Ovapangure 3 - Herero Revision Bible (HRR)

Oviwaṋa mbya sewa mehi

1 Muhona otja sya mo oviwaṋa tjiva mehi, a rore na vyo Ovaisrael mbe ha ri nondjiviro yovita mOkanaan. 2 Eye wa tjitira kutja ozondekurona zOvaisrael ze hongwe okurwa ovita, tjinenenene inḓa nḓe hi na indu za tjivirwe okurwa ovita rukuru. 3 Oviwaṋa mbya sewa mehi ovyo mbi: Ovahona vetano vOvafilisti, nOvakanaan avehe, nOvasidon nOvahevi mba turire kozondundu za Libanon, okuza kondundu ya Baal-Hermon nga pomakapitiro wa Hamat. 4 Oviwaṋa mbi vya ri mbo, Muhona a rore na vyo Ovaisrael kutja mave kara nonḓuviro komatwako we, eye nga rakizire kooihe mukururume notjinyo tja Moses. 5 Komuhingo mbwi Ovaisrael opu va turira mokati kOvakanaan nOvahetite nOvaamori nOvaperesi nOvahevi nOvajebusi; 6 nowo va kupasana nave karere ovisenginina vyoviwaṋa mbyo.

Otniel

7 Ovaisrael va tjita imbi mbyaa vi ha tjata ku Muhona, ave zembi Muhona, Ndjambi wawo, nave karere ooBaal na Asera. 8 Muhona otja ṱira Ovaisrael omazenge ne ve yandja meke ra Kusan-Risatajim, ombara ya Mesopotamie; nOvaisrael va ungurira Kusan-Risatajim oure wozombura hambondatu. 9 Ovaisrael otji va ura ku Muhona, nu Muhona we ve toororera omuvatere ngwe ve kutura, okutja oOtniel, omuzandu wa Kenas, omuangu wa Kaleb 10 Nombepo ya Muhona ye ya kombanda ye; neye wa rira omunane mOisrael na sekama okuhinga ovita. Nu Muhona we mu pa outoṋi kombanda ya Kusan-Risatajim, ombara ya Mesopotamie. 11 Nehi otji ra muna ohange oure wozombura omirongo vine. Nu Otniel, omuzandu wa Kenas, otja koka.

Ehud

12 NOvaisrael va tura ondjo rukwao komurungu wa Muhona. Muhona opa yandjera ouvara ku Eglon, ombara ya Moab, okuhonaparera Ovaisrael. 13 Nu Eglon otje rikuta kumwe nOvaamoni nOvaamalek. Neye wa sekama na kahavera Ovaisrael; nowo va huura Jeriko, Otjihuro tjOmavare. 14 NOvaisrael va kara kehi youvara wa Eglon, ombara ya Moab, oure wozombura omurongo na hambondatu.

15 Ovaisrael otji va ura ku Muhona. Nu Muhona we ve toororera omukuture, okutja Ehud, ngwa ri omumoho, omuzandu wOmubenjamin Gera. Ovaisrael va hinda Ehud a tware otjisuta tjawo ku Eglon, ombara ya Moab. 16 Nu Ehud we riungurira engaruvyo nda upikwa kuvari, nu nda ri noure wozosentimeta mangara omirongo vitano, ne ri kutu kondo ye yokunene, kehi yozombanda ze. 17 Neye otja eta otjisuta tje ku Eglon, ombara ya Moab; nu Eglon wa ri omurumendu omutwezu. 18 Nu Ehud tja za nokuyandja ihi otjisuta arire tja i puna imba ovarumendu mba mbe tji tjinda. 19 Nungwari eye omuini wa kotokera poviserekarera vyovisenginina mbya ri pOgilgal, na tja: “Ami mbi nombuze yoye oundikwa, mbara.”

Nombara otji ye mu rakiza ai tja: “O hungire!” Nu avehe mba kuramene pu yo va zapo nave piti pendje.

20 Ehud wa hita ne ya kombara, ngunda aya haama metuwo epore rokombanda nda ri orayo oini. Nu Ehud arire tja tja ku yo: “Ami mbi nombuze yoye ndja zu ku Ndjambi!” Nombara ya sekama motjihavero tjayo. 21 Ehud wa roporora eke re rokumuho na homona engaruvyo mondo ye yokunene na twere na ro ombara mezumo. 22 Nengaruvyo arihe ra hita nga komakamburiro waro, nozonḓura za setika ro, Ehud tjinga e ha homonene indi engaruvyo mezumo rombara, notji ra tuvakaṋa nga kongotwe. 23 Tjazumba Ehud wa ronda kondjuwo yokombanda a yezere na pata omivero vyetuwo rokombanda kongotwe ye. 24 Neye tja za nokupita kamanga ovakarere va Eglon arire tji ve ya; nowo tji va muna kutja omivero vyetuwo rokombanda vya patwa otji ve ripura kutja ngahino eye wa i kokaruwo. 25 Nowo va undja nga tji ve ha tjivirwe kutja ngave tjite vi; nungwari ombara kai patururire omivero vyetuwo rokombanda. Nowo va kaeta otjipaturure ave paturura nave munu omuhona wawo ngwa saravara pehi mbo a koka.

26 Nungwari ovakarere ngunda amave undjire Ehud pomuvero, eye otja tupuka a kapita oviserekarera vyovisenginina na henene kOseira. 27 Neye tja kavaza ngo, wa kaposisa ohiva kombanda yozondundu za Efraim, nOvaisrael va heruka puna ye kozondundu, neye we ve hongorera. 28 Eye wa tja nai ku wo: “Ndji kongorereye, orondu Muhona wa yandja ovanavita na eṋe, imba Ovamoab, meke reṋu.” Nowo ve mu kongorera ave katjaerera Ovamoab pomakondero wa Jordan, nave ha yandjere omundu okukondera mbo. 29 Nu moruveze ndo owo va zepa ovarumendu ovanamasa nomapenda wOvamoab mangara omayovi omurongo, nu kape na umwe ngwa yenenene okutaura. 30 Meyuva ndo Ovamoab otji ve riwisa kehi yOvaisrael; nehi ra muna ohange oure wozombura omirongo hambondatu.

Samgar

31 Kombunda ya Ehud pe ya Samgar, omuzandu wa Anat. Eye wa zepa ovarumendu Ovafilisti omasere hamboumwe nongwinya yokuhinga na yo ozongombe. Neye wina wa yama Ovaisrael.