1 “Ongwaye Omunamasaaehe tje ha
twire po oruveze rwokupangura,
eyuva rombanguriro ku
imba mba ṱakama mu ye?
2 “Ovanauvi ve isa po omawe womuruko
kokutja ve munine po ehi eparanga;
owo ve vaka ozonḓu nave ze twa
mokati kotupanda twawo oveni.
3 Owo ve kambura ousino wozosewa,
nu ve ṱiza onduwombe yomuhepundu,
nga eye tja sutu ozondjo ze.
4 Owo ve tjaera ovasyona kutja
ave ha munu ousemba wawo,
nu ve ṋiṋikiza ovahepe nga
tji mave tupuka nokukaṱara.
5 “Ovasyona otji ve paha ovikurya
mokuti onguza ku kwa kukuta,
tjimuna ozongoro;
nu kape nopoṋa pu mave munu
ovikurya vyovanatje vawo.
6 Owo ve konda omahi womakunino
nge he ri owawo,
nu ve nikora omandjembere
komivite vyovanauvi.
7 Ouṱuku ve rara mutundu,
nokuhinotjiṋa tji matji
ve yama kombepera.
8 Owo ve ningenisiwa i ombura,
ndji mai roko kozondundu,
nu ve riṱizira kotuuwa kokutja ve wame.
9 “Ovanauvi ve hakana ovanatje
mbe hi nooihe komavere wooina,
nu ve kambura ovanatje wovasyona
kutja ve rire otjisuta tjozondjo.
10 Nungwari ovasyona ve ryanga muzu
nokuhinozombanda, nondjara
ngunda eri mbe konda ovikokotwa.
11 Owo ve kama omaze womiṋinga
nomavinu momandjembere,
nungwari owo oveni tjandje va ṱonyota.
12 Movihuro imba ozondjahe naimba
mbu mave ṱu mave tjeme,
nungwari Ndjambi ke nokuvezuvira
ko ozongumbiro zawo.
13 “Pe novandu mbe nyengwa ondjerera;
owo kave tjiwa ondjira yayo,
nu wina kave tjiwa koṋa ku i yenda.
14 Menyunguhuka omuzepe u penduka
na piti okukazepa ovasyona novahepe,
nu ouṱuku eye a rire erunga.
15 Omukatuke worukupo u undja omuihi;
eye u kutjira omurungu
we kutja ape ha ningi
omundu ngu me mu zemburuka.
16 Ouṱuku omarunga ye teya ozondjuwo,
nungwari mutenya ye ṱara
naye ha vanga ondjerera.
17 Owo ye tira ondjerera yeyuva,
nungwari onḓorera kai ve tirisa.
18 “Omurunde u pupwa i omipupo,
nu ehi rouini we ra sengwa i Ndjambi;
eye ke tji nakukaungura rukwao
motjikunino tje tjomivite.
19 Otja omakende wombepera tji ye
zenga moupyu na mourumbu,
omurunde wina otjinga ama
zengi mehi rovanamuinyo.
20 Nangarire ina ke
nokumuzemburuka nambano;
eye wa riwa i omativa na
nyonwa tjimuna omuti mbwa wa.
21 Mape tjitwa nao, eye tjinga
a tatumisa ovahepundu
ne ha karere notjari novakazendu
mbe hi novanatje.
22 Ndjambi ma yandeke
ovanauvara momasa we;
Ndjambi ma tjiti otjiṋa,
nomurunde ma koka.
23 Ndjambi ma yenene okuhupisa
omurunde nokuhinatjipo,
nomurunde me riyameke kotjiṋa hi;
nungwari Ndjambi me
mu tjevere oruveze aruhe.
24 Omurunde ma ṋingapara
oruveze orusupi,
nu tjazumba ma kukuta otja ohongwe,
otja otjihweka tjovikokotwa
tji tja kondwa.
25 Pe nomundu ngu ma sora
okupataṋa kutja ka tjiperi nao are?
Pe nomundu ngu ma sora okuraisa kutja
omambo wandje owo kauatjiri are?”
© Herero Revision Bible © Bible Society in Namibia, 2021.
