Job 42 - Herero Revision Bible (HRR)

1 Job wa zira Muhona a tja:

2 “Ami, Muhona, me tjiwa

kutja oove Omunamasaaehe,

nokutja ove u tjita oviṋa avihe mbi u vanga.

3 Ove mo ndji pura, kutja ousemba

wokupura ounongo woye mba isa pi,

ngunda ambi hi notjiṋa tji mbi tjiwa.

Ami ee hungire oviṋa, mbi mbi hi nokuzuva,

oviṋa ovinene novihimise

tjinene ku ami okuvitjiwa.

4 Ove we ndji raera kutja hi puratene,

ngunda amo hungire,

kokutja mbi zire omapuriro woye.

5 Ami mbi tjiwa imbi porwavyo

ovakwetu mbi ve ndji raerere,

nungwari nambano ami mbe ku

munu nomeho wandje omuini.

6 Nu otji me nanununa omambo

wandje aehe ngu mba hungire,

nu me ritanaura kouvi wandje

ame riyumbu oruuma nomutwe.”

Omasembamisiro wa Job

7 Muhona tja manene okuhungira kuna Job, wa tja nai ku Elifas, Omuteman: “Ami mbi nomazenge na ove, nomapanga woye yevari wina, tjinga amu ha hungirire ouatjiri ohunga na ami, otja omukarere wandje Job tja tjita. 8 Nambano twareye ozondwezu hambombari zozongombe na hambombari zozonḓu ku Job, mu kezepunguhe ze rire ombunguhiro yeṋu oningiririsiwa. Job me mu kumbire, nami me ziri ongumbiro ye nonyuṋe, nu hi nokumuyamburura otja tji mamu sokuyambururwa. Eṋe kamu hungirire ouatjiri ohunga na ami otja eye tja tjita.”

9 Elifas na Bildad na Sofar arire tji va tjiti imbi Muhona mbye ve raerere okutjita; nu Muhona wa zuvira ongumbiro ya Job.

10 Job tja za nokukumbira omapanga we yetatu, Muhona otje mu ṋingaparisa, ne mu pe oviṋa ovingi potuvari komeho yaimbi mbya ri na vyo rutenga. 11 Omarumbi novangu ve novaṱena kwe avehe nomapanga we aehe ve ya okumumuvara, nave nyanda omukandi puna ye mondjuwo ye. Owo ve mu ṱira ondjenda nave mu huhumiṋa mena romaumba aehe Muhona nga etere kombanda ye. Auhe wawo wa yandja ovimariva nongoho ongoldo ku Job.

12 Muhona wa sera omayuva omasenina womuinyo wa Job ondaya komeho yaindu tja serere inga omatenga womuinyo we. Job wa ri nozonḓu omayovi omurongo na yane, nozongamero omayovi hamboumwe, nozongombe omayovi yevari, nousino eyovi rimwe. 13 Eye wa ri ihe yovanatje ovazandu hambombari novakazona vetatu. 14 Eye wa ruka omukazona ingwi everi ena Jemima, nu ingwi outjavari we mu ruka Kesia, nu ingwi ongero Keren-Hapuk. 15 Kapa ri ovakazendu varwe mouye auhe mba ri ovawa ovamanise tjimuna ovakazona va Job. Ihe we ve pa orukondwa rwotjirumatwa pamwe novaṱena kwawo.

16 Kombunda yoviṋa mbi Job wa hupa oure wozombura esere rimwe nomirongo vine; orwo rwa ri oruveze orure tjinene okumuna ovanatje vovanatje ve nga kozondekurona ozetjaine. 17 Tjazumba Job otja koka notjiwondo tjozombura ozengi tjinene.