Jesaja 9 - Herero Revision Bible (HRR)

Ombara yoruveze ndu maru ya

1 Rukuru Muhona wa yambururire ehi romuhoko wa Sebulon nowa Naftali, nungwari moruveze ndu maru ya eye ma eta ondengero kehi ndi, okuza kOmuronga Mediterania nokuyenda komukuma wokomuhuka, nga kehi ndi ri munda mbwina na Jordan, na kOgalilea orini, ku ku tura ovozonganda.

2 Otjiwaṋa tjaa tji ryanga monḓorera,

tja munu ondjerera onene.

Imba mba tura mehi romuzororema,

nambano ondjerera mai

yere kombanda yawo.

3 Ove we ve pa enyando enene, Muhona;

Ove we ve yorokisa.

Owo va yorokera imbi ove mbi wa tjita,

otja ovandu tji ve yorokera

omakondero wovikokotwa vyawo,

nomahaṋeno woutumbe mbu va huura.

4 Orondu ove wa isa ko

omutwaro mbwe ve ṋiṋikiza,

no teya okati kuyake ve tono koviṱuve.

Ove wa havera oviwaṋa

mbya ṋiṋikiza nu avi piza

otjiwaṋa tjoye tjimuna tji wa haverere

otjimbumba tjovarwe

wovita tja Midian,

oruveze ndwa kapita rukuru.

5 Ozongaku zovarwe wovita

nḓu maze kayenda nomungunda,

nozombanda zawo azehe nḓa zungwa mombinḓu,

mavi nyosiwa momuriro.

6 Orondu eṱe twa kwaterwa omuatje,

twa pewa omuna.

Neye ma rire ombara yetu.

Eye ma rukwa

“Omuronge Omuhimise,

Ndjambi Omunamasaaehe,

Ihe ya Aruhe,

Ombara yOhange.”

7 Ouvara wouhona we mau

ryamene ko komeho,

ouhona we mau karerere mohange.

Eye ma honapara mokupingena ombara David,

ama zikamisa nokuzeuparisa ouvara we

mousemba na mouatjiri

okuza ku nambano nga ko

nga aruhe.

Muhona Omunamasaaehe

we rimana okutjita avihe mbi.

Muhona ma vere otjiwaṋa tja Israel

8 Muhona wa ravaera ombanguriro kozondekurona za Jakob, ihi otjiwaṋa tja Israel. 9 Ovaisrael avehe, okutja omuhoko wa Efraim novature avehe va Samaria, mave tjiwa kutja eye wa tjita nai. Nambano owo ve ritongamisa nu ve rangaranga amave tja: 10 “Ozondjuwo zozohima za wa, nungwari eṱe matu ze tungurura nomawe. Omiti vyomikuyumbwa vya kondwa, nungwari eṱe matu yarura po imbi vyotupapa otuwatuwa motuveze twavyo.”

11 Nungwari Muhona wa pendura ovanavita na wo ve ve rwise. 12 Ovaasirie komukuma wokomuhuka nOvafilisti komukuma wokongurova va mwahurura ovinyo vyawo okuseseta Israel. Nu nangarire kutja pa tjitwa nao, omazenge wa Muhona kayeya yanda; eke re ingee ra ropororerwa okuvera.

13 Ovaisrael kaveye ritanaura; nangarire kutja Muhona Omunamasaaehe we ve vera, owo kaveya kotoka ku ye. 14 Meyuva rimwe uriri Muhona ma vere ovahongore va Israel novandu vatjo; eye meve kondo oviuru nomitjira. 15 Ovakurundu novatengwandu owo ombe ri oviuru, nomitjira ovyo ovaprofete mba mbe honga ovizeze. 16 Imba mbe hongorera ovandu mba, owo ve ve pukisa, nu ve ve purukisa oparukaze. 17 Nu Muhona otje hi nokuisa omitanda kutja vi hene, nu ke nokuṱira ozosewa novahepundu ondjenda, ovandu avehe tjinga averi ovarunde mbe hi na ko na tja na Ndjambi, noviṋa avihe mbi mave hungire tjinga avi ri ouyova porwe. Nu nangarire kutja pa tjitwa nao, omazenge wa Muhona kaye yanda, neke re ingee ra ropororerwa okuvera.

18 Ouvi wovandu u nyosa komuhingo womuriro mbu seseta ovihwa vyomakuiya nominanyiva. U ruruma tjimuna omuriro womahwa mbu sekamisa otjindamwise. 19 Muhona Omunamasaaehe tjinga e nomazenge, omberero ye otji mai nyosa otja omuriro mehi arihe, nu mai yandeke otjiwaṋa; kape na ngu ma yama omukwao. 20 Mehi arihe ovandu mave hakana nave ri ovikurya ngamwa avihe oviṱiṱi, mbi mave munu, nungwari kamaave kuta. Owo mave ri nangarire ovanatje vawo oveni! 21 Ovandu va Efraim nOvamanasse mave rwisasana, nowo avehe pamwe mave rwisa Juda. Nu nangarire kutja pa tjitwa nao, omazenge wa Muhona kayeya yanda; eke re ingee ra ropororerwa okuvera.