1 Ovandu va zira nai:
“Owaṋi ngwa sere okukambura
mu imbi mbi twa zuva?
Owaṋi ngwa sere okumuna
eke ra Muhona mu imbi?
2 Indji ya ri ombango ya Muhona
kutja omukarere we a nyomoke
tjimuna otjikunwa tji tji eta
omuze mehi ekukutu.
Eye ka ri nombunikiro ombwa
yokutunanena ku ye.
3 Avehe ve mu nyengura nave humburuka na ye.
Eye wa iririra okutjinda ouzeu nomihihamo.
Kape na ngwa tara ku ye,
eṱe twe mu hahiza otja ngu ha ri otjiṋa.
4 “Nungwari eye wa tjinda omauzeu
nge sokurira owetu,
nomihihamo eṱe mbi twa sokutjinda.
Aruhe twe ripura kutja omahihamisiro we
ya ri omberero ndja hindwa i Ndjambi.
5 Nungwari omena romauvi wetu
eye tja usurwa ovirwaro;
eye wa tonenwa ourunde
eṱe mbu twa tjita.
Eṱe twa eterwa ohange
i omberero eye ndja muna,
nu twa verukisiwa i omazeze
womatoneno we.
6 Eṱe atuhe twa ri otja ozonḓu nda pandjara,
auhe wetu wa twara ondjira ye omuini.
Nungwari Muhona wa wisira
omberero kombanda ye,
okutja inga omauvi wetu atuhe.
7 “Eye wa tatumisiwa tjinene,
nungwari we ritjinda nomerisusuparisiro,
ke na pa nyamukura.
Otja ondjona ndji mwina tji mai kaṱa,
notja onḓu ndji ha vandara tji mai henywa,
eye ke na pa nyamukura.
8 Eye wa kamburwa,
a pangurwa na twarewa kokukaṱa,
nu kape na ngwa kara ko na tja na ye.
Eye wa ṱira omaurunde wetu.
9 Eye wa pakwa meyendo puna ovarunde,
nu wa pewa eyendo puna ovatumbe,
nangarire kutja eye ke na pa tjitire ouvi,
nu ke na pa korere ovizeze.”
10 Muhona ma tja nai:
“Indji ya ri ombango yandje
kutja eye a hihamisiwe;
onḓiro ye ya ri ombunguhiro yokueta ondjesiro.
Nu eye otji ma munu ozondekurona ze;
ma hupu orure,
nu mu ye ondyero yandje mai yenenisiwa.
11 Kombunda yokuhihamisiwa kwe
eye ma kara nenyando;
eye ma tjiwa kutja ka hihamisirwe omungandjo.
Omukarere wandje omusemba
mu mbi nonyuṋe ma tjindi
omberero yomauvi wovandu ovengi,
nu mena re ami meve isire.
12 Nu ami otji me mu pe poṋa pondengero,
poṋa mokati kovandu ovanene novanamasa.
Eye we riyandjera omuinyo we,
nu wa varwa puna ovarunde.
Eye wa hihamisirwa ovarunde,
nu wa kumba kutja ve isirwe.”
© Herero Revision Bible © Bible Society in Namibia, 2021.
