Jeremia 12 - Herero Revision Bible (HRR)

Jeremia ma pura Muhona

1 “Muhona, ami tji mba patasana otjiposa tjandje kuna ove,

oove aruhe ngu u ri nawa.

Nungwari ami me vanga okukupura oviṋa vyousemba.

Okutjavi ovandu ovanauvi tje ri mbe ri ovaṋingandu nai?

Okutjavi ovandu mbe hi

nouṱakame tje ri mbe muna outoṋi?

2 Ove u ve kuna, nu ave eta omize,

ve hapa nu ve twako ovihape.

Owo aruhe ve hungira ove nawa,

nungwari, tjiri, kave na ko na tja na ove.

3 Nungwari, Muhona,

ove u tjiwa omutima wandje,

u muna mbi me tjiti,

nu u rora omeripura wandje.

Nana ovandu ovanauvi mba

tjimuna onḓu tji mai kaṱa;

ve pwika nga oruveze rwawo rwokuṱa tji rweya.

4 Ehi retu mari kuruka nai nga ruṋe?

Nomahozu maye kukuta nai nga ruṋe?

Ovipuka nozonḓera mavi koka

mena rouvi wotjiwaṋa tjetu,

ihi otjiwaṋa tji tji tja:

‘Ndjambi ka munu imbi mbi tu tjita.’ ”

5 Muhona wa tja nai:

“Jeremia, tji wa urwa okutupuka puna ovandu,

mo sora vi okutupuka puna oukambe?

Tji u hi nokusora okukara nohange mehi ehaiya,

mo yenene vi okukara nawa

movihwa meṋe ya Jordan?

6 Nangarire ovangu nomarumbi woye,

nomuhoko woye auhe kava ṱakame kove;

owo ve rikuta kumwe okukurwisa.

O kambura mu wo,

nandarire kutja mave hungire

omambo omawa kuna ove.”

Oruhoze rwa Muhona kotjiwaṋa tje

7 Muhona ma tja nai:

“Ami mba isa Israel;

mba imbirahi otjiwaṋa tjandje otjitoororwa.

Ami mba yandja otjiwaṋa tji mba suvera

mouvara wovanavita na tjo.

8 Otjiwaṋa tjandje otjitoororwa tje ndji pirukira;

otjo tje ndji tyera ovimboro

otja ongeyama motjihwa,

nu komuhingo mbo otji mbe tji tonda.

9 Otjiwaṋa tjandje otjitoororwa

tja sana kotjimbirinyama

tji ma tji rwisiwa komikuma avihe i otukoze.

Isana ovipuka vyokuti

vi ye okutjisasaura!

10 Ovanane ovengi wozonganda va nyona

otjikunino tjandje tjomivite;

owo va tomba ehi randje romaryo

omawa okurira okuti onguza.

11 Owo va kururura ro;

oro ri ri tjo komurungu wandje.

Ehi arihe ra rira okuti onguza,

nu kape na ngu rikendera ro.

12 Ovandu va tuurunga ozondunda azehe

mokuti onguza okuyekupunda ro.

Ami mba hinda ovita okukayandeka ehi arihe;

kape na ngu ma hupu mohange.

13 Otjiwaṋa tjandje tja kuna ovikokotwa,

nungwari tja wonga omakuiya;

otjo tja ungura nomasa,

nungwari katji notjiṋa tji

tja muna moviungura vyatjo.

Mena romazenge wandje omandandi

ovihape vyatjo kavi yere.”

Omakwizikiro wa Muhona kovararanganda na Israel

14 Muhona ma tja nai: “Ami mbi notjiṋa okuhungira kovararanganda na Israel, mba nyona ehi, ndi mba yandjere kotjiwaṋa tjandje Israel okurira ouini watjo. Ami me isa mo ovararanganda ovarunde mba momahi watjo tjimuna omuti mbu mau zukurwa, nu e hakana Ovajuda momake wawo. 15 Nungwari tji mba zu nokuvetwara, ami me ṱotjari na imba ovararanganda; me yarura omuhoko auhe peke kehi rawo na komaturiro wawo ouini. 16 Nowo tji mave yakura ongamburiro yotjiwaṋa tjandje nomitima vyawo avihe, nave yana nai: ‘Tjimbe tja Muhona’, otja tji va hongere otjiwaṋa tjandje okuyana ku Baal, owo wina mave rire orukondwa rwotjiwaṋa tjandje, nu mave ṋingapara. 17 Nungwari omuhoko ngamwa auhe tji u hi nokukara nonḓuviro ku ami, ami me u zukura okuuisa po ne u nyone. Ami, ngu mbi ri Muhona, owami ngu mba hungire.”