1 “Mo tjiwa kutja ongorowe i kwata ruṋe?
Ove wa tarera ongoṱu tji mai kwata are?
2 Mo tjiwa kutja ze uraya oure mbu ṱa pi are?
Mo tjiwa oruveze rwokukwata kwazo are?
3 Indu mo tjiwa oruveze ndu ze ritwa pehi,
naze kwata oungoṱona wazo are?
4 Mokuti oungoṱona wazo u kura au kaha;
owo u zapo pozoina nu kau kotoka.
5 “Owaṋi ngwa yandja ouyara kozongoro zokuti?
Owaṋi ngwe ze pandura omapando,
ne ze esa kutja ze ryange?
6 Ami mbe ze pa okuti onguza ku rire onganda yazo,
nu mbe ze pa okuhupa motutjandja twomongwa.
7 Ozo ze kara kokure nondokohero yovihuro,
nu kape na ngu me ze zee nokuzeungurisa.
8 Mozondundu omomaryo wazo,
nu ze paha koṋa akuhe ku maze ri oruhapo.
9 “Onyati maai ku ungurire are?
Oyo maai vanga okurara motjunda tjoye are?
10 Mo sora okuiṱiza nongoze, kutja i ku taurire ehi are?
Poo i nane otjikokozorwa movikunino vyoye are?
11 Mo riyameke ku yo, tjinga ai nomasa omanene,
no undju kutja i ungure oviungura vyoye ovizeu are?
12 Ove tjiri, mo ripura kutja oyo mai kotoka konganda,
nai ku etere ovikokotwa kotjitondero tjoye are?
13 “Ovivava vyombo vi pakapaka!
Nungwari kape nombo ndji tuka otja endongo.
14 Ombo i sira omai wayo mehi,
kutja ye mune mo oupyu,
15 aya zemba kutja ombaze mai ye nyanyaura,
poo kutja otjipuka tjokuti matji ye taura.
16 Oyo i tjita aayo omai kawayo,
nu kai na ko na tja kutja
ongondjero yayo mai nyonoka.
17 Owami ngu mbe i yovaparisa,
nu hi i pere ounongo.
18 Nungwari oyo tji ya utu okutupuka,
mai nyekerere okakambe nomukavire wako.
19 “Job, oove ngu wa ungura okakambe
kutja ke kare nomasa nai,
nu ngu we ke pa omurenge are?
20 Ove we ke ungura kutja ke tuke tjimuna ombahu,
nokutja ke tirise ovandu nokupema kwako are?
21 Oko ke ponda ehi motutjandja nonḓero;
ke tupuka movita nomasa wako aehe.
22 Oko kake tjiwa okutira,
nu kake tupuka kengaruvyo.
23 Ovirwise mbi tjindwa i omukavire wako vi
porokota navi keṋakeṋa meyuva.
24 Okakambe ke tupuka komurungu
amake posisa omingunda novikoti;
nohiva tji ya pose, oko kake hirimana.
25 Kombosiro aihe yohiva oko ke vandara, ake tja:
‘Hihihii!’ Nu ke ṋuka ovita
ngunda ake hiya vaza popezu;
nu ke zuva omuhongore tji
ma ravaere omarakiza.
26 “Orukoze ru hongwa i ove okutuka,
tji ru tandavarisa ovivava vyarwo kuṱa
komukuma wokeyuva kokumuho are?
27 Onguvi i undja omarakiza woye
tji mai vanga okutunga otjiruwo
tjayo kombanda mozondundu are?
28 I tunga onganda yayo kotuuwa oture tjinene,
ai rara ngo,
nu i tjita kutja ohonga yotuuwa i
rire otjiṱunga tjayo.
29 Ingo oku i tjeverera popezu nokokure
ihi otjiṋa tji mai zepa nokurya.
30 Ozonguvi ze woronganena pomitundu,
novikuvyona vi nwa ombinḓu.”
© Herero Revision Bible © Bible Society in Namibia, 2021.
