Jefta ma rire omupangure
1 Jefta, Omugilead, wa ri ombangaṋe. Eye wa ri omuatje womukazendu omukorondu. Ena ra ihe ra ri Gilead. 2 Nomukazendu omukupwa wa Gilead we mu pandukira ovazandu wina; nowo tji ve kura va ramba Jefta ave tja ku ye: “Ove ko notjiṋa tji mo rumata pu tate, orondu oove omuatje womukazendu warwe.” 3 Jefta opa tupukira okuza povangu ve na katura kehi ra Tob. Eye we keriworonganisira ovarumendu ovehinohepero; nowo va ryanga puna ye.
4 Nu kombunda yoruveze rworive Ovaamoni va hinga ovita kuna Ovaisrael. 5 Ovita mbi tji vya za nokutjitwa, ovanane va Gilead otji va kaeta Jefta kehi ra Tob. 6 Owo va tja ku ye: “Indjo u karire omuhongore wetu, tu karwise Ovaamoni.”
7 Nungwari Jefta wa zira ovanane vOvagilead a tja: “Kaweṋe mbu mwe ndji humisire namu ndji ramba mondjuwo ya tate are? Nambano tji mu ri mouzeu mwe ere tjike ku ami?”
8 Novanane vOvagilead va tja nai ku Jefta: “Eṱe twa kotoka kove nambano, tjinga amatu vanga kutja u yende puna eṱe tu karwise Ovaamoni, nu u karire omuhongore wOvagilead avehe.”
9 Jefta arire tja tja kovanane vOvagilead: “Eṋe tji mamu ndji yarura konganda okukarwisa Ovaamoni, nu Muhona tje ndji pe outoṋi, tjiri, me karira omuhongore weṋu.”
10 Owo ve mu zira ave tja: “Eṱe matu tjiti otja pu mo hee. Muhona onguri omuhongonone wetu.” 11 Jefta opa ira puna ovanane vOvagilead, novandu ve mu isa po omuhongore nomunane wawo. Nu Jefta wa hungira oviṋa vye avihe mbye sokutjita komurungu wa Muhona mOmispa.
12 Jefta wa tuma ovahindwa kombara yOvaamoni na tja ku yo: “Ove u na tjike na eṱe, tji mo ya okurwisa ehi retu?”
13 Ombara yOvaamoni ya zira nai kovahindwa va Jefta: “Ovaisrael va kamburire ehi randje okuza konḓonḓu Arnon nga konḓonḓu Jabok, indu tji va zire mOengipte; nambano ndji kotorera ehi ndo mohange.”
14 Nu Jefta wa tuma ovahindwa rukwao kombara yOvaamoni, 15 na tja ku yo: “Ovaisrael kave kamburire ehi rOvamoab na indi rOvaamoni. 16 Ovaisrael tji va za mOengipte va tuurunga okuti onguza nga kOmuronga wOtuu, nave kavaza kOkades. 17 Ovaisrael va tuma ovahindwa kombara yOvaedom, nave i ningire kutja i ve pe oruveze okukapitira mokuti kwayo. Nungwari ombara yOvaedom kai vangere okuzuva otjiṋa hi. Rukwao owo va ningira kombara yOvamoab, noyo wina kai vangere okuvepa oruveze okukapitira mo. Ovaisrael opu va karera mOkades. 18 Okuzambo va tuurunga okuti onguza. Owo va kondoroka ehi rOvaedom na indi rOvamoab nave kavaza komukuma wokomuhuka wa Moab, munda mbwina yonḓonḓu Arnon. Imbo Ovaisrael opu va tona ozondanda, nungwari kave kondere onḓonḓu Arnon, tjinga aya ri omuruko wOvamoab. 19 Ovaisrael opu va tumina ovahindwa ku Sihon, ombara yOvaamori, ngwaa honapara mOhesbon nave ningire ku ye ave tja: ‘Arikana, tu pao oruveze tu tuurungire mehi roye okuyenda kehi retu.’ 20 Nungwari Sihon ka vangere okuveyandjera okutuurungira mehi re. Eye wa woronganisa otjimbumba tje atjihe tjovita, a kazika ozondanda mOjahas na karwisa Ovaisrael. 21 Nungwari Muhona, Ndjambi wa Israel, wa yandja outoṋi kOvaisrael kombanda ya Sihon novandu ve avehe. Ovaisrael otji va kambura ehi arihe rOvaamori, mba turire mehi ndo ri rire ouini wawo. 22 Nowo va kambura ehi arihe rOvaamori okuza konḓonḓu Arnon nga konḓonḓu Jordan. 23 Komuhingo mbwi Muhona, Ndjambi wa Israel, otja ramba Ovaamori komurungu wotjiwaṋa tje Israel. Nambano ove movanga okukotora ro rukwao are? 24 Tjiri, atjihe omukuru woye wotjisenginina Kemos tji me ku pe matji rire ouini woye. Nungwari atjihe Muhona, Ndjambi wetu, tji me tu kamburire matji rire ouini wetu. 25 Mo ripura kutja oove omunanḓengu pu Balak, omuzandu wa Sipor, ombara ya Moab are? Hapo eye wa posere ruṋe na Israel poo wa hingire ruṋe ovita kuna wo? 26 Ovaisrael va kambura Hesbon na Aroer, novirongo avihe mbya ri meṋe yavyo, novihuro avihe mbi ri komikuro vyonḓonḓu Arnon, oure wozombura omasere yetatu. Okutjavi tji mu he vi kamburire moruveze aruhe ndo? 27 Ayee, ami hi ku tjitire ouvi. Oove ngu mo tjiti nao, tji mo hingi ovita kuna ami. Muhona nga rire omupangure. Eye nga pangure ndinondi pokati kOvaisrael nOvaamoni.” 28 Nungwari ombara yOvaamoni ka puratenene ko kombuze Jefta ndje mu hindira.
29 Tjazumba ombepo ya Muhona arire tji ya raukire kombanda ya Jefta. Eye wa tuurungira mehi ra Gilead nora Manasse na yaruka kOmispa mOgilead. Okuzambo eye wa hinga ovita kuna Ovaamoni. 30 Jefta arire tja tjiti omakwizikiro ku Muhona na tja: “Ove tji mo ndji pe outoṋi kombanda yOvaamoni, 31 nu tji mba kotoka nawa okuza kovita, me yandja omundu ngwi ngu ma tenge po okupita momuvero wondjuwo yandje okundjitjakanena a rire ombunguhiro oningiririsiwa kove.”
32 Jefta opa ira kOvaamoni okukeverwisa, nu Muhona we mu pa outoṋi. 33 Eye we ve havera okuza kOaroer nga kOminit, na kambura ovihuro omirongo vivari nga kOabel-Keramim. Pa ri otjiṱiro otjinene, nOvaamoni va haverwa i Ovaisrael.
Omuatje omukazona wa Jefta
34 Nu Jefta tja kotoka konganda ye mOmispa, tara, omukazona we otja pita okumutjakanena ama nyanda ongoma yomomake nokupunda. Neye ongwa ri omuatje we erike ṱi; posi ye ka ri nomuatje warwe. 35 Neye tje mu muna wa nyondorora ozombanda ze na tja: “Arikana, mukazona wandje, mo ndji hihamisa omutima tjinene! Okutjavi tje ri ove ngu mo ndji pe oruhoze ndu ṱa mba. Ami mba tjita omakwizikiro ku Muhona, nu hi nokuyenena okuyeyarura ombunda.”
36 Nu ingwi omusuko wa tja nai ku ihe: “Tate, ove tji wa tjita omakwizikiro ku Muhona, ndji tjita otja pu wa heya ku Muhona. Muhona we ku pa omasutisiro kovanavita na ove, imba Ovaamoni.” 37 Tjazumba eye wa ningira ku ihe a tja: “Otjiṋa tjimwe ngatji yandjewe ku ami. Ndji pa oruveze mbi rikarere erike oure womieze vivari kutja mbi ryange mozondundu mbi karirire ousuko wandje puna ovakwetu.” 38 Ihe otje mu zira a tja: “Twende uri!”, ne mu pe oure womieze vivari. Nomusuko wa ya puna omapanga we kozondundu, noka karirira ousuko we. 39 Kombunda yomieze vivari omusuko ngwi wa kotoka ku ihe. Nu ihe wa tjita ku ye otja pa yanena Muhona. Nomusuko ngo ke na pa wanene nomurumendu.
Imbwi ombwa rira omuhingo mOisrael: 40 Ombura aihe ovasuko vOvaisrael aave kumuka okukaririra omukazona wOmugilead Jefta oure womayuva yane.
© Herero Revision Bible © Bible Society in Namibia, 2021.
