Ombuze ombwa yonguturiro
1 Muhona Ndjambi we ndji urisa nOmbepo ye.
Eye we ndji twirisa ne ndji hindi okueta
ombuze ombwa kovasyona,
okuverukisa imba vomitima mbya nyaika,
nokutjivisa onguturiro kovakamburwa,
nokukutura ovapandekwa.
2 Eye we ndji hinda kutja mbi zuvarise
kutja oruveze rweya Muhona ndu ma yama otjiwaṋa tje
nu ndu ma havere ovanavita na tjo.
Eye we ndji hinda kutja mbi huhumiṋe avehe mbe noruhoze,
3 nokutja mbi yandje enyando nondjoroka
ku imba mbe noruhoze mOsion,
neimburiro rondjoroka moruveze rwondjenda.
Owo avehe mave sana nomiti mbya kunwa i Muhona omuini;
nu mave tjiti imbi mbi ri ovisemba.
Nu Ndjambi ma tangerwa mbya tjita.
4 Owo mave tungurura ovihuro mbya isiwa omatundu oruveze orure.
5 Tjiwaṋa tjandje, ovozonganda mave ku karere,
mave risa ozonyanda zoye,
ave twere ehi roye romakunino
nave ṱakamisa ovikunino vyoye vyomivite.
6 Neṋe mamu tjiukwa otja ovapristeri va Muhona,
ovakarere va Ndjambi wetu.
Eṋe mamu nyandere outumbe woviwaṋa,
nu mamu rihivire wo.
7 Ohoṋi nokuyamburuka kweṋu vya yanda.
Eṋe mamu tura mehi reṋu oveni.
Noutumbe weṋu mau ryamene ko potuvari;
enyando reṋu mari karerere nga aruhe.
8 Muhona ma tja nai:
“Ami mba suvera ousemba,
nu mba tonda oṋiṋikizire nourunde.
Ami mouṱakame wandje me yandja ondjambi kotjiwaṋa tjandje,
nu me tjiti omerikutiropamwe omakarerere puna wo.
9 Ozondekurona zawo maze tjiukwa mokati koviwaṋa;
auhe ngu me ze munu ma tjiwa
kutja ozo ovandu mbu mba sera ondaya.”
10 Jerusalem matji nyanda nokuyorokera
imbi Muhona mbya tjita.
Ndjambi we tji zarisa nondjamo nousemba we
otja omuvareke ngwe rihwikikire orukupo rwe,
notja omuvarekwa ngwe rihareke noviwerawere.
11 Tjiri, otja ozondwi tji ze nyomoka naze hapa,
Muhona Ndjambi otji ma yama otjiwaṋa tje,
nu oviwaṋa avihe mavi mu tanga.
© Herero Revision Bible © Bible Society in Namibia, 2021.
