1 “Ondjandero yomuinyo wandje i ri popezu.
Ami hi nokusora okusuvana;
kape notjiṋa tji tja sewa po ku
ami posi ye yendo porwaro.
2 Ami mba rire omunyekererwa;
me tarere, owo tji mave
ndji nyekerere tjinene.
3 Ami owami omuṱakame, Ndjambi.
Yakura omambo wandje.
Kape na warwe ngu ma zeuparisa
omambo nga ngu me hungire.
4 Ove wa pata omitima vyawo kokuzuva,
o ve yandjere ko kutja
ve ndji havere nambano.
5 Omuano omukuru mau tja nai:
Omundu u wovisa omapanga
we mokuvepa ovimariva
novanatje ve ve muna ouzeu motjiṋa hi.
6 Nambano Ndjambi we
ndji isa po omunyekererwa kovandu,
nowo mave ya nave
ndji tjekere omate momurungu.
7 Oruhoze rwandje rwa hara
okundjipoṱuparisa;
omaoko nomarama wandje
ya rambuka tjimuna otjizire.
8 Imba mbe tja owo ovaṱakame va uruma,
nu owo avehe ve ndji
pangura kutja owami omurunde.
9 Imba mbe tja owo ovatengwandu
ve panḓera pokutja ve ri osemba.
10 Nungwari avehe vawo tji ve
ya nave kurama komurungu wandje,
ami himee munu nangarire
umwe wawo ngu nozondunge.
11 “Omayuva wandje ya kapita;
omeripuriro wandje ya yanda mba;
nu hi tji nomaundjiro rukwao.
12 Nungwari omapanga wandje
maye tja ouṱuku owo omutenya;
owo mave tja ondjerera i ri popezu,
nungwari ami me tjiwa
kutja me kara monḓorera.
13 Omaundjiro wandje otjovakoke porwatjo,
mu me rangavara mozomboṱu monḓorera.
14 Eyendo, me tja ondi ri tate,
nomativa ngu maye ndji ri, me tja
onge ri mama novaṱena kwandje.
15 Ku ku nomaundjiro ku ami, ku pi?
Owaṋi ngu me ndji munine ouṋingandu?
16 Omaundjiro kaye nokuyenda puna ami,
tji me pundu motjovakoke.”
© Herero Revision Bible © Bible Society in Namibia, 2021.
