Bildad ma ziri Job
1 Tjazumba Bildad, Omusuak,
ongwa zira a tja:
2 “Mo mana ruṋe okuhungira
omambo woye ngu
maye hingi otja otjivepo?
3 Ndjambi ka pikamisa ousemba;
neye ka kaerisa okutjita
imbi mbi ri osemba.
4 Ngahino ovanatje voye va tura
ondjo komurungu wa Ndjambi,
neye otje ve verera ourunde wawo.
5 Nungwari nambano ove tanauka
nu riyarikaṋa ku
Ndjambi Omunamasaaehe;
6 ove tji u ri omusemba
nomukohoke tjiri,
Ndjambi meya ne ku vatere,
na yarura ko onganda
yoye otja ondjambi yoye.
7 Outumbe woye auhe mbu wa
pandjara owo kau nokurira otjiṋa
pu imbwi Ndjambi mbu mee kekupa.
8 “Ngo tji tara kondjiviro
yovandu woruveze orukuru;
konḓonona imbi
ootate mbi va mwine.
9 Ominyo vyetu omisupi,
katu notjiṋa tji tu tjiwa oparukaze;
omayuva wetu ye kapita tjimuna
otjizire tji matji tapakaṋa ehi.
10 Nungwari ovarumendu ovakuru
ovanandjiviro ngave ku honge;
puratena ku imbi mbi va hungira.
11 “Otuu kamaatu hapa
poṋa pu pe hi nomeva;
oto kamaatu vazewa pendje
yotjirindinoko oparukaze.
12 Omeva tji ya pwire,
otuu otutu ri otutenga okukoka,
ngunda ingee atu ri otuṱiṱi
okukondwa nokuungurisiwa.
13 Ovandu mbe zemba
Ndjambi va sana kotuu twi;
omaundjiro wovarunde ya pandjara.
14 Omeriyamekero wawo maye
sana kotungovi twovitjauvi.
15 Tji mave yama kotungovi twi,
oto maa tu ve ṱiza are?
Tji mave riṱizire ku two otjongoze,
otwo matu ve
vatere okukurama are?
16 “Ovandu ovarunde ve nyomoka otja
ozohongwe kozohanya zeyuva,
otja ozohongwe nḓe
tandavara motjikunino atjihe.
17 Omize vyazo vi manga momawe
navi kakatere koruuwa aruhe peke.
18 Nungwari tji za zukurwa,
kape na umwe ngu ma tjiwa
kutja ozo onḓa ri poṋa mbo.
19 Tara, indji ondji ri ondjoroka
ovandu ovarunde ndji ve na yo,
nu varwe mave ya
nave yaruka motuveze twawo.
20 “Nungwari Ndjambi kamaa
isa imba mba ṱakama mu ye,
nu kamaa yandja
ombatero kovarunde.
21 Eye me ku yorisa,
nu ma tjiti kutja u yoroke,
22 nungwari eye ma eta
ohoṋi ku imba mbe ku tonda,
nozondanda zovanauvi maze zengi.”
© Herero Revision Bible © Bible Society in Namibia, 2021.
