Jeremia 44 - Herero Revision Bible (HRR)

1 Muhona wa hungira notjinyo tjandje kOvaisrael avehe, mba tura mOengipte movihuro mbi ooMigdol na Takpanhes na Memfis, na motukondwa twokeyuva kokumuho kwehi. 2 Muhona Omunamasaaehe, Ndjambi wa Israel, wa tja nai ku ami: “Eṋe oveni mwa muna omanyoneno ngu mba eta kOjerusalem na kovihuro ovikwao avihe vya Juda. Nandarire nambano ovyo omatundu, nu kape na umwe ngwa tura mu vyo. 3 Ihi tja tjitwa nai, ovature vavyo tjinga ava tjitire ourunde, nu ave ndji pindikisire mokupunguhira oomukuru varwe ozombunguhiro na mokukarera oomukuru, owo na eṋe nooiho mukururume mbu mu hi na mwe ve tjivirwe. 4 Ami mba kara pokumutumina ovakarere vandje avehe, imba ovaprofete, mbe mu raera kutja amu ha tjiti oviṋa oviyaukise ami mbi mba tonda. 5 Nungwari eṋe kamu puratenene ko, nu kamu ningire ko na tja. Eṋe kamu isire ozondjito zeṋu ozombi zokupunguhira oomukuru varwe ozombunguhiro. 6 Ami otji mba tirira omazenge nomapindi wandje kovihuro vya Juda na momivanda vya Jerusalem, ne vi nyosa nomuriro. Ovyo vya isiwa omatundu navi rire ombunikiro ondjaukise otja tjinga avi ri ndinondi.

7 “Komuhingo mbwi ami, ngu mbi ri Muhona Omunamasaaehe, Ndjambi wa Israel, me pura nambano kutja okutjavi tji mu ritjitira oviṋa ovivi otja imbi. Mu vanga okueta oviwonga kovarumendu novakazendu novanatje novanyame kutja ape ha hupu umwe wovandu veṋu are? 8 Eṋe mu ndji pindikisira tjike tji mu rikotamena koviserekarera vyovisenginina mokupunguha ozombunguhiro koomukuru varwe muno mOengipte mu mwe ya okutura? Mwa tjitira kutja mu rinyone oveni, kokutja oviwaṋa avihe mouye vi mu nyekerere nu vi ungurise ena reṋu otja osengiro are? 9 Mwa zemba ozondjito azehe zourunde, nḓa tjitwa movihuro vya Juda, na momivanda vya Jerusalem i ooiho mukururume nozombara za Juda novakazendu vazo, na eṋe novakazendu vazo, na eṋe novakazendu veṋu are? 10 Nungwari eṋe nga ku ndinondi kamuye risusuparisa. Kamuye ndji yozika, nu kamuya ṱakamisa omatwako nomazikamisiro wandje ngu mba yandjere ku eṋe na kooiho mukururume.

11 “Ami, ngu mbi ri Muhona Omunamasaaehe, Ndjambi wa Israel, otji me taurire mu eṋe, nu e yandeke otjiwaṋa tja Juda atjihe. 12 Ami me yandeke Ovajuda avehe, mba sewa po nu mbe rimanene okukatura kOengipte. Avehe vawo, ovanene nouṱiṱi, mave kokere mOengipte, nu mave ṱu movita poo i ondjara. Owo mave rire ombunikiro ondjaukise; ovandu mave ve nyekerere nu mave ungurisa ena rawo otja osengiro. 13 Otja punga amba verere Jerusalem novita nondjara nomutjise omuzeu, opunga ame vere imba Ovajuda mba tura mOengipte. 14 Kape na umwe wawo ngwe ya kOengipte okuyekutura, ngu ma taura poo ngu ma hupu. Kape na umwe wawo ngu ma yaruka kOjuda, ku ve zera okukatura rukwao. Kape na ngu ma yaruka posi yovataure tjiva.”

15 Ovarumendu avehe, mbaa ve tjiwa kutja ovakazendu vawo ave punguhire oomukuru varwe ozombunguhiro, novakazendu avehe, mba kuramene mbo, nOvaisrael mba turire komukuma wokeyuva kokumuho kwa Engipte, avehe kumwe, mba ri otjimbumba otjinene, va tja nai ku ami: 16 “Eṱe matu panḓa okupuratena komambo ngu we tu raera mena ra Muhona. 17 Eṱe matu tjiti oviṋa avihe mbi twa tja matu tjiti: Matu twimisa ovyomoro omuwa komukuru wetu Ombara Oserekaze yEyuru, nu matu i tiririre ozombunguhiro zomavinu tjimuna eṱe nootate mukururume nozombara zetu novahongore vetu tjiyatu tjiti movihuro vya Juda na momivanda vya Jerusalem. Momayuva ngo eṱe twa ri novikurya ovingi, twa ningaparere nu katwa ri noumba. 18 Nungwari okuza ndi tji twa isa okutwimisira omukuru wetu Ombara Oserekaze yEyuru ovyomoro omuwa, na indu tji twa isa okuitiririra ozombunguhiro zomavinu, otji twa yaruka okukara nouhepe, novandu vetu va ṱa movita nokuṱa i ondjara.”

19 Novakazendu va weza okuhungira ave tja: “Eṱe tjiyatu tereke omavanda, nga ri nosaneno yOmbara Oserekaze yEyuru, nokuitwimisira ovyomoro omuwa nokuitiririra ozombunguhiro zomavinu, ovarumendu vetu ave tjaterwa i imbi mbi matu tjiti.”

20 Ami arire tji mba ziri otjiwaṋa atjihe, ovarumendu novakazendu, novandu avehe mbe ndji zira komuhingo mbo, e tja: 21 “Ozombunguhiro eṋe nooiho mukururume nozombara zeṋu novahongore veṋu novandu avehe vehi nḓuyamu punguhire movihuro vya Juda na momivanda vya Jerusalem, mamu tjangovasi Muhona keeze tjiwa poo we ze zemba are? 22 Meyuva tjingero ndo ehi reṋu otji ra rira ongaango namu ha tura omundu. Oro ra rira ombunikiro ondjaukise, novandu ve ungurisa ena raro otja osengiro, Muhona tjinde e hi nokuuhara ama zara ozondjito zeṋu ozombi ozondjaukise. 23 Oumba mbwi wa nambano weya ku eṋe, tjinga amwa twimisira oomukuru varwe ovyomoro omuwa, namwa tura ondjo komurungu wa Muhona mokuhinokukara nonḓuviro komatwako na komazikamisiro na komaraerero we aehe.”

24-25 Ami mba raera otjiwaṋa atjihe, tjinene ovakazendu avehe, omambo, nga hungirwa i Muhona Omunamasaaehe, Ndjambi wa Israel, kotjiwaṋa tja Juda atjihe tji tji tura mOengipte, indu tja tja nai: “Eṋe novakazendu veṋu mwa tjita omakwizikiro omanene kombara Oserekaze yEyuru. Eṋe mwa kwizika kutja mamu i twimisire ovyomoro omuwa, nokutja mamu i tiririre ozombunguhiro zomavinu; nu mwa yenenisa omakwizikiro weṋu nga. Osemba, vari! Ṱakamiseye omakwizikiro weṋu. Yeneniseye otuyano tweṋu! 26 Nungwari nambano purateneye koruyano ami, ngu mbi ri Muhona, ndu mba tjita mena randje enamasa ku eṋe Ovaisrael amuhe moengipte: Ami himee yandjere rukwao ngamwa auhe weṋu okutamuna ena randje mokutjita oruyano ama tja: ‘Ami me yana ku Muhona Ndjambi omunamuinyo!’ 27 Orondu ami hi nakumuṋingaparisa rukwao, nungwari me mu yandeke. Amuhe mamu tu movita poo mamu ṱu i ondjara, nga tji pe hi nokusewa omundu. 28 Nungwari tjiva veṋu mave taurire onḓiro nave yaruka kOjuda okuza kOengipte. Tjazumba imba mba hupu, mave tjiwa kutja omambo nge nouatjiri owauṋe, owandje poo owawo. 29 Ami, ngu mbi ri Muhona, me mu pe otjiraisiro tjokutja me mu verere mehi ndi, nokutja omakwizikiro wandje wokumuyandeka maye yenenisiwa. 30 Ami me yandja Hofra, ombara ya Engipte, kovanavita na ye mbu mave vanga okumuzepa tjimuna tji mba yandjere Sidkija, ombara ya Juda, mouvara wa Nebukadnesar, ombara ya Babilon, ngwa ri omunavita na ye, nu ngwa vangere okumuzepa.”