Onḓiro ya Lasarus
1 Omundu wena Lasarus wa verere. Eye wa ri owa Betanie, otjihuro mu mwa turire Maria nomuangu we Marta. 2 Maria eye ngwi ngwa twirisire Muhona nomaze omavawa, nu ngwa pyoṋene ozombaze za Muhona nozondjise ze. Nu Lasarus ngwa verere wa ri omuṱena wa Maria. 3 Ovaṱena kwe arire tji va hindi omundu ku Jesus nomambo nga: “Muhona, epanga roye esuverwa ra vera.”
4 Nu Jesus tja zuvire omambo nga arire tja tja: “Omutjise mbwi kawokuṱa kwa Lasarus, nungwari owo wa tjitirwa omaraisiro womasa wa Ndjambi, kokutja Omuna wa Ndjambi a yozikwe mu wo.”
5 Jesus wa suverere Marta nerumbi re na Lasarus. 6 Nungwari tja zuva kutja Lasarus wa vera, arire tja kara ngo ka ri oure womayuva yevari. 7 Tjazumba a tja kovahongewa ve: “Indjeye tu yaruke kOjudea.”
8 Ovahongewa ave ziri ave tja: “Muhonge, eyuva ndina Ovajuda ave vanga okukuzepa nomawe, nu nambano mo yaruka ngo rukwao are?”
9 Jesus wa tjere: “Inḓa ozoiri omutenya kamurongo na mbari are? Ingwi ngu ma ryanga mutenya ke nakuputara, eye tjinga ama munu ondjerera youye mbwi. 10 Nungwari tji ma ryanga uṱuku ma putara, tjinga e hi nondjerera.” 11 Jesus wa hungirire omambo nga, okuzambo a tja: “Epanga retu Lasarus wa rara, nungwari ami me kemupendura mozomboṱu.”
12 Ovahongewa ave ziri ave tja: “Muhona, eye tja rara, ma veruka.”
13 Jesus aa hee kutja Lasarus wa ṱu, nungwari owo aave tjangovasi eye ma hee okurara ozomboṱu uriri. 14 Jesus arire tje ve raere ongahukiro a tja: “Lasarus wa ṱu, 15 nu motjimbe tjeṋu ami me nyanda omutima kutja himba ri po, kokutja eṋe mu kambure mu ami. Nungwari indjeye tu yende ku ye.”
16 Nu Tomas ngu ku za oDidimus a tja kovahongewa ovakwao: “Eṱe wina ngatu yende tu kaṱe puna ye!”
Jesus ombendukiro nomuinyo
17 Nu Jesus tje ere, arire tja vaza Lasarus a ri omayuva yane meyendo. 18 Betanie tja ri popezu na Jerusalem, oure wozokirometa mangara ndatu, 19 nOvajuda ovengi ve ere ku Marta na Maria okuyekuvehuhumiṋa onḓiro yomuṱena kwawo.
20 Marta tja zuvire kutja Jesus u ri mondjira, arire tja piti okukemutjakanena, nungwari Maria eye wa kara pehi mondjuwo. 21 Marta wa tjere ku Jesus: “Muhona, ove andakuzu wa ri mba omuṱena kwandje katja ṱa! 22 Nungwari ami me tjiwa kutja nangarire nambano nai Ndjambi me ku pe ngamwa atjihe tji mo mu ningire.”
23 Jesus e mu raere a tja: “Omuṱena kwoye ma penduka movakoke.”
24 Marta a ziri a tja: “Ami me tjiwa kutja eye ma penduka movakoke meyuva esenina.”
25 Jesus arire tja tja ku ye: “Owami ombendukiro nomuinyo. Ngu ma kambura mu ami ma kara nomuinyo nangarire kutja wa ṱu. 26 Nu ngu nomuinyo na kambura mu ami kamaa ṱu nga aruhe. Mo kambura momambo nga are?”
27 Marta a ziri a tja: “Ii, Muhona, ami mba kambura kutja oove Omutwirisiwa, Omuna wa Ndjambi, ngu kwa za moo ya mouye.”
Jesus ma ṱoruhoze
28 Marta tja za nokuhungira omambo nga, wa yarukire a kaisana erumbi re Maria mongumumu ama tja: “Omuhonge weya, nu me ku vanga.” 29 Nu Maria tja zuva omambo nga, wa sekama na hakahana okukatjakanena Jesus. 30 Nu Jesus tjandje nao keye ya motjirongo, nungwari wa ri koṋa ngwi Marta ke kemutjakanenena. 31 Ovajuda, mba ri puna Maria mondjuwo, nu mbaa ve mu huhumiṋa, ve mu kongorera tji ve mu muna ama sekama nokuhakahana okupita. Owo aave tjangovasi ma i keyendo okukaririra ngo.
32 Nu Maria tje ya koṋa ku kwa ri Jesus, ne mu munu, arire tja u pehi pozombaze ze na tja: “Muhona, ove andakuzu omu wa ri mwi, omuṱena kwandje andakuzu ka ṱire!”
33 Jesus tja munine Maria ama riri, nOvajuda mba mbe mu kongorera wina amave riri, arire tja kurungisiwa tjinene mombepo, 34 na pura a tja: “Mwe mu paka pi?”
Owo ave ziri ave tja: “Muhona, indjo u katare.”
35 Nu Jesus wa rira. 36 Ovajuda arire tji va tja: “Tareye tje mu suverere tjinene!”
37 Novakwao wina va tjere: “Kaye ngwi ngwa paturura omeho womupoṱu are? Nokutjavi tja yandjere kutja Lasarus a ṱe?”
Lasarus ma pendurwa komuinyo
38 Nu Jesus wa kurungisirwe rukwao mombepo tje ere peyendo. Oro ra ri ondimba, nu potjinyo pa twirwe ewe. 39 Jesus arire tja tja: “Kunguzureye ewe mu ise po!”
Nu Marta, omuṱena waingwi omuṱi, a ziri a tja: “Muhona, nai orutu ru sokuzunḓaka, tjinga arwa tjiti omayuva yane meyendo!”
40 Jesus wa tjere ku ye: “Ami hi ku raerere kutja tji wa kambura, mo munu omasa wa Ndjambi tji maye riraisa are?” 41 Owo arire tji va kunguza indi ewe ave isa po. Nu Jesus wa era omeho we kombanda na tja: “Tate, me tja okuhepa kove kutja we ndji zuvire. 42 Me tjiwa kutja ove aruhe u ndji zuvira, nungwari omambo nga me ye hungirire ovandu, mba kurama mba, kokutja owo ve kambure kutja ove we ndji hinda.” 43 Nu tja zu nokutja nai, a ravaere neraka enene a tja: “Lasarus, penduka u pite!” 44 Omuṱi arire tja piti, omake nozombaze ze avya mangwa mombanda yombakero, nomurungu we awa kutjirwa nerapi. Tjazumba Jesus e ve raere a tja: “Iseye ko indji ombanda nerapi, nu mu mu ese a yende.”
Omerikutirokumwe wokuzepa Jesus
(Mt 26:1-5Mk 14:1-2Lk 22:1-2)45 Ovajuda ovengi mbe ere ku Maria, nu mba munine imbi Jesus mbya tjita, va kambura mu ye. 46 Nungwari tjiva va ire kOvafarisei nave keve raera imbi Jesus mbya tjita. 47 Ovapristeri oviuru nOvafarisei otji va woronganisa otjira tjOvajuda nave tja: “Ngatu tjite vi? Omundu ngwi ma tjiti ovihimise ovingi. 48 Tji twe mu tarere ama tjiti nao, ovandu avehe mave kambura mu ye, novanane vOvaroma mave ya okuhaṋa poṋa petu opayapuke nokunyona otjiwaṋa tjetu!”
49 Umwe wawo wena Kajafas, mombura ndjo ngwa ri Omupristeri Otjiuru wa tjere: “Eṋe kamu na tji mu tjiwa! 50 Kamu nokutjiwa kutja okokuwa ku eṋe omundu umwe tji ma ṱire otjiwaṋa komeho yonyonokero yotjiwaṋa atjihe are?” 51 Nomambo nga eye ke rihungirire omuini; nu tjinga a ri Omupristeri Otjiuru mombura ndjo, wa uka kutja Jesus ma ṱire Ovajuda. 52 Nu ka Vajuda porwe eye mbu ma ṱire, nungwari eye ma wongere pamwe ihi otjiwaṋa atjihe tja Ndjambi tji tja rimbara.
53 Okuza keyuva ndo ovanane vOvajuda otji va paha omuhingo wokuzepa Jesus. 54 Jesus otja uta okuryanda mohoreka mehi ra Judea, na zu mo a i korukondwa rumwe rwehi popezu nokuti onguza, kotjirongo tjena Efraim, narire tja kakara ngo puna ovahongewa ve.
55 Nomayuva omanene wOpaska ya ri popezu. Novandu okuza komaturiro wokuti ngo ve ere kOjerusalem komerikohororero, Omayuva omanene nga ngunda aye hiye ya. 56 Owo aave paha Jesus, nu ngunda ava woronganene mondjuwo ya Muhona, arire tji va purasana ave tja: “Mamu ripura vi? Eye kemee ya kOpaska nu?” 57 Ovapristeri oviuru nOvafarisei va rakizire kutja auhe ngwa munu Jesus poṋa pe ri a sokukemuhorora, kokutja owo ve kemukambure.
© Herero Revision Bible © Bible Society in Namibia, 2021.
