1 Muhona arire tja ziri Job a tja:
2 “Job, ove wa toko
Ndjambi Omunamasaaehe;
mo isa okuhungira poo mo ziri?”
3 Job wa zira Muhona a tja:
4 “Owami omuhinanḓengu, Muhona.
Me ziri tjike?
Me ṱokutwa eke kotjinyo tjandje.
5 Ami mba hungira omambo omengi rukuru,
komurungu wapu mba sokuhungira.”
Ehungi oritjavari ra Ndjambi
6 Muhona wa hungira ku Job rukwao motjivepo, na tja:
7 “Ripangaṋa otja omurwe,
nu u zire omapuriro wandje!
8 Mokondjo okuraisa kutja owami omuhasemba,
nokutja ami mba tataiza,
nove omuini oove ngu u ri osemba are?
9 Ove u nomasa nge ṱeki powandje are?
Ombosiro yeraka roye i
ṱuṱuma nomasa pu indji oyandje are?
10 Tji pe ri nao, sekama mondengero
yoye na moutonga woye,
u zare ouvara nondjozikiro.
11 Tara ku imba mbe ritongamisa,
u tirire omazenge woye,
nu u ve susuparise!
12 Ii, tara ku wo, u ve ṋiṋikizire pehi;
nyanyaura ovarunde akuhe ku ve ri.
13 Ve paka avehe mehi,
nu ve pandekera motjovakoke.
14 Ami me tenge po okukutanga,
nu me hepura kutja ove wa toṋa.
15 “Tara onḓuu!
Owami ngu mbe i uta,
nu owami ngu mbe ku uta.
Oyo i rya ehozu tjimuna ongombe,
16 nungwari oyo i nomasa
nge ṱa pi morutu rwayo,
nu i nomasa nge ṱa pi mozombwiṋi zayo!
17 Omutjira wayo wa ṱirika tjimuna orupapa,
nomisepa momarama wayo vya pamisiwa.
18 Omaṱupa wayo ye nomasa
tjimuna omiriu vyongoporo,
nomarama wayo tjimuna ovihenḓe vyovitenda.
19 “Oyo ohimise tjinene poviutwa vyandje avihe.
Omuute wayo porwe ongu
ma yenene okuitaara.
20 Ehozu, ndi i rya,
ri hapa mozondunda mu
mu nyandera ovipuka vyokuti.
21 Oyo i rangavara kehi yovimbuku,
nu i ṱara motuu tu tu ri motjirindinoko.
22 Ovimbuku vyomakuiya nomipanda,
meṋe yomipupo,
vi i tjizikiza nomuzire.
23 Oyo kai tira onḓonḓu ndji mai pupu nomasa;
Jordan tji mai vete momurungu wayo,
oyo i hirimana uriri.
24 Owaṋi ngu ma sora okuipoṱuparisa nokuikambura,
poo ngu ma sora okuhweka oruuri meyuru rayo?
© Herero Revision Bible © Bible Society in Namibia, 2021.
