Orusuvero rwa Muhona ku Israel
1 Jerusalem, ove wa ri otja omukazendu ongandji,
nungwari nambano mo ravaere
nondjoroka nokutona otukwise.
Nambano mo kara novanatje ovengi
pomukazendu ngu ri morukupo.
2 Neneparisa ondanda mu wa tura;
nanununa ozongoze zayo,
nu u pamise nawa ozomboha zayo!
3 Ove mo tandavarisa omikuro
vyoye kominda avihe;
ozondekurona zoye maze kotorerwa ehi
nambano mu mwa tura oviwaṋa vyarwe.
Ovihuro nambano mbi ri tjo mavi ura novandu.
4 O tira, ko nokuyambururwa rukwao,
nu ko nokuṱisiwa ohoṋi.
Ove mo zembi ohoṋi yousuko woye,
nu ko nokuuhara amo zemburuka
okukara erike kwouhepundu woye.
5 Omuute woye me ritjindi otja omurumendu woye;
ena re oMuhona Omunamasaaehe;
Omuyapuke wa Israel me ku kutura.
Eye onguri Ndjambi wouye auhe.
6 Israel, ove u ri otja omukazendu omutanda
ngwa isiwa i omurumendu we,
ngwa ningisa ondjenda tjinene,
orondu eye tjinga e he mu suverere
tjimuna indu tje mu suverere mousuko we.
Nungwari nambano Muhona
me ku isana u kotoke ku ye, ama tja:
7 “Ami mbe ku esa oruveze orusupi,
nungwari me ku kotora norusuvero orunene.
8 Ami tji mba ri nomazenge,
mba taviza kwarwe oruveze orusupi,
nungwari nambano me ku raisire
orusuvero rwandje nga aruhe,”
Muhona ngu ku yama ma tja nao.
9 “Momayuva wa Noa ami mba kwizikire
kutja himee eta omupupo rukwao kombanda yehi.
Nambano wina otji me kwizike kutja
himee ṱomazenge na ove rukwao.
Ami hi nokukutena nu hi nokukuvera.
10 Ozondundu maze humburuka,
novivanda mavi kurakura,
nungwari orusuvero rwandje
kove kamaaru yanda ko;
ami me ṱakamisa omakwizikiro wandje
wohange nga aruhe.”
Muhona ngwe ku suvera ma tja nao.
Otjihuro otjipe Jerusalem
11 Muhona ma tja nai:
“Ove Jerusalem, ngu u tatumisiwa, tjihuro,
tji tja ningisa ondjenda,
ngu u hi nomundu okukuhuhumiṋa,
ami me tungurura omazikameno
woye nomawe omahuze.
12 Otuhungu twoye me tu tungu
nomawe omaserandu pyu,
nomivero vyoye me vi tungu
nomawe nge ruruma otja omuriro,
norumbo rwoye me ru tungu
nomawe omawerawere.
13 “Ami omuini me hongo ovature voye,
nu meve pe ouṋingandu nohange.
14 Ousemba mau ku zeuparisa.
Ove mo yamwa koṋiṋikizire
na kooma na kondiriro.
15 Ngamwa auhe ngu me ku rwisa,
ke nokukuhavera,
tjinga ama tjiti nao nokuhinondyero yandje;
nu ngu me ku rwisa ma ṱu motjirwa.
16 “Ami mba uta omuhambure wovitenda
ngu yakisa omuriro nokuhambura ovirwise.
Ami wina mba uta omurwe wovita
ngu ungurisa ovirwise okuzepa na vyo.
17 Nungwari kape notjirwise
tji matji yenene okukuhihamisa;
ove mo kara neziriro ku avehe
mbu mave ku kuminine.
Ami me yeura ovakarere vandje,
nu meve pe ondjamo.”
Muhona ongwa hungire.
© Herero Revision Bible © Bible Society in Namibia, 2021.
