka. 5 Novaungure vomondjuwoyomomeva avehe va uruma tjinene nave ku ombatero, auhe komukuru we wotjisenginina. Nowo va imbirahi omitwaro vyondjuwoyomomeva mokuvare kutja i rire ombupu. Jona tjandje nai wa pundu rukuru metuwo rokehi, nu wa rara ozomboṱu.
6 Nomunane wondjuwoyomomeva we mu vaza mo na tja ku ye: “Ove wa hapa vi tji wa rara nai? Penduka u kumbe ku Ndjambi woye! Ngahino eye me tu ṱire ondjenda atu ha ṱu.”
7 Novaungure vomondjuwoyomomeva arire tji verihungirire oveni ave tja: “Ngatu yumbe ozohanga pe horoke kutja ondjo i na uṋe ngwe tu etere oumba mu tu ri mbwi.” Nowo va tjita nao, nu Jona a rire ngwa urikwa. 8 Nowo va tja nai ku ye: “Tu tjivisa kutja oove ngu wa eta oumba mbwi? Mo unguraye mba? Nu wa za pi? Oove owehi riṋe, nu oove omungehoko?”
9 Nu Jona wa zira a tja: “Owami Omuheberi, nu mbi rikotamena ku Muhona Ndjambi weyuru ngwa mema okuvare nehi.”
10 Novaungure vomondjuwoyomomeva va uruma tjinene nave tja nai ku ye: “Ove wa tjita otjikeṋa? Orondu owo tjinga ava tjiwa kutja eye wa hena komurungu wa Muhona, indu tja za nokuveraera nao.” 11 Notjipukupuku oruveze aruhe tjandje matji ririre ko otjindandi tjinene, novaungure vomondjuwoyomomeva opu ve mu purira nai: “Ngatu ku tjite vi kutja okuvare ku porimane?”
12 Jona we ve zira a tja: “Ndji tooreye mu ndji yumbe mokuvare, nokuvare otji maku porimana. Ami me tjiwa kutja otjipukupuku hi tji tje ya kombanda yeṋu, tja pitire mu ami.”
13 Moruveze rwanao ovaungure vomondjuwoyomomeva va rora okuhingira ondjuwoyomomeva komukuro nomasa, nungwari owo kave sorere ko, otjipukupuku hi tjinga atja ririra ko otjindandi tjinene. 14 Owo otji va ura ku Muhona ave tja: “Arikana, Muhona, matu kumbu kove, o tu yandeke mena romurumendu ngwi; o tu vere otja mbu tu ri ovazepe, orondu oove, Muhona, ngu wa tjita nao otja kombango yoye.” 15 Nowo otji va toora Jona nave mu yumbu mokuvare nu mokamanga okwo arire tji kwa porimana. 16 Ovaungure vomondjuwoyomomeva otji va tira Muhona tjinene, ave mu punguhire ombunguhiro nave kwizike okumukarera.
17 Nu Muhona wa rakiza ohi onene kutja i ṋiṋe Jona. Nu Jona wa kara mezumo rohi ndji oure womayuva yetatu nomauṱuku yetatu.
© Herero Revision Bible © Bible Society in Namibia, 2021.
