Omerikutiropamwe wa Muhona ya teyewa
1 Muhona wa tja nai ku Jeremia: 2 “Puratena komambo womerikutiropamwe wandje! Raera kovandu va Juda na kovature va Jerusalem 3 kutja ami, ngu mbi ri Muhona, Ndjambi wa Israel, me sengi auhe ngu hi nonḓuviro komambo womerikutiropamwe nga. 4 Inga owo omerikutiropamwe ngu mba tjitire nooihe mukururume, indu tji mbe ve pitisire mOengipte, ehi nda ri otja ezuko romuriro ku wo. Ami mbe ve raerere kutja ve kare nonḓuviro ku ami, nu ve tjite oviṋa avihe mbi mbe ve rakizire. Mbe ve raerere kutja tji va kara nonḓuviro mave rire otjiwaṋa tjandje, nu ami me rire Ndjambi wawo. 5 Ami otji me ṱakamisa omakwizikiro ngu mba tjitire kooihe mukururume wokutja meve pe ehi etumbe nehapise, ndi ve na ro nambano.”
Ami, Jeremia, mba zira nai: “Ii, Muhona.”
6 Muhona wa tja ku ami: “Twende kovihuro vya Juda na komivanda vya Jerusalem. Kazuvarise ombuze yandje ngo, nu u karaere ovandu avehe kutja ve puratene komambo womerikutiropamwe nga, nokutja ve kare nonḓuviro ku wo. 7 Ami tji mba pitisire ooihe mukururume mOengipte, mbe ve rongere nomasa kutja ve kare nonḓuviro ku ami; nami mba kara pokuronga otjiwaṋa nga ku ndinondi. 8 Nungwari otjo katji puratenene ko nu katji karere ko nonḓuviro. Moruveze rwanao, omundu auhe wa ririra ko otjirangaranga nomurunde. Ami mbe ve rakiza kutja ve ṱakamise omerikutiropamwe nga, nungwari owo va panḓa. Ami opu mba etera omberero aihe kombanda yawo ndja tjangwa momerikutiropamwe nga.”
9 Muhona wa tja ku ami: “Otjiwaṋa tja Juda novature va Jerusalem mave ndji pirukire. 10 Owo va yaruka komauvi wooihe mukururume, mba panḓere okupuratena komambo wandje; owo ve rikotamena koomukuru varwe. Ovaisrael nOvajuda va teya omerikutiropamwe ngu mba tjitire nooihe mukururume. 11 Nambano ami, ngu mbi ri Muhona, otji meve raerere po kutja me eta otjiwonga ku wo, nowo kamaave poṋa. Nu tji mave ku ombatero ku ami, hi nokuvezuvira ko. 12 Ovandu va Juda novature va Jerusalem mave i koomukuru ku ve punguha ozombunguhiro, nu mave kakwa ombatero ku wo. Nungwari oomukuru mbo kave nokuyenena okuvevatera, otjiwonga hi tji tje ya. 13 Ovandu va Juda ve noomukuru ovengi pu pe ṱa ovihuro mbi ve na vyo; novature va Jerusalem va zika ovipunguhiro ovingi mbi ṱeki pomivanda motjihuro okupunguhira ko komukuru omuyaukise Baal. 14 Jeremia, o kumbu, nu o riheke ku ami mena rotjiwaṋa hi orondu ami himee puratene ko ku wo tji ve ri moumba nave ku ombatero ku ami.”
15 Muhona ma tja nai: “Otjiwaṋa tji mba suvera matji tjiti ouvi. Tji nousemba watjike okukara mondjuwo yandje? Matji tjangovasi matji sora okutjaera otjiwonga mokutjita omakwizikiro na mokupunguha ozombunguhiro zovinamuinyo are? Imbi mavi tji yorokisa are? 16 Otjikando tjimwe ami mbe tji isanene kutja otjo omuṋinga womaso mbwe ura nozoṋinga ozombwa ozomanise; nungwari nambano ami me twa omaso momuriro nombosiro onene tjimuna yoruṱuṱumo, nu e teya otutavi twawo.
17 “Ami, ngu mbi ri Muhona Omunamasaaehe, mba kuna Israel na Juda; nungwari nambano meve tanda notjiwonga mena rourunde wawo. Owo ve riyetera otjiwonga hi kombanda yawo; orondo ve ndji pindikisa mokupunguhira Baal ozombunguhiro.”
Okupirukira omuinyo wa Jeremia
18 Muhona we ndji tjivisa omapirukiro ovanavita na ami ngu mave tjiti ku ami. 19 Ami mba ri otja ondjona ongozu, ndji mai twarewa kokukaṱa, nu hi tjivirwe kutja owo va tunga ondunge yourunde okupirukira ami. Owo ave tja: “Ngatu ke omuti ngunda au ri omutarazu; ngatu u zepe kutja ape ha kakara umwe ngu me u zemburuka rukwao.”
20 Ami arire tji mba kumbu nai: “Muhona Omunamasaaehe, oove omupangure omusemba; u rora omeripuriro wovandu nomitima vyawo. Ami mba twa otjiposa tjandje momake woye; ndji esa mbi ku tarere tji mo sutisa ovandu mba.”
21 Ovarumendu va Anatot va vanga kutja mbi ṱe; nowo ve ndji raera kutja mave ndji zepa tji me panḓere pokuzuvarisa ombuze ya Muhona. 22 Muhona Omunamasaaehe otja tja nai: “Ami meve vere. Omitanda vyawo omizandu mavi ṱu movita; novanatje vawo mave ṱondjara. 23 Ami mba twa po oruveze rwokueta otjiwonga kovature va Anatot; noruveze ndo tji rweya, kape na ngu ma hupisiwa.”
© Herero Revision Bible © Bible Society in Namibia, 2021.
