Sofar ma ziri Job
1 Tjazumba Sofar, Omunaama, wa zira a tja:
2 “Kape nomundu ngu ma
ziri koviporoporo avihe mbi are?
Hapo okuhungira tjinene nai ku
eta omundu kousemba are?
3 Job, ove mo ripura kutja katu
nokusora okukuzira are?
Nokutja omambo woye omanyekerere
maye tu pata okuhungira are?
4 Ove mo kara pokutja imbi
mbi mo hungire ouatjiri,
nokutja oove omuhinandjo
komurungu wa Ndjambi.
5 Arikana, ami me zeri kutja andakuzu
Ndjambi ongu me ku ziri!
6 Eye atja yenena okukuraera kutja pe
nomihingo omingi okuvaza kounongo,
nokutja pe noviṋa oviundikwa
tjinene komundu okuvitjiwa.
Ndjambi me ku vere kehi
yaindu tji u sokuverwa.
7 “Ove nai mo yenene okukonḓonona
oviundikwa vyounene
novyouvara wa Ndjambi are?
8 Evaverwa kandi ri omaandero wa Ndjambi,
nungwari oro ri ri kombanda
yomavazero woye.
Ndjambi ma tjiwa otjovakoke,
nungwari ove ko nokutjitjiwa.
9 Ounene wa Ndjambi oure pouye,
owo ouparanga pokuvare.
10 Ndjambi tje ku kambura ne
ku twara kombanguriro,
owaṋi ngu me mu tjaere?
11 Ndjambi u tjiwa kutja ovandu
veṋe mbe ri oviporoporo;
neye u muna ozondjito zawo azehe zouvi.
12 Eyova mari sora okurira enandjiviro are?
Ongoro mai sora okukwata omundu are?
13 “Tanaurira omutima woye kousemba,
Job. Roporora omaoko woye ku Ndjambi.
14 Isa mo ouvi nozondataiziro monganda yoye,
15 nu tjiri, ove mo kara mouye
nonḓakameno nokuhenandira.
16 Tjazumba omaumba woye aehe otji
maye zengi momerizemburukiro woye,
tjimuna omipupo mbya kapita nu
mbi hi nokuzemburukwa rukwao.
17 Omuinyo woye mau yere tjinene
pondjerera yeyuva mutenya,
nozoiri ozonḓeu tjinene zomuinyo
maze yere otja eyuva tji mari piti.
18 Ove mo hupu nokuhinatjipo
nomaundjiro nga yenene;
Ndjambi me ku yama
nu me ku pe orusuvo.
19 Komoo tira ovanavita na ove;
ovandu ovengi mave
ningire ombatero kove.
20 Nungwari ovanauvi mave paha akuhe
nomerihahiziro nave munu
kutja kape nondjira yomatauriro.
Omaundjiro wawo nge ri po
okongwi okutja onḓiro mai ya.”
© Herero Revision Bible © Bible Society in Namibia, 2021.
