Omakotokero wa Israel konganda
1 Muhona ma tja nai: “Omayuva maye ya ami mu me rire Ndjambi womihoko avihe vya Israel, novyo mu mavi rire otjiwaṋa tjandje. 2 Mokuti onguza ami mba raisire otjari kovandu mba mbe ha ṱire movita. Otjiwaṋa tja Israel tji tja zera okumuna orusuvo, 3 ami mbe rimunikisa ku tjo ambi ri kokure. Tjiwaṋa tja Israel, ami mbe ku suvera norusuvero orukarerere, nu aruhe me karerere pokukuraisira ondjingonekero yandje. 4 Israel, musuko omusuverwa, ami me ku tungurura rukwao, mo toora ovihumba no kumbu nondjoroka rukwao. 5 Mo kunu rukwao omivite kozondunda za Samaria, nu imba mbu mave vi kunu mave ri ovihape vyavyo. 6 Tjiri, eyuva mari ya ovatjevere mu mave ravaerere kozondunda za Efraim amave tja: ‘Ngatu ronde kOsion, ku Muhona, Ndjambi wetu!’ ”
7 Muhona ma tja nai:
“Imburireye Israel nondjoroka,
nu yorokereye Israel tji tji ri tjinenenene poviwaṋa avihe.
Imbureye eimburiro reṋu rondangero amamu ravaere nai:
‘Muhona wa yama otjiwaṋa tje;
eye wa yama avehe mba sewa po’.
8 Ami meve eta okuza komukuma wokeyuva kokunene,
nu meve woronganisa okuza komaandero wehi.
Ovapoṱu novaremane mave ya puna wo,
novakazendu ovingundi novamwari wina.
Owo mave kotoka averi otjiwaṋa otjinene.
9 Otjiwaṋa tjandje matji kotoka ama tji riri,
nami me tji hongorere nomavanḓiparisiro.
Ami me tji hongorere komipupo vyomeva,
mondjira oseruke mu tji hi nokuputara.
Ami mbi ri otja ihe ku Israel,
nu Efraim eye omuzandu wandje otjiveri.”
10 Muhona ma tja nai:
“Viwaṋa, purateneye ku ami,
nu mu kazuvarise omambo wandje
komakoverwa hi wokokure.
Ami mba rimba otjiwaṋa tjandje Israel,
nungwari me tji woronganisa,
nu me tji risa otja omurise tje risa ozonyanda ze.
11 Ami mba kutura otjiwaṋa tja Israel,
nu mbe tji yama komuhoko omunamasa tjinene.
12 Otjo matji ya, atji imbura
nondjoroka kondundu ya Sion
natji yorokere oviyandjewa vyandje,
okutja ovikokotwa nomavinu,
nomaze womiṋinga,
nozonyanda nozongombe.
Otjo matji sana kotjikunino tji tja tjatjwa nawa;
matji kara noviṋa avihe, mbi matji hepa.
13 Ovasukona mave pundu nave nyanda,
novarumendu omitanda novakururume mave yoroka wina.
Ami meve huhumiṋa,
nu me rundurura oruhoze rwawo aru rire ondjorokero,
nondjenda yawo ai rire enyando.
14 Ami me kutisa ovapristeri novikurya oviwaviwa,
nu me wokisa otjiwaṋa tjandje
noviyandjewa vyondaya yandje.
Ami, ngu mbi ri Muhona,
owami ngu mba hungire.”
Otjari tja Muhona ku Israel
15 Muhona ma tja nai:
“Eraka mari zuvaka mOrama,
ombosiro yoruhoze orutetarise.
Rahel ma ririre ovanatje ve;
owo kave tji po,
neye ma panḓa okuhuhumiṋiwa.
16 Isa okurira, nu u pyoṋe omahoze woye!
Avihe, mbi wa tjitira ovanatje voye,
mo mwine po ondjambi;
owo mave kotoka okuza kehi rovanavita.
17 Pe nomaundjiro kozondekurona zoye;
ovanatje voye mave kotoka konganda.
Ami, ngu mbi ri Muhona,
owami ngu mba hungire.
18 “Ami me zuu otjiwaṋa tja Israel ama tji tja nai moruhoze:
‘Muhona, eṱe twa ri otja ondwiyona, ndji hiya zeyewa,
nungwari ove we tu vyura, neṱe atu kara nonḓuviro.
Tu yarura; eṱe twe rirongere okuritanaurira kove,
ngu u ri Muhona, Ndjambi wetu.
19 Eṱe twa poka kove,
nungwari tjimanga atu vanga okuritanaura.
Tji twa za nokuritanaura,
otji twa roporora oviuru vyetu moruhoze.
Eṱe twa ṱohoṋi nu twa yamburuka,
orondu twa tura ondjo indu tji twa ri omitanda.’
20 “Israel, oove omuzandu wandje omusuverwa,
omuatje ngu mba suvera tjinene.
Aruhe tji me tamuna ena roye,
mbi ripura na ove ambi norusuvero.
Omutima wandje we riyandja move.
Ami me kara notjari na ove.
21 Rizikira ovisanekero noviurike vyondjira;
ṱakamisa nawa ondjira,
ndji wa twara.
Kotoka, tjiwaṋa tja Israel,
kotoka konganda, kovihuro vyeṋu ku wa za.
22 Mo ivaiva nao nga ruṋe, tjiwaṋa otjihinauṱakame?
Ami mba uta otjiṋa otjipe,
nu tji tji ha sanene kovikwao
tjimuna omukazendu ama paha omurumendu.”
Ouṋingandu wotjiwaṋa tja Ndjambi moruveze ndu maru ya
23 Muhona Omunamasaaehe, Ndjambi wa Israel, ma tja nai: “Ami tji mba yarura ko otjiwaṋa mehi ratjo, otjo matji tja nai rukwao mehi ra Juda na movirongo vyaro:
‘Muhona nga sere ondundu ondjapuke ya Jerusalem ondaya,
poṋa popayapuke eye pe tura.’
24 Ovandu mave tura mehi ra Juda na movirongo vyaro avihe, nu mu ro mamu kara ovakune novarise vozonyanda puna otupanda twawo. 25 Ami me suvisa imba mba urwa, nu e parura ngamwa auhe ngwa ngundiparisiwa i ondjara. 26 Ovandu otji mave tja nai: ‘Ami mba karara, nu e penduka amba suva.’
27 “Ami, ngu mbi ri Muhona, me tja omayuva maye ya ami mu me urisa ehi ra Israel nora Juda novandu novinamuinyo. 28 Notja tjinga amba kara nomatweho okuvezukura nokuvenakaura nokuvevanda pehi nokuveyandeka nokuvehahaura, wina otjinga ame kara nomatweho okuvekuna nokuvetunga. 29 Omayuva ngo tji ye ya, ovandu kamaave uhara amave tja:
Ooihe va rya omandjembere omangura,
nungwari omayo wovanatje onga kahara ouwe!
30 Moruveze rwanao, auhe ngu ma ri omandjembere omangura, omayo we maye hara ouwe; nauhe ma ṱire ouvi we omuini.”
31 Muhona ma tja nai: “Omayuva maye ya ami mu me tjiti omerikutiropamwe notjiwaṋa tja Israel notja Juda. 32 Owo kaye nokusana nomerikutiropamwe nga omakuru ami ngu mba tjitire nooihe mukururume meyuva ndi ndi mbe ve kamburire pomake ne ve pitisa mehi ra Engipte. Nangarire kutja ami mba ri omuhona wawo, owo va teya omerikutiropamwe nga. 33 Omerikutiropamwe omape ngu me tjiti notjiwaṋa tja Israel, owo nga: Ami me twa mo omatwako wandje moukoto wawo, nu me ye tjanga momitima vyawo. Ami me rire Ndjambi wawo, nowo mave rire otjiwaṋa tjandje. 34 Kape na umwe wawo ngu ma hongo omuraranganda na ye poo omuzamumwe we ama tja: ‘Tjiwa Muhona!’, orondu owo avehe maave kendjitjiwa okuza kovaṱiṱi novanene. Meve isire omauvi wawo, nu hi nokuuhara ame rizemburuka nozongatukiro zawo. Ami, ngu mbi ri Muhona, owami ngu mba hungire.”
35 Muhona wa zikamisa eyuva kutja ri yere mutenya,
nomueze nozonyose kutja vi yere ouṱuku.
Eye u nyinganyingisa okuvare na hwaarisa ozongazona;
ena re oMuhona Omunamasaaehe.
36 Eye ma kwizike kutja otja omazikameno
woviutwa avihe mbi punga aye karerera,
Israel opunga ama tji karerere nao otja otjiwaṋa.
37 Andakuzu eyuva rimwe evaverwa mari sanekwa,
nomazikameno wehi maye konḓononwa,
eye otja tja imbirahi otjiwaṋa tja Israel mena roviṋa,
mbi tja tjita.
Muhona ongwa hungire.
38 “Muhona ma tja nai: Omayuva maye ya Jerusalem atjihe mu matji tungururirwa ami, okuza kOruhungu rwa Hananel kongurova nga kOmuvero wOkotjikoro. 39 Nomuruko mau ryama okuza mbo komukuma wokongurova, au i kondunda ya Gareb nau katanaukira kOgoa. 40 Otjana atjihe mu mu pakwa ovaṱi nu mu mu tirahirwa omutwe wozombunguhiro, nokuti akuhe meṋe yoruronḓu Kidron nga pOmuvero wOukambe komuhuka mavi rire oviyapuke ku ami. Otjihuro kamaatji haṋewa nu kamaatji yandekwa rukwao.”
© Herero Revision Bible © Bible Society in Namibia, 2021.
