EHUNGI RAVEVARI ETENGA
Ehungi etenga ra Elifas
1 Nu Elifas, Omuteman, wa zira a tja:
2 “Job, mo nyengwa tji mba hungire?
Ami hi nokusora okumwina orure nai!
3 Ove wa honga ovandu ovengi,
nu wa zeuparisa omake nga ngundipara.
4 Omundu worive tja putara na ngundipara na urwa,
omambo woye aaye mu yanḓiparisa kutja a sekame.
5 Nambano oove ngu u ri moumba,
nove wa mumapara.
6 Ove we rikotamena ku Ndjambi,
nomuinyo woye wa ri nokuhinondjo;
opu mo sokukara nonḓero nomaundjiro.
7 Nambano ripura nai:
Ouṋe ngwa ri omusemba nu ngwa munu otjipo?
8 Ami mba muna ovandu mba
taura omahi womakunino omanauvi
nu mba kuna omauvi tjimuna ozondwi;
nambano ve konda omauvi nourunde.
9 Ndjambi meve yandeke momazenge
we tjimuna otjivepo.
10 Ovanauvi mave tye ovimboro
nave wenene otja ozongeyama,
nungwari Ndjambi meve mwinisa,
na teya omayo wawo.
11 Owo mave ṱu otja ozongeyama
ozonamasa nḓe hi
notjiṋa tji maze zepa nokurya,
novanatje vawo avehe ave rimbara.
12 Otjikando tjimwe kwe ya
ombuze mongumumu ku ami,
oyo ya hokorwa momatwi wandje.
13 Noyo ye ndji kondjisa mozomboṱu
otja otjirimunikise tjoruroto.
14 Ami mba zezera ne teratera;
orutu rwandje aruhe rwa hakihiwa i ondira.
15 Ombepo ondaazu ya
ṱuna komurungu wandje;
nomukova wozondjise zandje
wa yendwa i omahwiriri.
16 Ami mba muna otjiṋa tji tja kurama mbo;
mba tara, nungwari hi sorere
okuserekarera kutja tja ri otjikeṋa.
Tjazumba otji mba zuva eraka,
ndi mari hokora nai:
17 ‘Omundu ngamwa auhe hapo ma
yenene okurira omusemba
komurungu wa Ndjambi
poo okurira omukohoke
komurungu wOmuute we are?
18 Indu Ndjambi tje hi nonḓakameno
movakarere ve veyuru;
nokumuna ozondataiziro movaengeri ve,
19 mo ripura kutja eye ma kara
nongamburiro motjiutwa tjopomunoko,
otjiṋa tjoruuma tji ma tji yenene
okuṱukuṱuka tjimuna etoto are?
20 Omundu ma yenene okukara
nomuinyo oruveze rwomuhuka,
nungwari a koka e he iwe,
ongurova ngunda ai hiye ya.
21 Avihe mbye na vyo wa yekwa;
neye ma koka ngunda e hi nondjiviro.’ ”
© Herero Revision Bible © Bible Society in Namibia, 2021.
