Jerusalem tja koverwa i ovanavita
1 Tjiwaṋa tja Benjamin, taurireye kondjamo! Heneye mOjerusalem! Posiseye ohiva mOtekoa, nu mu zike mo otjihako tjomuriro mObet-Hakerem! Otjiwonga nomanyoneno omanene vi ri pokuya okuza komukuma wokokunene kweyuva. 2 Otjihuro tja Sion otjiwa otjimanise, nungwari ami me tji yandeke; 3 ozombara maze ya okutura mo novimbumba vyazo vyovita. Maze tono ozondanda okukondorokisa otjihuro, nu auhe ma katura puma vanga. 4 Ozo maze tja nai: “Rirongereye, mu karwise Jerusalem! Riṱuneye! Matu ketjirwisa mutenya!” Nungwari tjazumba ozo maze tja nai: “Owee, oruveze rwa kapita, eyuva ri ri pokutoka, novizire vyomapeta mavi rire ovire. 5 Riṱuneye! Matu ketjirwisa ouṱuku; eṱe matu kahahaura ozondjuwo zatjo zouhona.”
6 Muhona Omunamasaaehe wa rakiza ozombara nḓa okuka omiti nokutunga ozondunduvahi okukovera Jerusalem. Eye wa tja nai: “Ami me vere otjihuro hi, orondu otjo tje ura nomaṋiṋikiziro. 7 Otja ondjombo punga ai ṱakamisira omeva wayo koupe, Jerusalem opunga atji ṱakamisira ouvi watjo koupe. Ami me zuu outwe nomaṋiṋikiziro motjihuro; akuhe me munu ko omitjise novirwaro porwavyo. 8 Vature va Jerusalem, oumba mbwi ngau rire omaronga ku eṋe, tjapo ami me mu pe etambo; ami me tjiti otjihuro tjeṋu okurira okuti onguza, poṋa pu pe hi na maape tura ovandu.”
Israel otjiwaṋa otjipirukire
9 Muhona Omunamasaaehe wa tja nai ku ami: “Israel matji kohororwa tjimuna omuvite ku kwa nikorwa omandjembere aehe. Otji mo sokuyama auhe ngu mo sora, ngunda ape noruveze.”
10 Ami mba zira nai: “Owaṋi ngu ma puratene ku ami tji me hungire ku wo nokuveronga? Owo ovirangaranga, nu ve panḓa okuzuva ombuze yoye; owo ve yora imbi ove mbi we ndji raera kutja mbi ve tjivise, nu kave nonyuṋe mu vyo. 11 Omazenge woye ku wo ye ndji nyosa momutima wandje wina, Muhona; nu ami hi nokusora okuyeyarura pehi.”
Muhona wa tja nai ku ami: “Tirira omazenge wandje kovanatje momivanda na poṋa pu pe woronganena omitanda. Ovarumendu novakazendu mave huurwa, nangarire omukururume ke nokuyamwa. 12 Ozondjuwo zawo maze yandjewa ku varwe, nomahi wawo womakunino novakazendu vawo wina. Ami me kavera ovandu avehe, mba tura mehi ndi. 13 Auhe, omunene nokaṱiṱi, u kara neraru rovimariva vyouhasemba, nangarire ovaprofete novapristeri ve tikura ovandu. 14 Owo ve tjita aayo ovirwaro vyotjiwaṋa tjandje vya ri ozonganununa uriri. Owo ve tja: ‘Ohange! Ohange’, nungwari tjandje kape nohange. 15 Va ṱohoṋi mena rokutja va tjita oviṋa oviyaukise mbi are? Kako, owo kave ṱire ohoṋi oparukaze; kamaave raisa ohoṋi yawo. Nowo otji mave u otja imba ovakwao tji va wa; ami tji mbe ve vere, ma rire ondjandero yawo. Ami, ngu mbi ri Muhona, owami ngu mba hungire.”
Israel ma imbirahi ondjira ya Ndjambi
16 Muhona wa tja nai kotjiwaṋa tje: “Kurameye pomahakaeneno wozondjira, nu mu yevayeve. Konḓononeye ozondjira ozonguru, na pu pe nondjira, ndji yenda kouṋingandu. Ryangeye mu yo, neṋe mamu kara norusuvo.”
Nungwari otjiwaṋa tja tja nai: “Ayee, kako, katu nokuryanga mu yo!” 17 Muhona otja zika ovatjevere kutja ovandu ve puratene kombosiro yohiva. Nungwari owo va tja: “Eṱe katu nokupuratena ko.”
18 Muhona arire tja tja: “Purateneye, eṋe viwaṋa, nu mu zuve imbi mbi mavi tjitwa kotjiwaṋa tjandje. 19 Purateneye, eṋe mahi! Ami me eta otjiwonga kotjiwaṋa hi kutja tji rire omberero komeripuriro wawo omavi aehe, owo tjinga ava imbirahi omahongero wandje nave ha karere nonḓuviro komambo wandje. 20 Mbi na ko na tja novyomoro omuwa mbi ve ndji etere okuza kOseba poo novizumba vyehi rokokure are? Ami hi nokuyakura ko ozombunguhiro zawo ozoningiririsiwa, nu hi nonyuṋe mozombunguhiro zawo zovinamuinyo. 21 Nu ami otji me putarisa otjiwaṋa hi, notjo matji u. Ooihe novanatje vawo mave ṱu, nomapanga novararanganda wina.”
Omarwisiro okuza komukuma wokokunene kweyuva
22 Muhona ma tja nai: “Otjiwaṋa matji zu kehi rokeyuva kokunene; otjiwaṋa otjinamasa tjokokure matji rirongerere ovita. 23 Owo va toora omauta nomangaruvyo wawo; owo ovanautwe, nu kave notjari. Ve hwaara tjimuna ozongazona zokuvare, tji mave kavire oukambe wawo nu ve rirongerera okurwisa Jerusalem.”
24 Ovature va Jerusalem mave tja nai: “Eṱe twa zuva ombuze ndji, narire tji twe rihahiza; eṱe twa wirwa i ombamisiro nomihihamo tjimuna ozongama zomukazendu mombandukiro. 25 Eṱe katu sokuyenda pendje mokuti poo okuryanga mozondjira, ovanavita na eṱe tjinga ave ripangaṋa novirwise, nomburuma aye tu wira.”
26 Muhona ma tja nai kotjiwaṋa tje: “Rizariseye ozombanda zomakutu nu mu rangere momutwe. Kareye noruhoze orunene otja omundu tji ma riri omuatje we omuzandu omukwatwa erike, orondu ingwi ngu meya okumuyandeka ma rwisa tjimanga. 27 Jeremia, rora otjiwaṋa tjandje otja tji mo roro otjitenda, u mune kutja otjo tja sana pi. 28 Otjo atjihe otjirangaranga otjipirukire, otjikukutu tjimuna ongoporo notjitenda. Otjo tja zunḓaka, nu tji taka omambo. 29 Omupepo u rurumisa omuriro nomasa, nungwari ovitenda mbya imbirahiwa kavi zuzuka nu kavi zu po. Kahepero okukara pokukohorora otjiwaṋa tjandje, orondu imba ovanauvi kave nokuisiwa mo mu tjo. 30 Owo mave isanewa kutja ‘Osilveri ndja imbirahiwa,’ orondu ami, ngu mbi ri Muhona, owami ngu mbe ve imbirahi.”
© Herero Revision Bible © Bible Society in Namibia, 2021.
