Ndjambi u notjari
1 Muhona ma tja nai:
“Indjeye komeva,
eṋe amuhe mbu mwa ṱonyota!
Indjeye,
eṋe amuhe mbu mu hi novimariva,
randeye ovikokotwa mu rye!
Indjeye mu ye okuranda omavinu nomaihi,
ovyo kavi nokumukosa otjiṋa.
2 Okutjavi tji mamu yandja ovimariva vyeṋu
ku imbi mbi he kutisa?
Okutjavi tji mamu yandja ozondjambi zeṋu
ku imbi mbi ha kovisa?
Purateneye ku ami mu tjite imbi mbi me hungire,
neṋe mamu ri ovikurya
imbi oviwaviwa pu avihe.
3 “Puratena nambano, tjiwaṋa tjandje,
nu uye ku ami;
indjo ku ami nove mo kara nomuinyo!
Ami me tjiti omerikutiropamwe na eṋe omakarerere,
nu me mu pe ozondaya nḓu mba kwizikira David.
4 Rukuru ami mbe mu tjitire okurira
omunane nomuhongore woviwaṋa,
nu mu ye ami mbe vi raisirire ouvara wandje.
5 Tara, eṋe nambano mamu
isana oviwaṋa vyozonganda;
noviwaṋa mbi he mu tjivirwe,
nambano mavi utuka ku eṋe.
Ami ngu mbi ri Muhona, Ndjambi weṋu,
Omuyapuke wa Israel,
me yenenisa avihe mbi;
ami me mu pe ondjozikiro nondatero.”
6 Paheye Muhona
eye ngunda ama yenene okumunika;
nu kumbeye ku ye nambano ngunda e ri popezu.
7 Omunauvi nga ise ozondjito ze ozombi
nomeripuriro we omavi.
Nga tanauke ku Muhona, Ndjambi wetu;
eye omunatjari nu wa tumba ondjesiro.
8 Muhona ma tja nai:
“Omeripura wandje kameripura weṋu,
nu ozondjira zeṋu kazondjira zandje.
9 Otja omayuru punga aya
yeruruka tjinene kombanda yehi,
ozondjira zandje nomeripura wandje
wina opunga aya yeruruka kombanda
yozondjira zeṋu nomeripura weṋu.
10 “Embo randje ri ri otja ovitutukende
nombura ndji mai zu mevaverwa okutjatja ehi.
Ovyo vi nyomona ovihape,
mbi eta ondwi okukuna novikurya okurya.
11 Nu wina embo ami ndi me hungire,
otji mari kara nao;
oro mari yenenisa ihi ami tji mbe ripurira ro,
nu mari yenenisa otjiṋa ngamwa atjihe
ami tji mba hindira ro okutjita.
12 “Eṋe mamu zu mo mObabilon
nondjoroka namu ṱikwa mohange.
Ozondundu novivanda mavi imbura
nenyando komurungu weṋu,
nomiti mavi ravaere nondjoroka.
13 Omingambu mavi hapa poṋa
nambano pu pa hapa ominanyiva;
nomimbango mavi nyomoka
moruveze rwomakuiya.
Ihi matji rire otjisanekero tji matji karerere
notjizemburukise ku ihi ami,
ngu mbi ri Muhona, tji mba tjita.”
© Herero Revision Bible © Bible Society in Namibia, 2021.
