Ovapangure 18 - Herero Revision Bible (HRR)

Mika nomuhoko wa Dan

1 Moruveze ndo kamwa ri ombara mOisrael. Nu momayuva ngo omuhoko wa Dan aa u paha orukondwa rwehi okutura mo. Nga koruveze ndo Ovadan kave na indu va kamburire ehi rorive okurira otjirumatwa tjawo mokati komihoko vyOvaisrael. 2 Ovadan otji va toorora ovarumendu vetano ozombanḓe mokati komaṱunḓu aehe womuhoko mbo, nave ve hindi okuza kotjihuro tja Sora notja Estaol okukahora nokukakonḓonona ehi. Nowo otji va ya kehi rozondundu ra Efraim, nave karara mondjuwo ya Mika. 3 Ngunda averi popezu nondjuwo ya Mika otji va zemburuka ombosiro yeraka romuzandu ngwi omutanda Omulevi. Nowo va hita mondjuwo nave mu pura nai: “Owaṋi ngwe ku eta nguno, nu muno mo ungura mo tjike, nu mo paha tjike?”

4 Neye wa zira a tja: “Ami na Mika twa zuvasana kutja me ndji sutu ondjambi nami memu karere otja omupristeri we.”

5 Nowo va tja ku ye: “Arikana kapure Ndjambi, kutja eṱe matu munu ouṋingandu mouyenda wetu.”

6 Nomupristeri we ve zira a tja: “Twendeye mohange! Muhona u ri puna eṋe mondjira yeṋu.”

7 Novarumendu mba vetano va ya nave kavaza kotjirongo Laish. Owo va muna kutja ovandu ngo va tura nokuhinatjipo tjimuna Ovasidon. Va ri ovandu vohange mba pora nu mbe ha ri nozombata nomundu worive; avihe mbyave hepa va ri na vyo. Nowo va turire kokure nOvasidon, nu kaave wana nOvaaramei. 8 Nu ovarumendu imba vetano tji va yaruka kOsora na Estaol, nomuhoko wa pura kutja va kamuna tjike. 9 Nowo va zira ave tja: “Sekameye tu keverwise! Eṱe ehi ndo twe ri munu, noro ewa tjinene. Amu kara mba nokuhina tji mamu ungura! Amu wombo, sekameye mu kawondje tu kakambure ehi ndo. 10 Nu tji mwa kavaza ngo, mamu kamuna otjiwaṋa otjihinangendo. Ehi ndo ra paranga komikuma avihe; Ndjambi wa yandja ehi ndo momake weṋu mu mu ha hepere otjiṋa ngamwa atjihe tji tji ri kombanda yehi ndi.”

11 Nu pa sekama ovarumendu omasere hamboumwe vomuhoko wa Dan okuza mOsora na Estaol, mbe ripangaṋa novirwise. 12 Nowo va katona ozondanda meṋe ya Kirjat-Jearim mOjuda; komuhingo mbwi poṋa mbo opu pa rukirwa kutja “Opozondanda za Dan” nga ku ndinondi; nu pe ri komukuma wokongurova kwa Kirjat-Jearim. 13 Okuzambo owo va ya kehi rozondundu ra Efraim nave ya ponganda ya Mika.

14 Novarumendu mba vetano, mba ire okukahora ehi ra Laish, va tja nai kovakwao: “Eṋe nai mamu tjiwa kutja mu imwe yozondjuwo nḓa mu na ombanda yokoviṱuve, noomukuru varwe vovisenginina, notjiserekarera tji tja hongwa nu ku kwa tuwa osilveri are? Ripureye nawa na ihi tji mamu sokutjita.” 15 Nowo va yaruka, ave ya ponganda ya Mika, ave hiti mondjuwo yomurumendu omutanda Omulevi nave mu korisa. 16 Imba ovarumendu omasere hamboumwe vomuhoko wa Dan mbe rirongerera ovita tjandje nai va kurama pomuvero worumbo. 17 Nozohoze ndano nḓa za hita osemba mondjuwo, naze toora otjiserekarera tji tja hongwa nu ku kwa tuwa osilveri, nombanda yokoviṱuve, noomukuru varwe vovisenginina wina. Nomupristeri tjandje nao wa kurama pomuvero puna ovarumendu ovarwe wovita omasere hamboumwe.

18 Novarumendu vetano mba tji va hita mondjuwo ya Mika nave toora oviṋa ovizere mbi, omupristeri otje ve pura a tja: “Mamu ungura tjike?”

19 Nowo va tja nai ku ye: “Mwina, o nyamukura, kayende puna eṱe; nu rira omuyandjandunge nomupristeri ku eṱe! Okokuwa kove okukara omupristeri wondjuwo yomurumendu umwe are? Poo okokuwa komeho yanao okurira omupristeri womuhoko nowonganda aihe yOvaisrael?” 20 Nu ingwi omupristeri wa yoroka tjinene, notja toora oviṋa ovizere mbi na kahita motjimbumba tjovarwe.

21 Nowo va yaruka nondjira, ndji va eta, nave twa ovakazendu novanatje, novinamuinyo, noviṋa ovinanḓengu komurungu. 22 Nowo tji va za nokuhumburuka nondjuwo ya Mika, ovarumendu, mba turire meṋe yonganda ya Mika, otji va wongara nave tezere Ovadan. 23 Nowo va ravaera Ovadan. Ovadan arire tji va tanauka nave pura Mika ave tja: “Otjikeṋa? Nu mwa woronganene tjike?”

24 Nu Mika we ve zira a tja: “Oviserekarera vyovisenginina vyandje mbi mba ungura mwa twaerere, nomupristeri wandje wina, namu yaruka! Nao tjandje mba sewa na tjike? Mamu ndji purire tjike kutja me paha ye?”

25 NOvadan ve mu zira nai: “Mwina, atu ku zuu rukwao tjaa ovarumendu vetu ovanamazenge ngaave ku rwisa, nove nomuhoko voye amu ṱu.” 26 Ovadan opu va twarera ondjira yawo. Nungwari Mika tja muna kutja owo ve nomasa pu ye otja yaruka konganda.

27 Ovadan va twaerera otjiserekarera tjotjisenginina Mika tja ungurire, nomupristeri we wina. Okuzambo va karwisa Laish, otjihuro tji tja ri novandu ovanahange novapore. Nowo va zepa ovature avehe nave nyosa otjihuro. 28 Nu kapa ri umwe ngwe ve yama, otjihuro hi tjinga atja ri kokure na kOsidon, nu kaave wana noviwaṋa vyarwe. Otjo tja ri motjana tjingetjo hi, mu mwa ri Bet-Rehob. Imba Ovadan va tungurura otjihuro hi nave tura mu tjo. 29 Notjihuro hi ve tji rukire Dan otja kena ra ihe mukururume yawo Dan, omuzandu wa Jakob. Nungwari rukuru otjihuro ho tja rukirwe Laish. 30 Nu imbwi omuhoko wa Dan we rizikira otjiserakarera hi tjotjisenginina; nu Jonatan, omuzandu wa Gersom, omuzandu wa Moses, eye novazandu vevari ovapristeri vomuhoko wa Dan nga moruveze ndwi otjiwaṋa ndu tja twarewa mouhuura. 31 Nu ihi otjiserekarera tja Mika tja kara mo omayuva aehe, Ondanda ya Ndjambi ngunda aya ri mOsilo.