Jesus ma kamburwa
(Mt 26:47-56Mk 14:43-50Lk 22:47-53)1 Jesus tja zire nokuhungira omambo nga wa ire novahongewa ve munda mbwina yoruronḓu Kidron. Koṋa ngo kwa ri otjikunino, nu Jesus novahongewa ve arire tji va hiti mu tjo. 2 Nu Judas, omuhorore, aa tjiwa koṋa ngo, tjinga potuingi Jesus novahongewa ve aave hakaenene mbo. 3 Judas otja ya kotjikunino hi, e ri puna otjimbumba tjovarwe wovita vOvaroma novakarere tjiva vovapristeri oviuru novOvafarisei; owo ve ripangaṋene novirwise, nu va ri nomamunine. 4 Jesus aa tjiwa oviṋa avihe mbi mavi tjitwa ku ye, nopa ryamena komurungu ne ve pura a tja: “Mamu paha uṋe?”
5 Owo va zirire ave tja: “Matu paha Jesus wa Nasaret.”
Jesus a ziri a tja: “Owami ngu mbi ri ye.”
Nu Judas, omuhorore, wa kuramene mbo pu wo. 6 Jesus tja hungira ku wo a tja: “Owami ngu mbi ri ye.” Owo arire tji va yaruka ovihahambunda nave wire pehi. 7 Nu Jesus e ve pura rukwao a tja: “Mamu paha uṋe?”
Owo ave ziri ave tja: “Matu paha Jesus wa Nasaret.”
8 Jesus arire tja tja: “Mbe mu raere rukuru kutja owami ngu mbi ri ye. Nu tji mamu paha ami, ve eseye imba ovakwetu mba ve yende.” 9 Nomambo nga we ye hungirira kutja inga nga hungirire ye yenenisiwe, indu tja tjere: “Tate, pu imba mbu we ndji pa hi na umwe ngu mba pandjarisa.”
10 Simon Petrus, ngwa ri nengaruvyo, we ri homona a tono na ro omukarere wOmupristeri Otjiuru ne mu kondo okutwi kwokunene. Ena romukarere ngwi ra ri Malkus. 11 Jesus arire tja tja ku Petrus: “Yarura mo engaruvyo roye motjihweka! Mo tjangovasi hi nokunwa otjinwino tjomihihamo tji mba pewa i Tate are?”
Jesus komurungu wa Anas
12 Nu ovarwe wovita vOvaroma nomuhongore wawo novakarere vOvajuda arire tji va kambura Jesus, ave mu pandeke 13 nave tenge okumutwara ku Anas. Nu Anas wa ri ihe omukwe wa Kajafas ngwa ri Omupristeri Otjiuru mombura ndjo. 14 Kajafas ongwa rongere ovanane vOvajuda kutja okokuwa omundu umwe tji ma ṱire otjiwaṋa atjihe.
Petrus ma pataṋa Jesus
(Mt 26:69-70Mk 14:66-68Lk 22:55-57)15 Simon Petrus nomuhongewa omukwao va kongorerere Jesus. Omuhongewa omukwao ngwi aa tjiukwa i Omupristeri Otjiuru, nopa hitira na Jesus morupanda rwondjuwo yOmupristeri Otjiuru, 16 nungwari Petrus wa kuramene pendje pomuvero. Nomuhongewa omukwao arire tja piti, a hungire nomusuko ngwaa tjevere pomuvero na hitisa Petrus. 17 Omusuko wa hungirire ku Petrus a tja: “Ove wina kaove umwe wovahongewa vomundu ngo are?”
Petrus a ziri a tja: “Kako, kawami ko!”
18 Kwa ri ombepera, novakarere novatjevere va yakisire omuriro nave woto averi kamuseka. Petrus wa kakurama pu wo na woto.
Omupristeri Otjiuru ma pura Jesus
(Mt 26:59-66Mk 14:55-64Lk 22:66-71)19 Omupristeri Otjiuru wa purire Jesus ovahongewa ve nomahongero we. 20 Jesus wa zirire a tja: “Ami mba hungira ongahukiro kovandu. Aruhe ee ve hongere mozosinagoge na mondjuwo ya Muhona. Mu zo omu mu woronganena Ovajuda avehe. Ami hi notjiṋa tji mba hungira mongumumu. 21 Nu mo ndji purire tjike? Pura kovandu mba mbe ndji zuva ame hungire imbi mbi mbe ve raera. Owo mave tjiwa omambo ngu mba hungira.”
22 Jesus tja za nokuhungira omambo nga umwe wovatjevere, mba kuramene mbo, arire tje mu tono orupyu na tja: “Omupristeri Otjiuru mo mu zirire tjike nao?”
23 Jesus e mu ziri a tja: “Tji mba hungire navi, raera ovandu avehe mba. Nungwari tji mba hungire osemba, mo ndji tonene tjike?”
24 Tjazumba Anas arire tje mu hindi ku Kajafas, Omupristeri Otjiuru, ngunda a pandekwa nao.
Petrus ma pataṋa Jesus rukwao
(Mt 26:71-75Mk 14:69-72Lk 22:58-62)25 Nu Simon Petrus wa kuramene mbo ama woto omuriro. Ovakwao mba ri mbo arire tji va tja ku ye: “Ove wina kaove umwe wovahongewa vomundu ngo are?”
Nungwari Petrus wa pataṋa a tja: “Kako, kawami ko!”
26 Omukarere umwe wOmupristeri Otjiuru, ngwa ri omuhoko womukarere ngwi ngwa kondwa okutwi i Petrus, wa purire a tja: “Ami hi ku mwine puna ye motjikunino are?”
27 Petrus wa pataṋene rukwao, nu tjimanga ohunguriva arire tji ya vandara.
Jesus komurungu wa Pilatus
(Mt 27:1-2, Mt 11-14Mk 15:1-5Lk 23:1-5)28 Nu omuhuka omunene, Jesus tjaza ku Kajafas, wa twarerwe kondjuwo youhona komunane wOrukondwa. Ovanane vOvajuda kave hitire mondjuwo ndji, orondu aave vanga okukara ovakohoke, kokutja ve yenene okurya omariro wOpaska. 29 Pilatus arire tja piti a i ku wo na kapura a tja: “Omundu ngwi mamu mu pe ondjo yatjike?”
30 Owo ave mu ziri ave tja: “Andakuzu ka tjitire ourunde katjatu mu eta kove.”
31 Pilatus wa tjere ku wo: “Nu mu twareye mu kemupangure otja komatwako weṋu.”
Owo ave mu ziri ave tja: “Eṱe katu nousemba okuzepa omundu.” 32 Ihi tja tjitirwa kutja omambo wa Jesus ye yenenisiwe, inga nga hungirire tja raisire kutja ma ṱu onḓiro yomuhingo watjike.
33 Pilatus arire tja hiti rukwao mondjuwo youhona, a isana Jesus ne mu pura a tja: “Oove ngu u ri Ombara yOvajuda?”
34 Jesus wa zirire a tja: “Epuriro ndi mari zu move omuini poo ovandu varwe ombe ku raere ami?”
35 Pilatus a ziri a tja: “Mo tjangovasi owami Omujuda are? Otjiwaṋa tjoye omuini novapristeri oviuru ombe ku yandja ku ami. Wa ungura tjike?”
36 Jesus a tja: “Ouhona wandje kawouye mbwi. Andakuzu ouhona wandje owouye mbwi, ovendjikongorere atjave kondja kutja e ha yandjewa kovanane vOvajuda. Nungwari ouhona wandje kawamuno.”
37 Pilatus arire tje mu pura a tja: “Nu hapo oove ombara katjo?”
Jesus wa zirire a tja: “Opo mbo pu mo hee kutja owami ombara. Otjiṋa hi otji mba kwaterwa notji mbe era mouye, kokutja mbi hongonone ouatjiri. Auhe ngwa za mouatjiri ma puratene komambo wandje.”
38 Pilatus a ziri a tja: “Imbwi ouatjiri otjikeṋa?”
Jesus ma pangurwa kokuṱa
(Mt 27:15-31Mk 15:6-20Lk 23:13-25)Nu Pilatus tja za nokuhungira omambo nga arire tja piti rukwao a i kOvajuda na katja ku wo: “Ami hi nokumuna ondjo mu ye. 39 Nungwari otja pu mwa iririra, ami aruhe mbi mu kuturira omupandekwa umwe momayuva omanene wOpaska. Mamu vanga kutja mbi mu kuturire Ombara yOvajuda?”
40 Owo ve mu zirire amave ravaere nai: “O kutura omundu ngo, nungwari kutura Barabas!” Nu Barabas wa ri omupunde woviṋa.
© Herero Revision Bible © Bible Society in Namibia, 2021.
