1 “Otjivepo matji zezerisa omutima
wandje nokuutonisa tjinene.
2 Amuhe purateneye keraka ra Ndjambi,
kombosiro yoruṱuṱumo ndji
mai zu motjinyo tje,
3 eye u tuurungisa orutjeno
rwombura mevaverwa,
okuza kotjikoro tjimwe
tjehi nga kotjikwao.
4 Kombunda yanao ombosiro onamasa
tjinene yoruṱuṱumo mai zuvaka,
indji ombosiro yeraka re,
ombura ngunda amai tjene oruveze aruhe.
5 Ndjambi u ṱuṱuma neraka re
momuhingo omuhimise,
nu u tjita oviṋa ovihimise mbi tu
ha sora okukonḓonona.
6 Eye u rakiza ovitutukende kutja
vi wire kombanda yehi,
nu u rokisa ombura onḓeu noningenise.
7 Eye u yandisa oviungura vyovandu;
u ve raisira kutja eye ongu ma ungura.
8 Ovipuka mavi kaṱara komaundiro wavyo,
ovyo mavi kasuva momawameno wavyo.
9 Otjivepo matji zu keyuva kokumuho,
nombepera onḓeu mai
zu keyuva kokunene.
10 Omasuvaneno wa Ndjambi
ye kukutisa omeva
naye tjiti kutja ye rire
omakende womeva.
11 Eye u urisa ovikamba notjeme,
norutjeno rwombura ru tjena movikamba,
12 otja tji mavi kayenda otja
kombango ya Ndjambi,
nu vi yenenisa oviṋa avihe
Ndjambi mbye rakiza poṋa apehe mouye.
13 Ndjambi u rokisa ombura
kutja i ningenise ehi;
eye rumwe u rokisa ombura
kokutja a vere ovandu,
nu rumwe u rokisa kutja
e ve raisire otjari tje.
14 “Ko tji mwina oruveze orusupi, Job,
nu konḓonona oviṋa ovihimise
Ndjambi mbye tjita.
15 Mo tjiwa kutja Ndjambi u
yandja vi omarakiza,
nu u tjita vi kutja orutjeno rwombura
ru tjene movikamba are?
16 Indu mo tjiwa kutja ovikamba
vi tendeza vi mevaverwa;
imbi ovihimise vyondjiviro
onene ya Ndjambi u vi i are?
17 Kako, ove mo ṱoupyu womutenya
indu ombepo yokeyuva
kokumuho tji mai nyosa ehi.
18 Ove hapo mo yenene okuvatera
Ndjambi okutandavarisa evaverwa,
notjiti kutja ri kukute tjimuna
otjiritarero tji tja hamburwa potjitenda are?
19 Tu honga imbi mbi matu
sokuhungira ku Ndjambi;
ozondunge zetu ze ri monḓorera;
katu notjiṋa tji matu hungire.
20 Ami hi nokuningira kutja
mbi hungire na Ndjambi;
ami me mu pere tjike
oruveze rwokutja e ndji zepe?
21 “Nu nambano ondjerera yeyuva
mevaverwa mai keṋakeṋa,
mai yere tjinene nai nga eṱe tji
tu hi nokusora okutara mu yo,
indu ombepo tji ya zu
nokukohorora evaverwa.
22 Orururumo orungoldo maru munika
komukuma wokeyuva kokunene,
nu ongeṋangeṋeno ya
Ndjambi mai tu urisa nondira.
23 Ouvara wa Ndjambi owo ounene tjinene
nai nga eṱe tji tu hi nokusora
okuya popezu na ye;
eye u nousemba nouatjiri
movitjitwa vye kuna ovandu.
24 Ovandu opu ve zokukara nondira ku ye;
eye u nyengwa avehe mbe
rivara kutja ozonongo.”
© Herero Revision Bible © Bible Society in Namibia, 2021.
