Jeremia 13 - Herero Revision Bible (HRR)

Ekwamo rerapi

1 Muhona we ndji raera kutja mbi kerirandere ekwamo rerapi okukuta pehuri; nungwari we ndji raera kutja e he ri twa momeva. 2 Ami otji mba randa ekwamo ndi ne ri zara. 3 Muhona wa hungira ku ami rukwao a tja: 4 “Twende konḓonḓu Eufrat u kahoreke ekwamo ndi motjitoto.” 5 Ami otji mba kahoreka ro popezu nonḓonḓu Eufrat.

6 Kombunda yomayuva omengi Muhona we ndji raera kutja mbi yaruke konḓonḓu, mbi kaete ekwamo ndi. 7 Ami arire tji mba yaruka; nu tji mba kavaza poṋa pu mba horekere ro, otji mba muna kutja oro ra hahauka, nu ra rire otjiṋa uriri.

8 Tjazumba Muhona otja hungira ku ami rukwao a tja: 9 “Momuhingo tjingewo mbwi ami opunga ame yandeke omeritongamisiro wa Juda, na inga omeritongamisiro omanene wa Jerusalem wina. 10 Otjiwaṋa otjivi hi tja panḓa okukara nonḓuviro ku ami; aruhe tja kakatera kourangaranga na kouvi, nu tje rikotamena koomukuru varwe nokuvekarera. Otjiwaṋa hi otji matji sana nekwamo ndi nda rira otjiṋa uriri. 11 Otja ekwamo punga ari pama pehuri, ami opunga amba vangere kutja Ovaisrael nOvajuda wina ve kakatere nomasa ku ami. Ami mba tjita nai, kokutja owo ve rire otjiwaṋa tjandje, nondangero nondjozokiro nourenga; nungwari owo kave vangere okukara nonḓuviro ku ami.”

Otjikuve tjomavinu

12 Muhona Ndjambi wa tja ku ami: “Jeremia, raera otjiwaṋa tja Israel kutja otjikuve atjihe tjomavinu tji urisiwe nomavinu. Ovandu mave ku ziri ave tja: Matu tjiwa kutja otjikuve atjihe tjomavinu matji urisiwa nomavinu. 13 Ve raera kutja ami, ngu mbi ri Muhona, me hire ovature avehe vehi omavinu nga tji va puruka, okutja ozombara, inḓa ozondekurona za David, novapristeri novaprofete novature avehe va Jerusalem. 14 Tjazumba otji meve nyainyine kumwe tjimuna ovikuve, novanene nouṱiṱi. Kape nondjenda poo ounyaṋutima poo otjari tji matji ndji tjaere okuvezepa.”

Jeremia ma rongo otjiwaṋa atji he ritongamisa

15 Tjiwaṋa tja Israel, Muhona wa hungire!

Risusupariseye nu mu puratene ku ye.

16 Yozikeye Muhona, Ndjambi weṋu,

eye ngunda e hiya eta onḓorera,

neṋe ngunda amu hiya putara

mozondundu komuihi,

eye ngunda e hiya rundurura ondjerera

i rire onḓorera ṱukuṱuku,

okutja oyo ndji ondjerera eṋe ndji mu undja.

17 Tji mu hi nokupuratena,

ami me riri ongumumu mena

romeritongamisiro weṋu;

me riri tjinene nonyengo, nomahoze wandje aye pupu,

orondu otjiwaṋa tja Muhona tja huurwa.

18 Muhona wa tja nai ku ami: “Raera ombara na ina ve heruke kovihavero vyawo vyouhona, orondu omakori wawo wouhona omamanise ya u koviuru vyawo. 19 Ovihuro vyehi ra Juda rokokumuho kweyuva vya koverwa; kape na umwe ngu ma yenene okukahita mu vyo. Ovajuda avehe va twarewa kouhuura.”

20 Tara, Jerusalem! Ovanavita na ove mave ya okuza komukuma wokokunene kweyuva. Ovandu, mba tuwa kehi yondjeverero yoye, nu mbu we ritongamisira, ve ri pi? 21 Ove motja tjike, imba ovandu mbu wa tjangovasi omapanga woye tji ve ku havere nave ku honaparere? Ove mo kara momihihamo tjimuna omukazendu mombandukiro. 22 Tji we ripura kutja okutjavi imbi avihe tji mavi tjitwa ku ami, tjiwa kutja omena rouvi woye ounene tjinene mbu u tjita. 23 Omuzorondu ma yenene okurundurura otjivara tjomukova we poo otjitotongwe matji yenene okuisa ko omavara watjo are? Tji mape yenene okutjitwa nao, eṋe mbu mu ha tjiti otjiṋa posi yourunde porwe, mamu sora okutjita imbi mbi ri ovisemba. 24 Muhona me mu rimbi otja ovihozu, mbi mavi hingwa i ombepo yokuti onguza. 25 Eye wa tja ihi kove matji rire omupya mbu hi nomapengero. Eye we ripura okutjita nai kove, tjinga awe mu zemba nawe riyameka koomukuru woposyo. 26 Muhona omuini me ku hukura ozombanda zoye, nove mo ṱohoṋi tjinga au ri mutundu. 27 Eye we ku muna amo tjiti oviṋa eye mbya tonda. We ku muna amo kongorere oomukuru vovisenginina kozondunda na momahi womakunino tjimuna omurumendu ngu ma nanukire omukazendu womuraranganda na ye poo tjimuna okakambe okatwezu ku make nanukire okazenḓu. Owee ku eṋe, vature va Jerusalem! Hapo mamu rire ovakohoke ruṋe?