Job ma ziri Sofar
1 Job wa zira a tja:
2 “Ii, oweṋe ovandu ovanazondunge.
Tji mwa koka,
ondjiviro mai ṱu puna eṋe.
3 Nungwari ami wina mbi
nozondunge ozengi otja eṋe;
ami hi ri kehi yeṋu;
nu ouṋe ngu hi nokutjiwa
avihe mbi mwa hungire?
4 Nangarire omapanga wandje
nambano maye ndji yoro;
maye ndji yoro,
nandarire kutja owami
omusemba nomuhinandjo,
ami ngwi wozongumbiro
nḓe zuvirwa i Ndjambi.
5 Eṋe kamu ri moumba,
nu nambano oweṋe
mbu mamu ndji hembe;
mamu tono omundu ngu ri pokuwa.
6 Nungwari omarunga
novarunde ve hupa mohange,
andarire kutja omasa wawo
onge ri omukuru wawo erike.
7 “Nangarire ozonḓera novinamuinyo
vi noviṋa ovingi okumuhonga;
8 ningira ondjiviro koviutwa
vyehi novyokuvare.
9 Ovyo avihe mavi tjiwa kutja
eke ra Muhona onde vi uta.
10 Ndjambi ongu hongorera
ominyo vyoviutwa vye;
nomuinyo womundu auhe u ri meke re.
11 Nungwari eraka rwoye otja punga
ari rora omutjato wovikurya,
omatwi woye wina opunga aye
tjaterwa okuzuva omambo.
12-13 “Ovakurundu ve nounongo;
nungwari Ndjambi
u nounongo nomasa.
Ovakurundu ve nondjiviro;
nungwari Ndjambi u nondjiviro
nomasa okutjita tji ma vanga.
14 Ndjambi tja haṋa,
owaṋi ngu ma sora okutungurura,
nu owaṋi ngu ma kutura omundu
Ndjambi ngwa patere motjovakamburwa?
15 Ourumbu u ya indu Ndjambi
tje ha rokisire ombura;
omipupo vi ya indu eye tja pupisa omeva.
16 Ndjambi omunamasa,
nu aruhe ongu toṋa;
omundu oongu tjitwa ovineya na
ingwi ngu tjita ovineya
aveyevari ve ri mouvara we.
17 “Eye ma isa po ounongo wovahona,
nu ma yovaparisa
ovanane moviungura vyawo.
18 Eye ma isa ko ozombara
kovihavero vyazo
ne ze tjiti ovapandekwa;
19 Eye ma susuparisa
ovapristeri novanauvara.
20 Eye ma mwinisa ovandu
ovakwao mu ve nongamburiro,
na isa po ounongo wovanene.
21 Eye ma yamburura ovatjiukwa,
na yandisa omasa wovanane.
22 Eye ma hindi ondjerera koṋa ku
kwa zorera tjinene.
23 Eye ma zeuparisa
oviwaṋa nokuvipa ouvara,
nungwari tjazumba me
vi havere ne vi nyono.
24 Eye ma yovaparisa ovanane
vavyo ne ve pambaukisa,
nga tji va kapandjara.
25 Owo mave tambatamba monḓorera
nave teratera otja ovandu
mba ṱomanuwa omazeu.
© Herero Revision Bible © Bible Society in Namibia, 2021.
