Ovitjitwa oviyaukise vyovature va Gibea
1 Momayuva ngena kamwa ri ombara mOisrael. Nu pa ri omurumendu Omulevi ngwa turire otja owozonganda kokure tjinene mehi rozondundu ra Efraim. Eye we ripahera omukazendu wa Betlehem mehi ra Juda a rire omukazendu we omumbanda. 2 Nungwari omukazendu we omumbanda ngwi wa posa kuna ye, a zu po pu ye na yaruka koya ihe kObetlehem, mehi ra Juda. Neye wa kakara ngo oure womieze vine. 3 Nomurumendu ngwi we ritwa mondjira okuteza omukazendu we na karora okumutekura kutja a kotoke. Eye wa twaerera omukarere we nousino uvari. Nomukazendu we we mu urikira ondjuwo ya ihe. Nu ihe yomukazendu tje mu muna we mu tjakanena nenyando. 4 Nu ihe omukwe we mu tjaera kutja a kare; neye wa kara puna wo omayuva yetatu. Nowo va rya nave nu, neye wa rara mbo. 5 Meyuva oritjaine eye nomukazendu we va penduka omuhuka omunene nave rirongere okuyenda. Nu ihe yomukazendu arire tja tja komukwe we: “Rutenga ryee ovikurya, tjazumba a rire tji mwa i.”
6 Nowo va kara novarumendu aveyevari va haama pamwe ave ri nave nu. Tjazumba ihe yomukazendu arire tja ningire komurumendu a tja: “Ngo tji rara muno rukwao, u kare nomutima wondjoroka.”
7 NOmulevi tja sekama okuyenda, omukwe we otje mu kondjisa nga tja rara mo rukwao. 8 Nu meyuva oritjatano, tja vanga okuyenda omuhuka omunene, ihe yomukazendu arire tja tja ku ye: “Ngo tji ri ovikurya rukwao u kare nga komapeta.” Nu aveyevari otji va rya pamwe.
9 Nomurumendu tja sekama okukumuka puna omukazendu we omumbanda nomukarere we, ihe yomukazendu otja tja nai ku ye: “Tara, eyuva ratoko, rara muno ouṱuku mbwi, nu kara nomutima wondjoroka. Tjazumba omuhuka omunene u yende u yaruke koyoye.”
10 Nungwari omurumendu ka vangere okurara mo, notja sekama a kutire ousino we auyevari na ka wondja puna omukazendu we omumbanda nomukarere we, na kavaza ombarakana na Jebus, okutja Jerusalem. 11 Nu tji va kavaza kOjebus eyuva ara toko, omukarere arire tja tja komuhona we: “Arikana, ngatu konde kotjihuro tjOvajebusi tu karare mo.”
12 Nungwari omuhona we wa kotora ku ye a tja: “Ayee, kako, katu nokukonda kotjihuro tjovandu vambangu mbe he ri Ovaisrael, ngatu kapite kOgibea.” 13 Tjazumba a tja nai komukarere we: “Indjo, ngatu rore okuvaza popezu na tjimwe tjovirongo mbyo, tu karare mOgibea poo mOrama.” 14 Nowo arire tji va kapita komurungu, neyuva re ve hitira popezu na Gibea tjomuhoko wa Benjamin. 15 Nowo va konda okukarara mOgibea. Nu ingwi Omulevi wa hita motjihuro na kakara morupare rwomarandero, tjinga ape ha ri omundu ngwe ve ṋanga okukarara mondjuwo ye.
16 Nungwari ongurova kwe ya omurumendu omukururume ngwa za koviungura vye vyotjikunino. Omurumendu ngwi rukuru wa zire kehi rozondundu ra Efraim na kara otja owozonganda mOgibea, novature votjirongo ho va ri Ovabenjamin. 17 Nomukururume ngwi tja taviza wa muna omuyenda porupare rwomarandero wotjihuro, ne mu pura a tja: “Ove mo zu pi, nu mo i pi?”
18 NOmulevi we mu zira a tja: “Oweṱe ovayenda mbu twa za kObetlehem mehi ra Juda, nu matu i kokure tjinene kehi rozondundu ra Efraim ami ku mba za. Ami mba ire kObetlehem kehi ra Juda, nambano me yaruka koyandje, nungwari kape na ngu me ndji sekirisa mondjuwo ye. 19 Nu vari eṱe tu nomahozu novikurya vyousino wetu; neṱe nomukazendu wandje omumbanda tu nomboroto nomavinu; eṱe tu na avihe, mbi twa sokuhepa.”
20 Omukururume opa tjera nai: “Ove waakurwa! Hita mondjuwo yandje! Nu avihe mbi mo hepa me ku ṱunine. Arikana, o rara morupare rwomarandero ouṱuku mbunombwi.”
21 Neye otje ve yakura moye na yandja omahozu kousino. Nu imba ovayenda va koha ozombaze zawo, nave ri nave nu.
22 Nowo ngunda ava ri mondjoroka, ovarumendu votjihuro, mba ri ovapikapike tjinene, va kovera ondjuwo ndji nave kongora omuvero tjinene. Nowo va hungira komukururume ngwi omuini wondjuwo ave tja: “Pitisa omurumendu ngwi ngwa hiti mondjuwo yoye; matu vanga okurara pu ye!”
23 Nomuini wondjuwo otja pita pendje na tja ku wo: “Ayee, kako, vakwetu, amu tjiti ondjito yohoṋi otja indjo. 24 Tareye, omukazona wandje omunene eye ngwi puna omukazendu omumbanda womurumendu ngwi! Owo meve pitisa ku eṋe; tjiteye ku wo otja pu mape tjata ku eṋe. Nungwari komurumendu ngwi amu tjiti ko ondjito yohoṋi otja indji.” 25 Nungwari ovarumendu mbo kave vangere okuzuva ku ye. Ingwi Omulevi opa kamburira omukazendu we omumbanda ne mu pitisa pendje ku wo. Nowo ve mu tjera nokumutatumisa ouṱuku auhe nga komuhuka omunene; nu tji pa tji otji ve mu esa a yende.
26 Nu mokutja kweyuva omukazendu wa kotoka na wire pehi momuvero wondjuwo yomukururume mu mwa ri omurumendu we, na saravara mbo nga tji kwa yere. 27 Nomurumendu we tja penduka omuhuka wa yezurura omuvero wondjuwo na piti pendje kutja a yende; mokamanga otja muna omukazendu we omumbanda a saravara momuvero wondjuwo, nomake we aye ri komuti omutyakaṋa wokehi yomuvero. 28 Eye we mu isana a tja: “Penduka tu kawondje!” Nungwari ka perwe eziriro. Tjazumba otja tyakaṋa orurova romukazendu we kokasino, a kumuka na yaruka komaturiro we. 29 Nu tja kavaza kondjuwo ye arire tja toora oruvyo na kondo orurova romukazendu we omumbanda movindimbu omurongo na vivari ne vi hindi komihoko omurongo na vivari vya Israel. 30 Nu auhe ngwa muna otjiṋa hi, wa tja: “Otjiṋa otja ihi nga mba katjiya tjitwa nu katjiya munika okuza koruveze Ovaisrael ndu va zire mehi ra Engipte okuya nguno nga ku ndinondi. Ripureye na tjo, raerasaneye nu tyasaneye!”
© Herero Revision Bible © Bible Society in Namibia, 2021.
