Omambo wokuhuhumiṋa Jerusalem
1 Muhona ma tja nai:
“Purateneye ku ami, eṋe mbu mamu vanga okuyamwa,
eṋe mbu mamu ya okuningira ombatero ku ami.
Ripureye noruuwa mu mwa za,
nondjombo mu mwa hupurwa.
2 Ripureye na iho mukururume
Abraham na Sara mu mwa za.
Tji mba isanene Abraham,
eye wa ri nokuhinovanatje,
nungwari ami mbe mu sera ondaya
ne mu pe ovanatje
nu mba takavarisa ozondekurona ze.
3 “Ami me raisa ondjenda kOjerusalem
na kovitambatundu vyatjo avihe.
Nandarire kutja ehi ratjo oro okuti onguza,
ami me ritjitukisa a rire otjikunino
tjimuna otjikunino ihi tji mba kunine mOeden.
Ondjoroka nenyando mavi kara mbo,
na wina omaimburiro wondangero
nowokutja okuhepa ku ami.
4 “Purateneye ku ami, oweṋe viwaṋa,
purateneye ku imbi mbi me hungire.
Ami me yandja omahongero wandje komihoko;
omatwako wandje maye vi etere ondjerera.
5 Ami meya tjimanga, nu me vi yama;
oruveze rwoutoṋi wandje rwa yenene.
Ami omuini me pangura oviwaṋa.
Omakoverwa hi wokokure maye ndji undju
nga tji mbe ya;
owo maye ndji undju nomuretima
kutja mbi ye yame.
6 Yereye omeho weṋu komayuru;
tareye kombanda yehi!
Omayuru maye zengi tjimuna omuise;
ehi mari hahauka tjimuna ozombanda ozonguru,
novature varo avehe mave koka
tjimuna otumwe.
Nungwari ondjamo ami ndji me eta,
oyo mai karerere nga aruhe;
ouṱakame wandje kamaau yanda ko.
7 “Purateneye ku ami,
eṋe mbu mu tjiwa kutja ousemba otjikeṋa,
eṋe mbu mu ṱakamisa omatwako
wandje momitima vyeṋu.
Amu tira, ovandu tji mave mu
nyekerere nokumuyamburura;
8 owo mave zengi otja ozombanda,
nḓa riwa i omatoto.
Nungwari ouṱakame wandje
mau kara nga aruhe;
nondjamo yandje mai karerere okuza
komuhoko nga komuhoko.”
9 Yanḓimuka, yanḓimuka, Muhona,
u tu vatere!
Ungurisa omasa woye u tu yame;
ungurisa wo otja tji wa tjitire
motuveze otukuru.
Oove ngu wa kondere onyoka yokuvare
Rahab movindimbu pekepeke.
10 Wina oove ngu wa pwirisa omuronga,
nu ngu wa ungura ondjira mokati komeva,
kokutja imba ove mbu wa yama ve konde.
11 Imba ove mbu wa kutura mave yaruka
nave kavaza kOjerusalem nondjoroka
amave imbura nokuravaera nenyando.
Owo mave karerere nondjoroka
ava kuturwa kondjemeno noruhoze nga aruhe.
12 Muhona ma tja nai:
“Ami owami ingwi ngu mbi mu huhumiṋa.
Okutjavi tji mo tira omundu,
omundu ngu koka,
ngu ha karerere tjimuna omahozu?
13 Ove wa zemba Muhona ngwe ku uta,
ngwa tandavarisa omayuru,
na ziki omazikameno wehi are?
Okutjavi tji u kara nondiriro aruhe
yomazenge wa imba mbe ku ṋiṋikiza,
wa imba mbe rirongerere okukuyandeka?
Omazenge wawo kaye nokuuhara
amaye ṱunu kove rukwao.
14 Imba ovapandekwa mave kuturwa tjimanga;
owo kave nokuṱira motjovakamburwa;
mave kara novikurya indu nai mbi va hepa.
15 “Owami Muhona, Ndjambi woye;
ami mbi rungisa okuvare,
nu mbi hwaarisa ozongazona.
Ena randje owami Muhona Omunamasaaehe!
16 Owami ngu mba tandavarisa omayuru,
nu ngu mba zika omazikameno wehi,
me tja nai kOjerusalem:
‘Oove otjiwaṋa tjandje!
Ami mbe ku pa omahongero wandje,
nu mbi ku yama neke randje.’ ”
Omaandero womahihamisiro wa Jerusalem
17 Yanḓimuka, Jerusalem!
Yeuka nu sekama!
Ove wa nwa otjinwino tjomberero Muhona
tje ku pa okunwa momazenge we;
ove we tji nungurura,
notjo tje ku teraterisa.
18 Kape nomundu ngu me ku hongorere,
kape nomundu motjiwaṋa
tjoye ngu me ku kambura peke.
19 Owivonga vivari mbi vye ya kombanda yoye:
Ehi roye ra ṱukuṱurwa i ovita,
notjiwaṋa tjoye tja kozewa i ondjara.
Nu kape na ngu me ku ṱire
ondjenda nokukuhuhumiṋa.
20 Potjikoro tjomuvanda auhe ovazandu voye
mave wotamisiwa i okungundipara;
owo va sana nonḓuno ndja kamburwa
i ongwehe yomuyeve.
Owo va muna omasa womazenge
wa Muhona, Ndjambi wawo.
21 Puratena, ove tjiwaṋa tja Jerusalem,
ngu u tatumisiwa,
ove ngu u teratera aayo
wa purukisiwa i omavinu.
22 Muhona Ndjambi woye,
ngu ku yeura, ma tja nai:
“Ami me isa po otjinwino
tji mbe ku pa momazenge wandje.
Ove ko nokuuhara amo
nu otjinwino hi rukwao.
23 Ami me tji yandja ku
imba mbe ku ṋiṋikiza,
ku imba mbe ku saravarisa momivanda,
nu mbe ku tomba aayo oove ondova.”
© Herero Revision Bible © Bible Society in Namibia, 2021.
